इंग्ल्यान्डको उच्च स्कोर

एएफपी

कार्डिफ — बंगलादेशका कप्तान सकिब अल हसनको शतक पन्छाउँदै इंग्ल्यान्डले विश्वकप क्रिकेटमा शनिबार १ सय ६ रनको जित हात पारेको छ । सकिबले १ सय २१ रन बनाए पनि ३ सय ८७ रनको लक्ष्य पाएको बंग्लादेश ४८.५ ओभरभित्र २ सय ८० रनमैअलआउट भयो । 

सकिबले १ सय १९ बलको इनिङ्समा १२ चौका र १ छक्का प्रहार गरे । उनले विश्वकपमा पहिलो शतक बनाए । एकदिवसीय अन्तर्राष्ट्रियमा आफ्नो नवौं शतक बनाएका सकिबले इंग्ल्यान्डविरुद्ध भने पहिलो शतक ठोकेका हुन् ।

महमुदुल्लाह २८, मोसादेक हुसैन २६ र तमिम इकवाल १९ रनमा आउट भए । इंग्ल्यान्डका जोफ्रा आर्चरले ८.५ ओभरमा २ मेडन राख्दै २९ रन र बेन स्टोक्सले ६ ओभरमा १ मेडन राख्दै २३ खर्चेर ३–३ विकेट लिए । मार्क उडले २ तथा लिएम प्लुनकेट र अदिल रसिदले १–१ विकेट लिए । दाबेदार मानिएको इंग्ल्यान्डको तीन खेलमा यो दोस्रो जित हो । बंगलादेशले ३ खेल खेल्दा खेल जितेको छ भने २ खेल हारिसकेको छ ।

यसअघि ओपनर जेसन रोयले १ सय ५३ रनको उत्कृष्ट इनिङ्स खेलेपछि इंग्ल्यान्डले ६ विकेट गुमाई ३ सय ८६ रन बनायो । इंग्ल्यान्डले विश्वकपको सर्वाधिक योगफल कीर्तिमान पनि बनायो । इंग्ल्यान्ड सोमबार नटिङघममा पाकिस्तानविरुद्ध कीर्तिमानी ३ सय ४८ रनको लक्ष्य पछ्याउँदा १४ रनले पराजित भएको थियो । आयोजक इंग्ल्यान्डले यसअघि सन् २०११ को विश्वकपमा भारतविरुद्ध बनाएको ३३८–८ को उच्च योगफल सुधार गरेको हो ।

रोयले भारतका रोहित शर्मालाई प्रतिस्थापन गरी प्रतियोगितामा सर्वाधिक व्यक्तिगत स्कोर कायम गरे । रोहितले दक्षिण अफ्रिकाविरुद्ध १ सय २२ रन प्रहार गरेका थिए । आफ्नो इनिङ्समा इंग्ल्यान्डले १४ छक्का र २८ चौका प्रहार गरेको थियो । क्रिस वोक्सको १८ र लिएम प्लुनकेटको २७ रन बनाउँदै १७ बलमै ४५ रनको अविजित साझेदारी गरे ।

बंगलादेशका कप्तान मासरफी मोर्टजाले टस जितेर घाँसे पिचमा इंग्ल्यान्डलाई ब्याटिङमा पठाउने निर्णयमा रोय र जोनी बेरिस्टो (५१) ले पहिलो विकेटमा १ सय २८ रनको तीव्र साझेदारी गरे । पहिलो बलमै एलबीडब्लू धरापबाट रिभ्यू लिएर बचेका जस बटलरले ६४ रन बटुल्ने क्रममा ४ छक्का प्रहार गरे । त्यसमध्ये मोसादेक हुसेनको बलमा प्रहार गरेको एउटा स्ट्रेट प्रहार टफ नदीमा खसेको थियो ।

रोय र बेरिस्टो दुवैले प्रतियोगितामा स्पिनरविरुद्ध खेल्न असहज महसुस गरिरहेका थिए । त्यसैले बाँयाहाते स्पिनर सकिब अल हसनले बलिङ आक्रमणको सुरुआत गरेका थिए । उनले विकेटरहित १० ओभरमा ७१ रन खर्चिए । बंगलादेशका सबै बलरले दबाब महसुस गर्नुपरेको थियो ।

इंग्ल्यान्डका ब्याट्सम्यानले बंगलादेशको कमजोर फिल्डिङको पनि फाइदा उठाए । ४८ बलमा अर्धशतक प्रहार गरेलगत्तै बेरिस्टो आउट भए । बंगलादेशका कप्तान मोर्टजाले विश्वकपमा पहिलो विकेट लिने क्रममा मेहेदी हसनको हातबाट क्याचआउट गराए । उच्च लयमा रहेका रोयले ९२ बलमा विचित्र तरिकाले शतक पूरा गरे ।

९७ रनको स्कोर हुँदा उनी एक रन लिन दौडिएका थिए । त्यसबेला अम्पायर जोयल विल्सनसँग ठोक्किएर लड्न पुगे । उता मोहम्मद मिथुनले मिसफिल्ड गर्दा बलले बाउन्ड्री पार गर्‍यो । मेहेदीको बलमा लगातार तीन उत्कृष्ट छक्का प्रहार गरेपछि रोय अर्को बलमा मोर्टजाको हातबाट क्याचआउट भए ।

