विदेशी लगानीको प्रतिबद्धता ६८ प्रतिशत कम
काठमाडौँ — सोमबार सार्वजनिक गरिएको आर्थिक वर्ष २०७५/७६ को आर्थिक सर्वेक्षणले नेपालको उद्योग क्षेत्रमा विदेशी लगानी प्रतिबद्धता घटेको देखाएको छ । सर्वेक्षणअनुसार अघिल्लो आर्थिक वर्ष २०७४/७५ को तुलनामा यसपालिको आवमा ६८ प्रतिशतले लगानी प्रतिबद्धता घटेको छ ।
सरकार तथा निजी क्षेत्रले राजनीतिक स्थिरता, नीतिगत सुधार, प्रक्रियागत सरलीकरणजस्ता आधार देखाएर नेपाललाई लगानीका लागि योग्य देश बताइरहे पनि विदेशी लगानी प्रतिबद्धता अपेक्षाकृत रूपमा बढेको छैन ।
आर्थिक वर्ष २०७४/७५ को फागुनसम्ममा ३४ अर्ब ९१ करोड विदेशी लगानी प्रतिबद्धता भएकोमा यसपटक यही अवधिमा जम्मा ११ अर्ब १८ करोड लगानी प्रतिबद्धता भएको छ । यो ६७.९७ प्रतिशतले कम हो । विदेशी लगानी आकर्षित गर्न सरकारले चैतमा लगानी सम्मेलनसमेत आयोजना गरेको थियो । त्यसमा ४० देशका ३ सयभन्दा बढी विदेशी कम्पनीबाट ८ सय ९ जना विदेशी लगानीकर्ता तथा प्रतिनिधिले भाग लिएका थिए । यद्यपि विदेशी लगानीको तथ्यांक हालसम्म उत्साहजनक हुन सकेको छैन ।
लगानी प्रतिबद्धता घटे तापनि सर्वेक्षणमा उद्योग र तिनले सिर्जना गर्ने रोजगारीको संख्या बढेको देखिन्छ । यसपालि विदेशी लगानीका २ सय १८ उद्योगमा ७ हजार ९ सय ५३ रोजगारी सिर्जना हुने अनुमान गरिएको छ । अघिल्लो आर्थिक वर्षको यही अवधिमा १ सय ९४ उद्योगबाट ७ हजार ५ सय ४१ रोजगारी सिर्जना हुने अपेक्षा गरिएको थियो ।
अर्थमन्त्री युवराज खतिवडाले सर्वेक्षणबारे जानकारी दिँदै विदेशी लगानीमा सञ्चालन हुने उद्योगहरूको दर्ता बढ्दो क्रममा रहेको विवरण पेस गरेका थिए । अघिल्लो आर्थिक वर्षको तुलनामा यसपालि विदेशी लगानीका २४ वटा उद्योग थपिएका छन् ।
विदेशी लगानीमा स्थापना हुने उद्योगहरूको प्रक्रियागत सरलताका लागि सरकारले उद्योग विभाग परिसरमा यही जेठबाट एकल विन्दु सेवा केन्द्र सञ्चालनमा ल्याएको छ । केन्द्रमार्फत दर्ता, प्रवेशाज्ञा, नवीकरण र बहिर्गमनलगायत सबै सेवा एकै स्थानबाट उपलब्ध गराइन्छ । केन्द्रमा ६ अर्ब रुपैयाँसम्मको विदेशी लगानीसम्बन्धी सबै प्रक्रिया पूरा गर्न सकिन्छ भने त्यसभन्दा माथिको लगानीको लागि लगानी बोर्डमा समेत एकल विन्दु सेवा केन्द्र स्थापना गर्ने सरकारको लक्ष्य छ ।
आव २०७५/७६ को फागुनसम्म दर्ता भएका विदेशी लगानीका उद्योगहरूमध्ये सबैभन्दा बढी सेवामूलक उद्योग रहेको तथ्यांकले देखाएको छ । ‘सूचना, प्रसारण र सञ्चार प्रविधिमा आधारित उद्योगहरू सबैभन्दा कम दर्ता भएका छन्,’ सर्वेक्षण पुस्तिकामा छ, ‘विदेशी लगानीको स्वीकृति पाएका कुल उद्योगको संख्याको आधारमा चीनको अंश ३१.१ प्रतिशत र लगानीको आधारमा ३९.८१ प्रतिशत छ ।’ यसपछि भारत, बेलायत, दक्षिण कोरिया, अमेरिका, सिंगापुर, मौरिसस, जापान, स्विट्जरल्यान्ड, संयुक्त राज्य इमिरेट्स र अन्य देश छन् ।
प्रदेश ३ अगाडि, कर्णाली पछाडि
हामीकहाँ ठूला, मझौला र विदेशी लगानीका साना उद्योग गरी जम्मा ७ हजार ८ सय ३२ वटा उद्योग छन् । कुल गार्हस्थ्य उत्पादनमा औद्योगिक उत्पादनको योगदान ५.५ प्रतिशतबाट बढेर यसपालि ५.६ प्रतिशत हुने अनुमान गरिएको छ ।
चालु आर्थिक वर्षको फागुनसम्म दर्ता भएका उद्योगमध्ये प्रदेश नम्बर ३ मा दुई तिहाइ उद्योग रहेको सर्वेक्षणले देखाएको छ । सबैभन्दा कम उद्योग कर्णाली प्रदेशमा छन् । प्रदेश ३ मा ५ हजार २ सय ९८ वटा उद्योग दर्ता भएका देखिन्छन् भने कर्णाली प्रदेशमा ३९ वटा मात्रै छन् ।
सूचना, प्रसारण र प्रविधिमा आधारित उद्योग कर्णाली र सुदूरपश्चिम प्रदेशमा दर्ता भएका छैनन् । कुल औद्योगिक लगानीको ५५.९ प्रतिशत लगानी ऊर्जामूलक उद्योगमा र २३.८ प्रतिशत उत्पादनमूलक उद्योगमा रहेको सर्वेक्षणमा देखिन्छ ।
कम्पनी रजिस्ट्रारको कार्यालयका अनुसार चालु आवको फागुनसम्म देशभर २० लाख ९९ हजार २२ वटा कम्पनी दर्ता भएकोमा सबैभन्दा बढी प्रदेश ३ मै ७३.१ प्रतिशत दर्ता भएका छन् । सबैभन्दा कम कर्णाली प्रदेशमा १.० प्रतिशत कम्पनी दर्ता भएको तथ्यांक छ ।
सरकारले राष्ट्रिय अर्थतन्त्रमा उद्योग क्षेत्रको योगदान बढाउने लक्ष्यले कानुनी तथा संरचनागत सुधार ल्याएको सर्वेक्षणमा जनाइएको छ । विदेशी लगानी तथा प्रविधि हस्तान्तरण ऐन, २०७५, विशेष आर्थिक क्षेत्र ऐन, २०७५, सार्वजनिक–निजी साझेदारी ऐन, २०७५, औद्योगिक ग्राम स्थापना तथा सञ्चालनसम्बन्धी निर्देशिका, २०७५ जस्ता कानुन कार्यान्वयनमा ल्याएको उल्लेख गरेको छ । हालसम्म सञ्चालनमा रहेका १० औद्योगिक क्षेत्रभित्र स्थापित ७ सय उद्योगमध्ये ६ सय ४ उद्योग सञ्चालनमा रहेको विवरण छ ।
प्रकाशित : जेष्ठ १५, २०७६ ०८:५८