विषादी जाँचेर मात्रै भन्सार पास

माधव ढुंगाना

भैरहवा — विषादी जाँच गरेर मात्रै भारतबाट आयातित तरकारी तथा फलफूल भन्सार जाँचपास गर्न थालिएको छ । भन्सार विन्दुहरूमा विषादी परीक्षण रोक्ने सरकारी निर्णय कार्यान्वयन नगर्न सर्वोच्च अदालतले बुधबार अन्तरिम आदेश दिएपछि पुनः परीक्षण थालिएको हो ।

केही दिनअघि सरकारले पर्याप्त प्रयोगशाला नभएको जनाउँदै सोझै आउन दिने निर्णय गरेको थियो । त्यसपछि सुनौली–भैरहवा नाकाबाट परीक्षणबिनै तरकारी तथा फलफूल नेपाल भित्रिएका थिए ।

अदालतको अन्तरिम आदेशपछि सुनौली–भैरहवा नाकाबाट आयात गरिने तरकारी तथा फलफूलको बुटवल थोक हाटबजारस्थित विषादी अवशेष द्रुत विश्लेषण प्रयोगशाला इकाईमा जाँच गर्न सुरु गरिएको छ । अदालतको आदेशपछि विषादी परीक्षण सुरु गरिएको बेलहियास्थित क्वारेन्टाइन कार्यालयका प्रमुख विष्णुप्रसाद काफ्लेले जानकारी दिए ।

‘सर्वोच्चको आदेशपछि हामीले व्यवसायीलाई बुटवलमा रहेको जाँच इकाईबाट परीक्षण गरेर रिपोर्ट ल्याउन भनेका छौं,’ उनले भने, ‘रिपोर्ट नआउँदासम्म तरकारी तथा फलफूलका गाडी यहीँ रोकिन्छन् ।’

व्यवसायीले परीक्षण रिपोर्ट ल्याएपछि त्यसैका आधारमा गाडी पास हुने उनले बताए । भैरहवा भन्सार कार्यालयका सूचना अधिकृत कलिराम पौडेलले सर्वोच्चको आदेशअनुसारै जाँच गरेर विषादी नभएको रिपोर्ट ल्याएपछि मात्रै गाडी भन्सारबाट पठाउने बताए । ‘सर्वोच्चको आदेशलगत्तै विषादी परीक्षणका आधारमा मात्रै तरकारी तथा फलफूलका गाडी भन्सार पास गर्नु भनेर विभागबाट निर्देशन आएको छ,’ पौडेलले भने ।

बिहीबार साँझसम्म विषादी जाँच गरिएका करिब ५० वटा गाडी भन्सार पास भएको पौडेलले जानकारी दिए । बेलहिया नाकामा विषादी परीक्षण इकाई छैन । बुटवलको उक्त इकाईमा प्रदेश सरकारले एकजना प्राविधिक कर्मचारी खटाएपछि बुधबारदेखि परीक्षण सुरु भएको छ ।

बुटवलमै विषादी परीक्षण इकाई सञ्चालन भएपछि आयातकर्ता खुसी छन् । यसले जाँच गर्नुपरे पनि काठमाडौं धाउनुपर्ने बाध्यता हटेको व्यवसायीले बताए । काठमाडौं परीक्षण गर्न जाँदा लागतसमेत बढ्ने गरेको थियो ।

बुटवलमै जाँच सुरुपछि व्यवसायीलाई सहज भएको छ । उनीहरूले सीमा नाकामै परीक्षण इकाई स्थापना गर्नुपर्ने माग गरेका छन् । यस नाकाबाट आव ०७४/७५ मा ९ करोड ७१ लाख रुपैयाँको ताजा तरकारी, ७१ करोड ४ लाख रुपैयाँको फलफूल, १ अर्ब ८४ करोड ३९ लाख रुपैयाँको आलु र १ अर्ब ४८ करोड ८३ लाख रुपैयाँ मूल्यको प्याज आयात भएको थियो ।

प्रकाशित : असार २७, २०७६ ०९:४७
प्रतिक्रिया
पठाउनुहोस्

बैंकलाई असारे चटारो

निर्मला खडायत

धनगढी — सरकारी तथा गैरसरकारी संघसंस्थाहरूको आर्थिक गतिविधि बढेपछि बैंक, होटल रेस्टुरेन्टहरूलाई असारे चटारोले छोएको छ । आर्थिक वर्षको अन्तिम महिनामा सरकारी, निजी क्षेत्रको कारोबार दोब्बर बढेको छ । धनगढीस्थित राष्ट्र बैंकका अनुसार वैशाखयता कोष स्थानान्तरण (फन्ड ट्रान्सफर) मा पनि वृद्धि भएको छ ।

सामान्यतया एउटा बैंकमा ३ महिनामा एकपटक २५ करोड रुपैयाँसम्म फन्ड ट्रान्सफर गर्ने राष्ट्र बैंकले अहिले महिनामै ३/४ पटक फन्ड ट्रान्सफर गरिरहेको प्रबन्धक निश्चल अधिकारीले बताए । ‘अहिले बैंकमा २५ प्रतिशतले कारोबार बढेको छ,’ उनले भने ।

राष्ट्र बैंकले चालु आर्थिक वर्षको हालसम्म अन्य बैंकहरूमा १० अर्ब फन्ड ट्रान्सफर गरेको छ । चालु आर्थिक वर्षको साउनदेखि फागुनसम्म ३६ प्रतिशत र चैतदेखि असारसम्म ६४ प्रतिशतसम्म फन्ड ट्रान्सफर भएको बैंकका प्रबन्धक अधिकारीको भनाइ छ ।

‘वैशाखयता फन्ड ट्रान्सफरको काम हात्तै बढेको छ । आर्थिक वर्षको अन्त्य भएकाले आर्थिक कारोबार बढेको छ,’ प्रबन्धक अधिकारीले भने । उनले वैशाख, जेठ र असारमा मात्रै ३ अर्ब ८० करोड रुपैयाँ ट्रान्सफर भएको जानकारी दिए । सरकारले अधिकांश विकास निर्माणका काम जेठ र असारमै गर्छ । ‘आर्थिक कारोबार बढेपछि प्रदेशका अन्य बैंकहरूको ढुकुटीमा भएको पैसा सकिन्छ र उनीहरू नेपाल राष्ट्र बैंकसँग रकम माग गर्छन्,’ प्रबन्धक अधिकारीले भने ।
निजी बैंकहरूमा पनि आर्थिक कारोबार बढेको छ । सामान्य अवस्थामा भन्दा अहिले २५ प्रतिशतले कारोबार वृद्धि भएको बैंकका प्रबन्धकहरूले बताएका छन् । एभरेस्ट बैंकका शाखा प्रबन्धक राजकुमार शाक्यले वैशाखयता बैंकको कारोबार बढेको बताए । वर्षका अन्तिम २ महिनामा आर्थिक गतिविधि स्वाभाविक रूपमा बढ्ने उनको भनाइ छ ।

होटल भरिभराउ
सुदूरपश्चिम प्रदेशको अस्थायी मुकाम धनगढीका अधिकांश होटल भरिभराउ छन् । कारोबार हात्तै बढेको छ । सरकारी तथा गैरसरकारी संघ संस्थाहरूका कार्यक्रमहरूले होटलका हलमा कार्यक्रम गर्न पालो कुर्नुपर्छ । संघसंस्थाहरूलाई पनि असारभित्र काम सम्पन्न गरिसक्नुपर्ने बाध्यता छ ।

‘व्यापार पनि अन्य महिनाको तुलनामा राम्रो भएको छ,’ होटल व्यवसायी संघ कैलालीका अध्यक्ष तथा होटल सनलाइटका सञ्चालक कलम बमले भने, ‘अहिले होटलमा ग्राहकहरूको संख्या बढेको छ । संघसंस्थाका कार्यक्रमहरू सामान्य अवस्थामा भन्दा बढी भइरहेका छन् ।’

सरकारी निकायका कार्यक्रमहरूले हलहरू प्याक हुने गरेको उनले बताए । अन्य महिनामा फाटफुट मात्र कार्यक्रम आउने गरेका भए पनि पछिल्ला दुई महिनामा दिनहुँ कार्यक्रम हुने गरेको उनले बताए । ‘आर्थिक वर्षको अन्त्य भएर होला हरेक वर्षझैं यस वर्ष पनि जेठदेखि होटलमा राम्रै कारोबार भइरहेको छ,’ बमले भने ।

अघिपछि न्यून कारोबार हुने भए पनि आर्थिक वर्षका अन्तिम २ महिनामा झन्डै ४० लाख रुपैयाँभन्दा बढीको कारोबार हुने गरेको धनगढीकै साथी होटलका रिसेप्सन म्यानेजर मोहनराज अवस्थीले बताए । ‘होटलमा दैनिक कार्यक्रम भइरहेको छ,’ उनले भने, ‘पहिले महिनामा १०/१५ कार्यक्रम मात्र आयोजना हुन्थे ।’

प्रकाशित : असार २७, २०७६ ०९:४६
पूरा पढ्नुहोस्
प्रतिक्रिया
पठाउनुहोस्