गौतम बुद्ध विमानस्थलको काम पुन: सुरु

गौतम बुद्ध अन्तर्राष्ट्रिय विमानस्थल आयोजना प्रमुख प्रवेश अधिकारीले ठेकेदारले पाउनुपर्ने १० करोड रुपैयाँ तत्काल नेपाल नागरिक उड्डयन प्राधिकरणले पछि शोधभर्ना हुने गरी बुधबार उपलब्ध गराएको बताए ।

‘भुक्तानी पाउनासाथ ठेकेदार कम्पनीका तर्फबाट सकारात्मक प्रतिक्रिया आएको छ,’ उनले भने, ‘रोकिएका सबै काम बुधबारबाटै सुरु भएका छन् ।’ कम्पनीले मजदुरलगायत विभिन्न सप्लायर्सलाई भुक्तानी दिन नसकेर उत्पन्न अविश्वास र अन्योल पनि हटेको उनले बताए । रोकिएको धावनमार्गको अन्तिम पिचको काम पनि सुरु गरिएको छ ।

बिहीबारदेखि निर्माण कार्यमा निरन्तरता र तीव्रता दिने प्रतिबद्धता ठेकेदार कम्पनीले देखाएको छ । एक महिनाअघि नै ठेकेदार कम्पनीलाई उपलब्ध गराउनुपर्ने खर्चको भुक्तानी सरकारी प्रक्रियागत ढिलाइले भुक्तानी नहुँदा आइतबारदेखि काम रोकिएको थियो ।

अर्थ मन्त्रालयले ७० करोड रुपैयाँको निकासा सोमबार आयोजनालाई दिएको थियो । एसियाली विकास बैंक अन्तर्गतको उक्त रकम ठेकेदार कम्पनीले पाउनुपर्ने थियो । बैंकले सिधै ठेकेदार कम्पनीको खातामा राखिदिने गरेकोमा अहिले नागरिक उड्डयन प्राधिकरणको खातामा जम्मा गरिदिनेछ । आयोजनाका लागि आवश्यक नदीजन्य पदार्थको विषयमा बुटवल उपमहानगरपालिकासँगको विवाद पनि समाधान भएर सामग्री उपलब्ध हुन थालेको छ ।

नगरपालिकाले पुरानै दररेटमा उपलब्ध गराउने निर्णय भएपछि सप्लायर्सले तोकिएको परिणाम नदीबाट निकाल्ने तयारी गरेको पनि आयोजना प्रमुख अधिकारीले बताए ।