प्रदेश ३ को बजेट ४७ अर्ब ६० करोड ७८ लाख, पूर्वाधारमा जोड

उत्साह जगाउने गरी बजेट आएन । कसरी काम गरिन्छ भन्ने पनि छैन । पूरै गोलमटोल रूपमा बजेट आएको छ । – कांग्रेस संसदीय दलका नेता इन्द्रबहादुर बानियाँ
प्रताप विष्ट, सुवास बिडारी

(हेटौंडा) — प्रदेश ३ सरकारले आगामी आर्थिक वर्ष २०७६/७७ का लागि विनियोजित बजेट आइतबार सार्वजनिक गरेको छ । प्रदेशसभाको बैठकमा आर्थिक मामिला तथा योजनामन्त्री कैलाशप्रसाद ढुंगेलले ४७ अर्ब ६० करोड ७८ लाख ८६ हजार रुपैयाँ बराबरको बजेट पेस गरे । यो चालु आवको तुलनामा ११ अर्ब ९९ करोड २१ रुपैयाँ बढी हो । 

आगामी आर्थिक वर्षको चालु खर्चतर्फ २४ अर्ब ४६ करोड ७९ लाख ९० हजार अर्थात् ५१ प्रतिशत तथा पुँजीगततर्फ २२ अर्ब ८३ करोड ९८ लाख ९६ हजार अर्थात् ४८ प्रतिशत छ । चालु आर्थिक वर्षमा पुँजीगत (विकास) तर्फ ६१ प्रतिशत बजेट विनियोजन गरिएको थियो । प्रदेश सरकारले बजेटमा पहिलोपटक ३० करोड रुपैयाँ वित्तीय व्यवस्थासमेत गरेको छ ।

सरकारले आगामी आर्थिक वर्षमा आन्तरिक राजस्वतर्फ १५ अर्ब ४९ करोड ९६ लाख, अन्तरसरकारी अनुदान १८ अर्ब ६ करोड १३ लाख, अन्य राजस्वतर्फ ७ अर्ब ३० करोड तथा राजस्व बचततर्फ ६ अर्ब ७५ करोड १६ लाख ८६ हजार रुपैयाँ हुने अनुमान गरेको छ । उसले चालु आर्थिक वर्ष २०७५/७६ मा प्रदेशको कुल सरकारी खर्चको तुलनामा ७८ प्रतिशत अर्थात् २७ अर्ब ८८ करोड १२ लाख रुपैयाँ खर्च हुने संशोधित अनुमानसमेत गरेको छ । चालु आर्थिक वर्षमा आन्तरिक राजस्व परिचालन ८ अर्ब ३५ करोड १० लाख संशोधित अनुमान गरिएको मन्त्री ढुंगेलले जानकारी दिए । यस आधारमा लक्ष्यको तुलनामा आन्तरिक राजस्व संकलन ९८ करोड २६ लाख न्यून हुने उनको भनाइ छ ।

बजेटमा स्थानीय तहलाई वित्तीय समानीकरण अनुदानस्वरूप १ अर्ब ३० करोड, समपूरक अनुदान २ अर्ब ४० करोड, स्थानीय तहलाई विशेष अनुदान ४० करोड, स्थानीय तहलाई ससर्त अनुदान एक अर्ब २५ करोड, शिक्षा तथा स्वास्थ्यतर्फ स्थानीय तहमा ससर्त अनुदानतर्फ ५८ करोड ८१ लाख र स्थानीय तह पूर्वाधार विकास कार्यक्रमका लागि ससर्त अनुदान १ अर्ब २५ करोड विनियोजन गरिएको छ । प्रदेश सरकारले निर्वाचन क्षेत्र पूर्वाधार विकास कार्यक्रमका लागि एक अर्ब ९८ करोड रुपैयाँ छुट्याएको छ
बजेटमार्फत औद्योगिक क्षेत्रलाई प्रदेश सरकार मातहत ल्याउने, मकवानपुरको मनहरी र सिन्धुलीको मरिणमा औद्योगिक क्षेत्र स्थापना गर्ने, एक निर्वाचन क्षेत्र एक औद्योगिक ग्राम स्थापना गर्ने र चार वर्षभित्र सम्पूर्ण स्थानीय तहको केन्द्रसम्म बाह्रै महिना सञ्चालन हुने सडक सञ्जाल निर्माण गर्ने, पुष्पलाल प्रदेश चक्रपथ र पोस्टबहादुर बोगटी सुरुङमार्ग निर्माण गर्ने महत्त्वाकांक्षी योजनाका लागि बजेट विनियोजन गरेको छ । काठमाडौं उपत्यकासँगको पहुँचको दूरी छोट्याउन चौतारा सिपाघाट–कात्तिके–काठमाडौं सडक र टोखा–छहरे–नुवाकोट सडक विस्तार तथा स्तरोन्नतिका लागि आवश्यक बजेट विनियोजन गरिएको छ ।

‘एक घर एक धारा,’ सुक्खा क्षेत्रमा खानेपानी योजना, ढल व्यवस्थापन कार्यक्रम सञ्चालन, काठमाडौं उपत्यकालाई सफा र हरित सहरका रूपमा विकास गर्न २० करोड रुपैयाँ छुट्याइएको मन्त्री ढुंगेलले जानकारी दिए । प्रदेशका १० जिल्लामा प्रहरी भवन एकाइ निर्माण गर्न ८२ करोड ६५ लाख, सहिद बेपत्ता परिवारलाई सहयोग प्रदान गर्न ५ करोड, सहिदको नाममा पार्क बनाउन १० करोड र पूर्वाधार निर्माणका लागि स्थानीय तह साझेदारी कार्यक्रम सञ्चालन गर्न दुई करोड १० लाख रुपैयाँ विनियोजन गरिएको छ ।

प्रकाशित : असार १, २०७६ २१:५४
प्रतिक्रिया
पठाउनुहोस्

उपमेयर कप फुटबल : पूजाको दस गोल

कान्तिपुर संवाददाता

काठमाडौँ — राष्ट्रिय टिमकी डिफेन्डर पूजा रानाले अग्रपंक्तिमा खेल्दै एक्लैले दस गोल गरेपछि बासगढीले उपमेयर कप अन्तर नगर महिला फुटबलमा आइतबार शम्भुनाथ नगरपालिकालाई निरीह तुल्याउँदै १९–० को जित हात पारेको छ ।

पहिलो खेलमा घोराही तुलसीपुपर उपमहानगरपालिकासँग २–२ को बराबरी गर्दा दुवै गोल गरेकी पूजाले हलचोक मैदानमा शम्भुनाथविरुद्ध पाँचौं मिनेटमै गोलको खाता खोलेकी थिइन् । उनले १० र २१ औं मिनेटमा थप गोल गर्दै ह्याट्रिक पूरा गरेकी थिइन् । पहिलो हाफमा बासगढीले ८–० को अग्रता लिदा पाँच गोल गरेकी उनले निर्धारित ८० मिनेटको खेलको दोस्रो हाफमा पाँच गोल थपेकी थिइन् । लक्ष्मी चन्द र सुरक्षा सुखरियाले पनि ह्याट्रिक गरे ।

समूह ‘ए’को प्रतिस्पर्धामा राष्ट्रिय टिमकी गोलपिकर अन्जना रानामगरले पनि दुई गोल गर्न भ्याइन् । उनले फ्रि–किकमार्फत् ६८ औं मिनेटमा व्यक्तिगत पहिलो गोल गरेकी थिइन् । गोलपोष्ट छाडेर अघि बढेकी उनले ‘ड्रिब्लिङ’ गर्दै अघि बढाएको बललाई ७५ औं मिनेटमा पोष्टको दिशा दिदै व्यक्तिगत दोस्रो गोल गरेकी थिइन् । बासगढीकी नानुमाया क्षत्रीले पनि इन्ज्युरी समयमा एक गोल गरिन् ।

यसअघि दिनको पहिलो खेलमा घोराही तुलसीपुर उपमहानगरपालिकाले वालिङमाथि ५–० को जित हासिल गर्दै तीन अंक जोड्यो । त्यसमा अस्मिता रनपालले दुई तथा शान्ता नेपाली, सरस्वती हमाल र मनमाया दमाईले एक–एक गोल गरे ।

प्रकाशित : असार १, २०७६ २१:४३
पूरा पढ्नुहोस्
प्रतिक्रिया
पठाउनुहोस्