कुलदीपको त्यो बल

एएफपी

म्यान्चेस्टर — भारतीय बलर कुलदीप यादवले विश्वकपमा पाकिस्तानका ब्याट्सम्यान बाबर आजमको विकेट लिँदा उनले बल अविश्वसनीय रूपमा घुमाउन सफल रहे । यो हरेक स्पिनरको ‘सपना’ हो र आफ्नो प्रयास सफल भएकोमा उनी दंग छन् ।

बायाँ हाते लेग स्पिनर (चाइनाम्यान बलर) यादवको ३२ रन खर्चेर २ विकेटको उत्कृष्ट प्रदर्शनकै सहयोगमा भारतले पाकिस्तानविरुद्ध आइतबार डकवर्थ लुइस नियमका आधारमा पाकिस्तानलाई ८९ रनले हराउन सफल रह्यो । ४८ रनको स्कोरमा खेलिरहेका अजामलाई यादवले ब्याट र प्याडको बीचबाट बल छिराएर बोल्ड गरेका थिए । उनले अजाम र फकर जमानको १ सय ४ रनको दोस्रो विकेट साझेदारी पनि तोडेका थिए । फकरले पाकिस्तानका लागि सर्वाधिक ६२ रन प्रहार गरे ।

‘बाबरलाई आउट गर्दाको बल यस प्रतियोगितामै मेरो सबैभन्दा उत्कृष्ट थियो । यसअघि एसिया कपमा पनि मैले नै उनलाई आउट गरेको थिएँ,’ कुलदीपले भने, ‘पानी परेर खेल रोकिएपछि मैले आफ्नै त्यस बललाई हेरेँ । त्यो बल वास्तवमै उल्लेख्य टर्न भइरहेको थियो र सबै स्पिनरले यस्तै बल फाल्न मन पराउँछन् ।’ ‘यो एउटा सपनामा सोच्ने खालको बल डेलिभरि, उत्कृष्ट टेस्ट बलिङ हो । ब्याट्सम्यानलाई गल्ती गर्न बाध्य बनाउने, उत्कृष्ट बल,’ उनले हाँस्दै भने । आफ्नो अर्को ओभरमा कुलदीपले बायाँ हाते फकर जमानलाई पनि फाइन लेग क्षेत्रमा क्याच आउट गराए ।

विजय शंकर र हार्दिक पाण्ड्याले पनि २–२ विकेट लिए । वर्षाका कारण ४० ओभरमा झारिएको खेलमा ३ सय २ रनको लक्ष्य पछ्याएको पाकिस्तानले ६ विकेट गुमाएर २ सय १२ रनमात्र जोड्न सक्यो ।

‘बाबर र फकर दुवैले स्पिनरविरुद्ध उत्कृष्ट खेलिरहेका थिए । उनीहरूले आक्रामक ब्याटिङका साथ स्ट्राइक पनि परिवर्तन गरिरहेका थिए । त्यसैले उनीहरूको साझेदारी तोड्नु नै सबैभन्दा महत्त्वपूर्ण थियो,’ कुलदीपले भने, ‘बाबरको विकेट झरेपछि अर्को ओभरमा अर्को विकेट गुम्यो । डकवर्थ लुइस नियमअनुसारको स्कोरमा उनीहरू धेरै पछि परिसकेका थिए र हरेक नयाँ ब्याट्सम्यानलाई दबाब थपिँदो थियो, हाम्रा लागि चाहिँ त्यसले फाइदा भइरहेको थियो ।’

टवान्टी–२० फर्म्याटको इन्डियन प्रिमियर लिग (आईपीएल) मा कममजोर प्रदर्शनका कारण क्रिकेट पण्डितहरूले विश्वकपमा कुलदीपको उपस्थितिमा सन्देह गरिरहेका थिए । तर, २४ वर्षीय यी स्पिनरले दक्षिण अफ्रिकाविरुद्ध १–४६ र पाकिस्तानविरुद्ध निर्णायक प्रदर्शन गरे । ‘हरेकले मेरो लयको बारेमा कुरा गरिरहेका छन् ।

मलाई लाग्दैन कि मैले आफ्नो लय गुमाइरहेको छु । मैले विकेट लिन सकिन भने लयको कुरा गर्नु ठीकै होला तर पछिल्लो २ खेलमा मैले उत्कृष्ट बलिङ गरिरहेको छु,’ कुलदीपले भने, ‘अस्ट्रेलियाविरुद्धको खेलमा उनीहरू मेरो बलमा संघर्ष गरिरहेका थिए र जुनसुकै स्पिनरका लागि पनि यस्तो हुनु ठूलो सफलता हो ।’

भारतका उपकप्तान रोहित शर्माले १ सय १३ बलमा १ सय ४० रनको इनिङ्स खेलेपछि भारतले ५० ओभरमा ३ सय ३६ रनको स्कोर खडा गरेको थियो । शर्माले पाकिस्तानको इनिङ्समा कुलदीपकै निर्णायक प्रदर्शन भन्दै उनको तारिफ गरे ।

‘उनी हाम्रो टिमको खेल जिताउने बलर हुन् र आजै पनि तपाईंले हेर्नुभयो भने उनले कठिन समयमा महत्त्वपूर्ण विकेट लिएका छन्,’ शर्माले भने, ‘दुवै ब्याट्सम्यान सेट भइसकेका थिए । निश्चित रूपमा प्रतियोगितामा कुलदीपको सुरुआत त्यस्तो भएन जस्तो उनले सोचेका थिए । समूह चरणका बाँकी खेलहरूका लागि उनको आत्मविश्वास माथि आएको छ ।’

सन् २०१७ मा डेब्यु गरेयता कुलदीपले भारतका लागि ४७ एकदिवसीय खेलमा ९० विकेट लिइसकेका छन् ।

प्रकाशित : असार ३, २०७६ ०८:०६

प्रतिक्रिया
पठाउनुहोस्

उरुग्वेको सजिलो जित

एएफपी

बेलो होरिजोन्टे — लुइस स्वारेज र एडिसन कभानीले गोल गरेपछि उरुग्वेले कोपा अमेरिकाको समूह ‘सी’ को पहिलो खेलमा आइतबार १० खेलाडीमा सीमित इक्वेडरलाई सजिलै ४–० ले हराएको छ । निकोलस लोडेइरोले छैटौं मिनेटमा गोलको खाता खोले । त्यसैक्रममा जेसो क्वन्टेरो कार्ड खाँदै मैदान छाड्न बाध्य रहे । एक खेलाडी बढी भएको फाइदा लिँदै उरुग्वेले खेलमा पूर्णतः हाबी रह्यो । 

पहिलो हाफ अगाडि नै कभानी र स्वारेजले गोल थपे । खेल सकिन १२ मिनेट अगाडि आरटुरो मिनाले आत्मघाती गोल गरे । ‘पहिलो हाफमा हामीले केही राम्रा मौका सिर्जना गर्न सक्यौं र त्यसको फाइदा पनि लियौं ।

यसै कारणले खेल पनि हाम्रो नियन्त्रणमा रह्यो । प्रतियोगितामा हाम्रा लागि यो सुखद सुरुआत हो,’ कभानीले भने । चौथो कोपा अमेरिकामा सहभागी भइरहेका कभानीको यो प्रतियोगितामै पहिलो गोल हो । उनले इक्वेडर निकै कडा प्रतिद्वन्द्वी रहेको र उसमाथि प्राप्त जितले टिमलाई धेरै आत्मविश्वास दिएको दाबी गरे ।

यो जितले डिफेन्डिङ च्याम्पियन चिली सम्मिलित समूहमा उरुग्वेलाई धेरै राहत पनि प्राप्त भएको छ । इक्वडेरका कोलम्बियाली प्रशिक्षक हर्ननन डारियो गोमेजले आफ्नो टिम अभाग्यशाली रहेको आशय पोखे । उनले भने, ‘स्कोर हाम्रो पक्षमा नरहे पनि हाम्रो टिम त्यति धेरै खराब पनि होइन । पहिलो हाफमा हामीले राम्रो खेल्न सकेनौं र त्यसकैनतिजा हामी पराजित पनि रह्यौं ।’ दोस्रो हाफमा इक्वेडरले शारीरिक बलले खेलिने खेलमा बढी जोड दिएको थियो ।

कतारको बराबरी
बोउलेमा खोउखीले खेल सकिन १३ मिनेट अगाडि गरेको गोलको मदतले एसियाली च्याम्पियन कतारले कोपा अमेरिकामा आइतबार दुई गोलले पछाडि रहेको स्थिति उल्टाएर पाराग्वेलाई २–२ को बराबरीमा रोकेको छ । रियो डे जेनेरियोमा भएको खेलमा पाराग्वेले सुरुमा ओस्कार कारडोजोले पेनाल्टीबाट गरेको गोल मदतले अग्रता लिएको थियो । त्यसयता डरलिस जोन्लाजेले सुन्दर गोल गर्दै आफ्नो टिमलाई दुई गोलको अग्रता दिलाए ।

समूह बीमा प्राप्त एक अंकमा खुसी हुँदै कतारका स्पेनी प्रशिक्षक फेलिक्स सान्चेजले भने, ‘हाम्रा लागि यो सम्मानजनक स्कोर हो ।’ उनले आआफ्ना खेलाडीको प्रशंसा गर्दै उनीहरू टिममा रहेको मजबुतता देखाएको दाबी गरे । यस समूहको दोस्रो खेलपछि कोलम्बिया तीन अंकमा शीर्ष स्थानमा छ भने त्यसयता पाहुना टिम कतार र पाराग्वे छन् । एक चरणको खेल समाप्तिमा लियोनल मेसीको अर्जेन्टिना चार टिममध्ये पुछारमा रहेको छ ।

प्रकाशित : असार ३, २०७६ ०८:०५
पूरा पढ्नुहोस्
प्रतिक्रिया
पठाउनुहोस्