मेहेदीले ६७–२ माआफ्नो स्पेल पूरा गरे । रोयले १ सय २१ बल सामन गरी १४ चौका र ५ छक्का प्रहार गरे । विश्वकपमा सर्वाधिक व्यक्तिगत रन बनाउने उनी दोस्रो इंग्लिस खेलाडी बनेका छन् । यसअघि सन् २०११ मा भारतविरुद्ध एन्ड्रयु स्ट्राउसले १ सय ५८ रन प्रहार गरेका थिए ।

स्कोर कार्ड
इंग्ल्यान्ड
१०६ रनले विजयी

इंग्ल्यान्ड
५० ओभर ३८६/६
जेसन रोय–१५३
जोस बटलर–६४
जोनी बेरिस्टो–५१

मेहेदी हसन २/६७
मोहमद सैफुद्दिन २/७८

बंगलादेश
४८.५ ओभर २८०
सकिव अल हसन–१२१
मुस्फिकर रहिम–४४
महमुदुल्लाह–२८

जोफ्रा आर्चर–३/२९
बेन स्टोक्स–३/२३

प्रकाशित : जेष्ठ २६, २०७६ ०८:०४

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

धोनीको पन्जा काण्ड

एएफपी

लन्डन — विश्व क्रिकेटको नियमक निकाय अन्तर्राष्ट्रिय क्रिकेट परिषद् (आईसीसी) ले भारतका महेन्द्रसिंह धोनीलाई विश्वकपको विकेटकिपिङका क्रममा सैन्य प्रतीक चिन्ह भएको पन्जा प्रयोग गर्ने अनुमति नभएको जनाएको छ ।

बुधबार दक्षिण अफ्रिकाविरुद्धको जितका क्रममा धोनीले लगाएको हरियो रंगको पन्जामा विशेष लोगो प्रयोग भएको पाइएको थियो । आईसीसीले त्यसको विरोध गरेलगत्तै भारतीय क्रिकेट कन्ट्रोल बोर्ड (बीसीसीआई) धोनीले प्रतिरक्षामा उत्रिएको छ ।

धोनी भारतीय सेनाको प्यारासुट रेजिमेन्टका मानार्थ लेफ्टिनेन्ट कर्नेल हुन् । बीसीसीआईले आईसीसीलाई पत्र लेखेर धोनीलाई उक्त पन्जा प्रयोग गर्न दिन अनुमति मागेको थियो । तर आईसीसीले विज्ञप्ति जारी गर्दै भनेको छ, ‘पछिल्लो खेलमा धोनीले लगाएको विशेष लोगोसहितको विकेटकिपिङ पन्जा पुनः प्रयोगका लागि अनुमति छैन ।’

‘आईसीसीद्वारा आयोजित प्रतियोगिताका नियमअनुसार कुनै पनि व्यक्तिगत सन्देश वा लोगोलाई कुनै जर्सी वा अन्य उपकरणमा प्रयोग गर्ने अनुमति छैन,’ विज्ञप्तिमा भनिएको छ,‘विकेटकिपरको पन्जामा कुनै लोगो प्रयोग गर्न अनुमति दिँदा सम्बन्धित नियमको उल्लंघन हुनेछ ।’ विश्वकपका लागि आईसीसीको नियमअनुसार जर्सी वा अन्य सामानमा मात्र दुई निर्माता कम्पाीको पहिचान उल्लेख गर्न छुट छ । यसबाहेक पन्जामा कुनै प्रकारको राजनीतिक वा जातीय अर्थ दिने प्रस्तुति हुनुहुन्न ।

भारतीय सञ्चारमाध्यम र सामाजिक सन्जालमा अहिले यस प्रकरणले व्यापक चर्चा पाएको छ । जहाँ धोनीको पक्ष लिइएको छ । बीसीसीआईले आईसीसीलाई एक औपचारिक आग्रहसहितको जवाफ दिँदै धोनीले प्रयोग गरेको लोगोको प्रतिरक्षा गरेको छ । ‘यो लोगो अर्धसैनिक दस्ताको भएका कारण धोनीले आईसीसीको कुनै नियम उल्लंघन गरेका छैनन्,’ बीसीसीआईले जवाफमा भनेको छ ।

भारतका खेलमन्त्री किरेन रिजिजुले ‘खेलकुद निकाय’ को विवादलाई सरकारले हस्तक्षेप नगर्ने प्रस्ट पारेका छन् । ‘तर यो मुद्दा हाम्रो देशको भावनासँग जोडिएको छ र यस्तोमा राष्ट्रिय हित ध्यानमा राख्नुपर्छ । म बीसीसीआईलाई यस विषयमा उचित कदम लिन आग्रह गर्छु,’ उनलेट्वीट गरेका छन् । यस विषयमा भारतीय टिमबाट अहिलेसम्म औपचारिक टिप्पणी आएको छैन ।

बाँकी खेलमा पनि धोनीले यही पन्जाको प्रयोग गर्ने सम्भावना छ तर लोगोलाई टेपले छोपिने छ । मार्चमा अस्ट्रेलियाविरुद्धको एकदिवसीय खेलका क्रममा भारतीय टोलीले धोनीद्वारा वितरित मिलिटरी टोपी लगाएको थियो । जुन काश्मिर हमलामा मारिएका ४० सैनिकप्रति श्रद्धान्जलीको रूपमा थियो ।

प्रकाशित : जेष्ठ २६, २०७६ ०८:००
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT