बंगलादेश र वेस्ट इन्डिजको महत्त्वपूर्ण खेल

एजेन्सी

टाउनटन — बंगलादेश र वेस्ट इन्डिज दुवै टिमले यस विश्वकपमा सानदार सुरुआत गरेका थिए । उनीहरूले त्यस सफलतालाई निरन्तरता दिन असफल रहे । 


आक्रामक बलिङकै कारण वेस्ट इन्डिजले विश्वकपमा फाइदा उठाइरहेको छ । उसका ब्याट्सम्यानहरूको खराब सट छनोटको मूल्य समग्र टिमले चुकाउनुपरेको छ । शुक्रबार इंग्ल्यान्डविरुद्धको खेलमा ३० ओभरसम्म वेस्ट इन्डिज १४४/३ को स्थितिमा थियो । उनीहरू ४५ औं ओभरमा २ सय १२ रनमै अलआउट भए ।

मुख्य २ खेलाडी एन्ड्रयु रसेल र सेल्डन कोट्रेल घाइते हुनु वेस्ट इन्डिजका लागि ठूलो झडका हो । शुक्रबार मैदान छाड्नुअघि यी दुईले ५ ओभर मात्र बलिङ गरेका थिए ।

यस विश्वकपमा बंगलादेशको अहिलेसम्मको सफलता तेस्रो नम्बरमा ब्याटिङ गरिरहेका सकिव अल हसनको प्रदर्शनकै वरिपरि घुमिरहेको छ । कार्डिफमा इंग्ल्यान्डविरुद्ध दबाबमा देखिएका बंगलादेशी बलरहरू पर्याप्त विकेटको अवसरबाट वञ्चित रहे । इंग्ल्यान्डले त्यस खेलमा ५० ओभरमा ३ सय ८६ रन जोडेको थियो, जुन विश्वकप इतिहासकै सर्वाधिक योगफल हो ।

माश्रफी मोर्तजाले शक्तिशाली वेस्ट इन्डिजविरुद्धको खेलमा टिमबाट अधिक सुधारिएको प्रदर्शनको अपेक्षा गरेका छन् । त्यसका लागि उनी आफैंले प्रयासको नेतृत्व गर्नुपर्नेछ ।

टाउनटनको अवस्था हेर्दा खेल वेस्ट इन्डिजको पक्षमा जाने अनुमान गर्न सकिन्छ । जेसन होल्डर नेतृत्वको टिमविरुद्धको पछिल्लो सफलताले बंगलादेशलाई आत्मविश्वास कायम राख्ने अवसर हुनेछ । दुवै टिमको अहिलेसम्म ४ खेलबाट ३ अंकछ । १० टोली सम्मिलित विश्वकपको राउन्ड रोविन प्रतिस्पर्धाको सेमिफाइनलमा स्थान बनाउनका लागि दुवैलाई जित आवश्यक छ ।

टाउनटनमा सोमबार बिहानीपख घाम लाग्ने र मध्याह्नपछि बदलीको पूर्वानुमान गरिएको छ । सानो मैदान भएकाले ठूलो स्कोरको खेल हुने अनुमान गरिएको छ ।

प्रकाशित : असार २, २०७६ ०७:४३

प्रतिक्रिया
पठाउनुहोस्

भारतको ७ मा ७

एएफपी

म्यानचेस्टर — रोहित शर्माको शतकमा भारतले विश्वकप क्रिकेटमा चिरप्रतिद्वन्द्वी पाकिस्तानलाई डकवर्थ लुइस पद्धतिमा ८९ रनले पराजित गरेको छ । विश्वकपमा भारतले पाकिस्तानमाथि सात खेल खेलेकोमा सबैमा विजय हात पारेको छ । यस विजयपछि भारत अंकतालिकाको तेस्रो स्थानमा उक्लेको छ । 

भारतका रोहित शर्मा पाकिस्तानसँग स्टोक प्रहार गर्दै ।तस्बिर : एपी

शर्माले तीन इनिङ्समा आफ्नो दोस्रो शतक बनाउने क्रममा १ सय ४० रन जोडेपछि टस हारेर ब्याटिङमा आएको भारतले ओल्ड ट्राफोर्डमा ३३६–५ को स्कोर बनायो । पाकिस्तानले ३५ ओभरमा ६ विकेट गुमाई १ सय ६६ रन बनाएको समयमा खेल वर्षाले बिथोलिन पुग्यो । त्यसपछि ४० ओभरमा झारिएको खेलमा पाकिस्तानलाई ३ सय २ रनको लक्ष्य दिइयो । पाकिस्तानले बाँकी ५ ओभरमा १ सय ३६ रन बनाउनुपर्ने भयो । पूरा ४० ओभर खेलेको पाकिस्तानले ६ विकेट गुमाई २ सय १२ रनमात्र बनाउन सक्यो ।
इमाद वासिम ३९ बलमा ४६ र सदाब खान १४ बलमा २० रन बनाई अविजित रहे । ओपनर इमाम उल हक ७ रनमै आउट भएका थिए । फखर जमानले ६२ र बाबर आजमले ४८ रन बनाउँदा पाकिस्तानको केही आशा देखिएको थियो । कुलदीप यादवले दुवैलाई आउट गरे । कुलदीपसँगै विजय शंकर र हार्दिक पाण्ड्याले २–२ विकेट लिए ।

यसअघि १ सय १३ बल खेलेका भारतका ओपनर शर्माले १४ चौका र ३ छक्का प्रहार गरे । शर्माले केएल राहुल (५७) सँग पहिलो विकेटमा १ सय ३६ रन जोडेका थिए । ७८ बल खेलेका राहुलले ३ चौका र २ छक्का प्रहार गरे ।

शर्मालाई कप्तान विराट कोहलीले ७७ रन बनाउँदै राम्रो साथ दिए । आफ्नो इनिङ्सका क्रममा कोहली एकदिवसीय अन्तर्राष्ट्रियमा सबैभन्दा चाँडो ११ हजार रन बनाउने खेलाडी बने । कोहलीले २ सय २२ इनिङ्समा यो उपलब्धि पूरा गर्दै आफ्नै देशका सचिन तेन्दुलकरले २ सय ७६ इनिङ्समा ११ हजार रन बनाएको कीर्तिमानलाई उछिनेका हुन् ।

पाण्ड्याले १९ बलमा २६ रन बनाए । पाकिस्तानको मोहम्मद आमिरले ४७ रन खर्चेर ३ विकेट लिए । उनलाई पिचमा दौडिएको कारण दुई पटक चेतावनी दिइएको थियो ।

स्कोर कार्ड
भारत डकवर्थ लुइस पद्धतिमा ८९ रनले विजयी

भारत
५० ओभर ३३६/५
रोहित शर्मा–१४०
विराट कोहली–७७
केएल राहुल–५७

मोहम्मद अमिर–३/४७
वाहब रियाज–१/७१


पाकिस्तान
४० ओभर २१२/६
फखर जमान–६२
बाबर आजम–४८

विजय शंकर–२/२२
कुलदिप यादव–२/३२
हार्दिक पाण्ड्या–२/४४

प्रकाशित : असार २, २०७६ ०७:४३
पूरा पढ्नुहोस्
प्रतिक्रिया
पठाउनुहोस्