सम्पदा पुनर्निर्माणमा २ अर्ब १२ करोड

पुनर्निर्माण सम्पन्न पुरातात्त्विक सम्पदामध्ये विश्व सम्पदामा सूचीकृत ९६ वटा छन् । पुनर्निर्माण सम्पन्न सम्पदामा हनुमानढोका दरबार क्षेत्रका गद्दी बैठक, नाट्येश्वर मन्दिर, कृष्ण मन्दिर, नगरा घर, प्रताप मल्लको सालिक पुनःस्थापना तथा तलेजु मन्दिर रहेका छन् । भक्तपुर दरबार क्षेत्रका खौमा गेट, सिद्धिलक्ष्मी मन्दिर, नारायण मन्दिर, शंकरनारायणलगायतको पुनर्निर्माण सम्पन्न भएको छ ।

प्राधिकरणका प्रमुख कार्यकारी अधिकृत सुशील ज्ञवालीले निजी आवास पुनर्निर्माणको कार्य धेरै अघि बढिसकेको हुँदा पुरातात्त्विक तथा सांस्कृतिक सम्पदाको पुनर्निर्माणलाई विशेष प्राथमिकता दिइएको बताए । पुरातत्त्व विभागका निमित्त महानिर्देशक दामोदर गौतमले चालु आर्थिक वर्षभित्र १५० सम्पदाको पुनर्निर्माण गरिनेछ ।

पुनर्निर्माण भइरहेका मुख्य सम्पदाहरूमा रानीपोखरी, धरहरा, वसन्तपुरस्थित काष्ठमण्डप तथा नौतले दरबार, रातो मछिन्द्रनाथको मन्दिर, नुवाकोटस्थित सात तले दरबारलगायत छन् । पुरातात्त्विक सम्पदाको पुनर्निर्माणमा नेपाल सरकारको स्रोतको अतिरिक्त विभिन्न राष्ट्रले पनि सहयोग गरेका छन् ।

भूकम्पबाट ८९१ वटा पुरातात्त्विक एवं सांस्कृतिक महत्त्वका सम्पदामा क्षति पुगेको थियो । तीमध्ये ७ सय ५३ वटा भूकम्पबाट अति प्रभावित १४ जिल्लाका छन् । त्यस्तै भूकम्प प्रभावित १७ जिल्लाका १ सय ३८ वटा सम्पदा रहेका छन् ।