निगम अधिकारीलाई व्यवसायीको धम्की

सीमा नाघेर व्यवसायीले कसरी कार्यालय आउँछौ भनेर धम्क्याए : कार्यकारी निर्देशक
निगमले काम नगरेपछि साथीहरू ताते : व्यवसायी
राजु चौधरी

काठमाडौँ — ट्यांकर सञ्चालन अनुमति पर्खिबसेका व्यवसायीले आयल निगमका कर्मचारीलाई कार्यालयमा छिर्न नदिने धम्की दिएका छन् । व्यवसायीले कार्यकारी निर्देशक सुरेन्द्र पौडेल, नायब कार्यकारी निर्देशक सुशिल भट्टराई र निर्देशक वीरेन्द्र गोइतलाई धम्की दिएका हुन् । 

व्यवसायीले आइतबार कर्मचारीलाई भेटेरै ‘सोमबारदेखि कसरी कार्यालय आउँछौ ?’ भनेर धम्की दिएको निगमले जनाएको छ । ‘ट्यांकर सञ्चालन कानुनी विषय हो । सञ्चालनबारे निगम बोर्ड बैठकमा छलफल भइरहेको छ,’ निगमका कार्यकारी निर्देशक सुरेन्द्र पौडेलले भने, ‘हामी प्रक्रियामा छौं तर व्यवसायीले तिमीहरू सोमबारदेखि कसरी अफिस आउँछौ भनेर धम्क्याए ।’

उनका अनुसार व्यवसायीहरू सीमा नाघेरै कार्यलयभित्र छिरेका थिए । ‘५/६ जना थिए । पीएले भेट्न नदिने भन्दा ढोका फुटाएर जान्छौं, भनेपछि कार्यकक्षमा बोलाए । नायब कार्यकारी निर्देशक भट्टराई र निर्देशक गोइतसँगै थियौं,’ उनले भने, ‘तल्लोस्तरमा आएर हूलहुज्जत गर्न खोजे । कोठामै धम्काए ।’

व्यवसायीहरूले भने निगमको लापरबाहीले व्यवसायीको १८ करोड जोखिममा परेको बताउँदै आएका छन् । निगमका पूर्वकार्यकारी निर्देशक गोपालबहादुर खडकाले ढुवानी विनियमावली विपरीत ट्यांकर सञ्चालन अनुमति दिएपछि२३ व्यवसायीको लगानी जोखिममा परेको हो ।

बैंकको ऋण ब्याज र किस्ता तिर्न नसकेपछि २३ व्यवसायीहरू सधैं निगम परिसरमा धाइरहेका छन् । ‘व्यवसायीका लगानी डुबिसक्यो । निगमले काम गरिदिएन,’ व्यवसायी नरेन्द्र सेढाईले भने, ‘बोर्डमा लग्यो तर गरेन । काम नगरेपछि केटाहरू तातेका हुन् ।’

तत्कालीन कार्यकारी निर्देशक खडकाले विनियमावली विपरीत २०७४ वैशाख २१ गतेदेखि जेठ १८ गतेसम्मको ट्यांकर सञ्चालन अनुमति दिएको निगमका कर्मचारी बताउँछन् । उनले सार्वजनिक सूचनाबिनै ३४ ट्यांकरको स्वीकृत दिएका थिए । निगमको ढुवानी विनियमवली २०७३ अनुसार ३५ दिने सार्वजनिक सूचनापश्चात मात्रै अनुमति दिनुपर्छ ।

३४ ट्यांकरको हकमा गलत भएपछि निगमले २०७४ जेठ २२ मा भुलबस भएको कानुनसंगत नभएको भन्दै ३४ ट्यांकरको प्रक्रिया खारेज भएको सूचना प्रकाशित गरेको थियो । व्यवसायीका अनुसार ३४ ट्यांकरमध्ये ९ वटा बनेको छैन ।

सूचना प्रकाशित गरे पनि व्यवसायीले भने ट्यांकर निर्माणकार्य जारी राखेको निगमका अधिकारीहरू बताउँछन् । प्रवक्ता वीरेन्द्र गोइतका अनुसार ती ट्यांकरहरू नियम विपरीत छन् । ‘विगतमा स्वीकृत भयो । त्यसपश्चात् गल्ती भएको भन्दै निगमले सूचना निकालेर खारेज गर्‍यो । त्यसलगत्तै दुईवटालाई स्वीकृत दिइयो,’ गोइतले भने, ‘व्यवसायीको पीडाप्रति हामी सकारात्मक छौं । स्वीकृत गर्न कर्मचारीको अधिकार पनि हुँदैन ।’ गोइतका अनुसार व्यवसायीहरूले कर्मचारीलाई पनि रोडमा पुर्‍याउने धम्की दिएको बताए ।

व्यवसायी सेढाईले भने ट्यांकर ढुवानी व्यवसायी महासंघ र निगम मिलेर सिन्डिकेट गरेको आरोप लगाए । ‘ट््यांकर ढुवानी र निगम मिलेर सिन्डिकेट भयो । कसैले अपशब्द बोलेको छैन । साथीहरूले फलानो फलानोले काम गरेन, मैले जानेको छु मात्रै भनेका हुन्,’ सेढाईले भने, ‘सुशील भट्टराईले १८ महिना काम गरेनन् । नयाँ कार्यकारी निर्देशकले सात महिना गरेनन् ।’

निगमले सञ्चालनको अनुमति नदिँदा व्यवसायीहरू सुकुम्बासी भएको उनले गुनासो गरे । व्यवसायीका अनुसार २५ ट्यांकरमध्ये पहुँचको भरमा दुईवटा ट्यांकर निवार्ध सञ्चालन भइरहेका छन् । २३ वटा ट्यांकरको सञ्चालन अनुमति रोकेको उनीहरूको आरोप छ । ‘अधिकाश ट्यांकर दुई वर्षदेखि यत्तिकै थन्किएको अवस्था छ ।

प्रकाशित : श्रावण २०, २०७६ ०८:१०
ADVERTISEMENT
प्रतिक्रिया
पठाउनुहोस्
ADVERTISEMENT

रोकियो पाउडर दुधको उत्पादन

बिनु तिम्सिना

विराटनगर — विराटनगरको प्लान्टबाट पाउडर दूधको उत्पादन बन्द गरिएको छ । दुग्ध विकास संस्थान (डीडीसी) ले संकलन गर्दै आएको दूधको परिमाण घटेपछि उत्पादन बन्द गरिएको हो । विराटनगर दुग्ध वितरण आयोजनासँगै देशैभर दूध संकलनमा कमी आएको छ ।


पाउडर उत्पादनका लागि बुटवल र हेटौंडाबाट दूध ल्याउने गरिएको थियो । अहिले काठमाडौं र हेटौंडाको माग पूरा गर्न विराटनगरले कच्चा दूध नै त्यसतर्फ निर्यात गर्नुपरेको दुग्ध वितरण आयोजनाका प्रमुख नीलकण्ठ गौतमले बताए ।

सरकारले धूलो दूधको आयातमा प्रतिबन्ध लगाएपछि डेरी उद्योगहरूले डीडीसीले दिने मूल्यभन्दा बढीमा खरिद गर्दा डीडीसीको दूध संकलन घटेको गौतमले बताए । प्रदेश १ का झापा, सुनसरी र मोरङमा रहेका निजीसहित देशैभरिका डेरीहरूले बढी मूल्यमा दूध खरिद गरेपछि अघिल्लो वर्षको तुलनामा संकलन घटेको उनले बताए ।

‘अलिकति बढी मूल्य पाउँदा किसान अन्यत्र आकर्षित हुनु स्वाभाविक हो, त्यो आकर्षणले पनि दूध कलेक्सन घटेको छ,’ उनले भने, ‘अर्को कारण भनेको विगत वर्षमा पाउडर दूध आयात गर्न पाइन्थ्यो । आयातित पाउडर सस्तो पर्दा निजी डेरीहरूले त्यही पाउडर घोलेर दूध बेच्थे । अहिले पाउडर दूधको आयातमा प्रतिबन्ध लगाइएको छ । त्यसैले किसानको दूध तानातान हुँदा नीजी डेरीले ५ रुपैयाँसम्म बढी मूल्य दिएर खरिद गर्छन् ।’

आयोजनाका प्रमुख गौतमका अनुसार अहिले विराटनगर आयोजनाले दैनिक ३० हजार लिटर दूध संकलन गरिरहेको छ । संकलित दूध धनुषाको ढल्केवर, हेटौंडा र काठमाडौंगइरहेको छ ।

ढल्केवरमा दैनिक ६ हजार लिटर, हैटौंडामा दैनिक ७ हजार लिटर र काठमाडौंमा दैनिक ९ हजार लिटर दूध पठाउँदै आएको विराटनगर आयोजनाका प्रमुख गौतमले जानकारी दिए । असोज महिनासम्म दूधको अभाव हुने उनले बताए ।

दुग्ध विकास संस्थानसँग यतिबेला धुलो पाउडर दूधको मौज्दात पनि निकै कम छ । अघिल्लो वर्षको यसै अवधिमा ७ सय टन धुलो दूध मौज्दात रहेकामा अहिले मुस्किलले २ सय टन मात्र छ ।काठमाडौंको माग धान्न भदौ र असोजसम्म पाउडर घोल्नुपर्ने अवस्था देखिएको छ । खासगरी चैतदेखि भदौसम्म दूध उत्पादनका लागि प्रतिकूल समय मानिन्छ ।

प्रकाशित : श्रावण २०, २०७६ ०८:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT