अमिरको प्रदर्शन कोसेढुंगा हुन सक्ने

एएफपी

टाउन्टन — पाकिस्तानले विश्वकपमा बुधबार अस्ट्रेलियाको सामना गर्दै छ । त्यसमा मोहम्मद अमिरको उद्देश्य अर्को कोसेढुंगा प्रदर्शनको हुनेछ । अमिरले समरसेट काउन्टीको मैदानमा तीन वर्षअगाडि प्रथम श्रेणी क्रिकेटमा पुनरागमन गरेका थिए । 

सन् २०१० को लर्ड्सकाण्डपछि अमिरको खेलजीवनमा ठूलो झट्का लागेको थियो । जति बेला उनलाई विश्व क्रिकेटकै उदीयमान खेलाडी मानिएको थियो । लर्ड्स टेस्टमा उनले आफ्नो प्रारम्भिक बलिङ पार्टनर मोहम्मद आसिफसँग मिलेर जानाजान नो–बल गरेका थिए ।
पत्रिकाले गरेको स्टिङ अपरेसनका क्रममा पाकिस्तानी कप्तान सलमान बट पनि त्यसमा मुछिए ।

स्पट फिक्सिङकै कारण तीनै खेलाडीमाथि ५ वर्षको प्रतिबन्ध लागेको थियो । उनीहरूले केही समय जेलमा पनि बिताए । त्यही सन् २०१० को वर्षमा अमिरले स्वीङ बलिङको उत्कृष्ट नमुना पेस गर्दै अस्ट्रेलियाविरुद्ध तटस्थ भूमिका रूपमा हेडिङ्लेमा भएको टेस्टमा २० रन खर्चेर ३ विकेट लिए र अस्ट्रेलिया ८८ रनमा पहिलो दिनमै अलआउट भएको थियो ।

सन् २०१६ मा अमिरले फेरि खेल्न सुरु गरे । उनको बलिङ कला भने ज्युँदै थियो । टाउन्टनमा भएको प्रथम श्रेणी क्रिकेटमा अमिरले समरसेटविरुद्ध ३६ रनमा ३ विकेट लिए । अमिरले लिएका ती विकेटमध्येएक इंग्ल्यान्डका तत्कालीन प्रारम्भिक ब्याट्सम्यान मार्कस ट्रेस्कोथिकविरुद्ध थियो । त्यस क्रममा बलले अन्त्यतिर स्वीङ लिएको थियो । पछिल्लो समय अमिरका लागि खेल सजिलो भने रहेको छैन । उनले विश्वकप अगाडिका १४ एकदिवसीयमा मात्र ५ विकेट मात्र लिएका छन् ।

उनले इंग्ल्यान्डविरुद्ध वर्षाले प्रभावित खेलमा बलिङ अवसर पाएनन् भने बिरामीकै कारण इंग्ल्यान्डविरुद्धको एकदिवसीय शृंखला पनि गुमाएका थिए । सुरुमा विश्वकपमा सहभागी हुने पाकिस्तानी टिममा नरहेका २७ वर्षीय अमिरलाई पछि अन्तिम १५ सदस्यीय टिममा भने राखिएको थियो । वेस्ट इन्डिजविरुद्ध १ सय ५ रनमा अलआउट भएको खेलमा पाकिस्तानका लागि केही राम्रो खेल्ने एकमात्र खेलाडी अमिर नै थिए । उनले त्यस खेलमा २६ रनमा ३ विकेट लिए । तर पाकिस्तान ७ विकेटले पराजित रह्यो ।

अस्ट्रेलियाविरुद्ध पाकिस्तानको प्रदर्शन भने कमजोर छ । पाकिस्तानले पाँचपल्टको विश्वकप विजेताविरुद्धका पछिल्ला १४ खेलमध्ये एउटामै मात्र जित निकालेको छ । सन् २०१७ को जनवरीमा भएको त्यस खेलमा मोहम्मद हफिजले ७२ रन बनाएका थिए ।

इंग्ल्यान्डविरुद्ध प्राप्त जितमा ८ विकेट गुमाएर ३ सय ४८ रन बनाउँदा पनि हफिजले ८४ रनको योगदान दिएका थिए । ‘पक्कै पनि हामीले अस्ट्रेलियामाथि धेरै जित निकालेका थिएनौं, इंग्ल्यान्डविरुद्ध पनि यस्तै थियो तर हामी विजयी रह्यौ,’ कप्तान सरफराज अहमदले भने ।

डिफेन्डिङ च्याम्पियन अस्ट्रेलियाका लागि भने प्रारम्भिक ब्याट्सम्यान डेविड वार्नरको लय निर्णायक हुनेछ । वार्नरले यसपल्टको विश्वकपमा दुई अर्धशतक बनाइसकेका छन् । भारतविरुद्ध उनले ८४ बलमा ५६ रनबनाएका थिए, तर त्यसमा निकै सुस्त देखिए ।

उनको बचाउ गर्दै कप्तान आरोन फिन्चले भनेका छन्, ‘उनी आक्रामक सुरुआत लिन सक्षम छन् ।’ वार्नरसँगै अन्तर्राष्ट्रिय क्रिकेटमा फर्केका स्टिभ स्मिथको प्रदर्शन पनि उत्तिकै निर्णायक हुन सक्नेछ ।

प्रकाशित : जेष्ठ २९, २०७६ ०९:१२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अस्ट्रेलियालाई हारले फरक नपार्ने

एएफपी

लन्डन — विश्वकप उपाधि रक्षा गर्ने अभियानमा रहेको अस्ट्रेलियाले भारतविरुद्ध हार बेहारे पनि त्यसले ठूलो असर नपार्ने पूर्व कप्तान स्टिभ वाले बताएका छन् । यसपल्टको विश्वकपमा पहिलो हारका रूपमा अस्ट्रेलिया ओभलमा भएको खेलमा ३६ रनले पराजित रहेको थियो ।

सुरुमा आरोन फिन्चको बलिङ आक्रमण भारतको ब्याटिङसामु कमजोर देखियो भने लक्ष्य पछ्याउने क्रममा पनि अस्ट्रेलियाको प्रदर्शन सुस्त देखिएको थियो ।

केही आलोचकले अस्ट्रेलियाले विश्वकपअगाडि पर्याप्त गृहकार्य नगरेको आरोप लगाएका छन् । तर दुई पल्ट विश्वकप जितेको अनुभव भएका वाले आफ्नो टिममाथि पूरा विश्वास रहेको र १० टिमसम्मिलित प्रतियोगिताको सेमिफाइनलसम्म पुग्दा टिममा लयमा आउने दाबी गरे । उनले भने, ‘सेमिफाइनलसम्म पुग्दा टिमले लय समात्ने छ । बलिङ र ब्याटिङ दुवै ठीक स्थानमा आउने छ । अहिले यो विश्वकपमा सबैको सम्भावना उत्तिकै छ । सम्भवतः ६ टिमले विश्वकप उपाधि जित्ने सपना देख्न सक्छन् ।’

भारतविरुद्धको हारमा अस्ट्रेलियाका लागि केही आक्रामक र सुदृढ प्रदर्शन गर्नेमा ग्लेन म्याक्सवेल मात्र रहेका छन् । उनले १४ बलको इनिङ्समा २८ रन बनाए र यसक्रम ५ चौका प्रहार गरे । लामो प्रहार गर्ने क्रममा उनी पनि आउट भए । उनलाई छाडेर अरूले राम्रो गर्न सकेनन् र खेलको अन्त्यतिर जितका लागि अस्ट्रेलियालाई प्रतिओभर ११ भन्दा बढी रन बनाउन आवश्यक थियो । म्याक्सवेलले पनि टिमले चाँडै लय समात्ने विश्वास पोखे ।

अहिलेसम्म राम्रो खेलिरहेका भारत र इंग्ल्यान्ड बराबरको प्रदर्शन गर्न अस्ट्रेलियाली टिमले झिनो परिवर्तन गरे पर्याप्त हुने उनको विचार थियो । उनले भने, ‘मेरो विचारमा केही साना तथ्य छाडेर टिममा ठूलै परिवर्तन गर्नुपर्ने कुनै आवश्यकता छैन । भाग्यले केही हदसम्म साथ दियो भने हाम्रो खेल फेरि उत्तिकै राम्रो हुनेछ । कुनै एक खास खेलमा टिमको प्रदर्शन राम्रो हुन नसक्नु स्वाभाविक हो । हामी चाँडै पुरानै लयमा फर्कने छौं ।’

प्रकाशित : जेष्ठ २९, २०७६ ०९:०२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT