भारतसँग हार्दा मनोवैज्ञानिक विचलन

रोयटर्स

लन्डन — पाकिस्तानका कप्तान सरफराज अहमदले विश्वकपको पछिल्लो खेलमा चिरप्रतिद्वन्द्वी भारतसँग बेहोरेको लज्जास्पद हारले टिमको मनोबल कमजोर भएको स्विकारेका छन् । 

गत साता ८९ रनको जितसाथ भारतले विश्वकपमा पाकिस्तानविरुद्धको अपराजित यात्रा कायम राखेको थियो । तर सरफराजले आफ्ना खेलाडीले उत्कृष्ट प्रदर्शन गरिरहेको दाबी गरे । कप्तानी हैसियतमा आफूले दबाब झेलेको उनको भनाइ छ ।

हारको साथ देशको अपेक्षामा खरो उत्रन नसकेको आरोप लगाउँदै पाकिस्तान क्रिकेट बोर्ड (पीसीबी) ले तीन वर्षमा टिमको प्रदर्शनबारे ‘निर्मम समीक्षा’ गर्ने घोषणा गरेको छ । ‘यदि तपाईले भारतविरुद्धको विश्वकप खेल हार्नु हुन्छ भने मनोवैज्ञानिक रूपमा कप्तानमाथि दबाब थोपरिन्छ,’ दक्षिण अफ्रिकाविरुद्ध लर्ड्समा हुने खेलको अघिल्लो दिन सरफराजले पत्रकारसँग भने, ‘तर हामी ठीक छौं, हामीले आफैंलाई सम्हालिरहेका छौं । आइतबार उत्कृष्ट पुनरागमन जितको आस गरेका छौं । दक्षिण अफ्रिकासँगको खेल निकै कठिन हुनेछ तर पछिल्लो खेलपछि २ दिन हामीले सबै खेलाडीलाई आराम दियौं । कडा मिहिनेत गरिरहेका छौं र मनोबल उच्च बनाएर खेल्दै छौं ।’

पाकिस्तान ५ खेलमा १ जितसाथ १० टोलीसम्मिलित विश्वकपको राउन्ड रोबिन लिग चरणमा पुछारबाट दोस्रो स्थानमा छ ।

प्रतिद्वन्द्वी दक्षिण अफ्रिका पनि जारी विश्वकपमा राम्रो खेल्न सकिरहेको छैन । फाफ डु प्लेसिस नेतृत्वको दक्षिण अफ्रिकासँग पनि ३ अंक नै छ । टोली अंकतालिकामा पाकिस्तानभन्दाएक स्थान माथि छ । उसले इंग्ल्यान्ड,
बंगलादेश, भारत र न्युजिल्यान्डसँग हार बेहोरेको थियो भने अफगानिस्तानमाथि जित पाएको थियो । वेस्ट इन्डिजसँगको खेल वर्षाका कारण रद्द भएको थियो ।

शुक्रबार श्रीलंकाले इंग्ल्यान्डमाथि रचेको २० रनको जितबाट पाकिस्तानले प्रेरणा लिनेछ । किनभने त्यस खेलले विश्वकपको सेमिफाइनल सम्भावना अन्य टिमका लागि पनि खोलिदिएको थियो । ‘प्रतियोगिता अझै पनि सबैका लागि खुला छ, हामीलाई पनि अवसर छ । हामी एकपछि अर्को खेलमा केन्द्रित हुनेछौं र दक्षिण अफ्रिकाविरुद्ध जितको आस गर्छौं,’ सरफराजले भने ।

प्रकाशित : असार ८, २०७६ ०८:२१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

टाइम्स र पुलिस च्याम्पियन

कुशल तिमल्सिना

काठमाडौँ — करिब दुई महिना चलेको नेपाल बास्केटबल लिगको उपाधि टाइम्स क्लब र नेपाल पुलिस क्लबले जितेका छन् । शनिबार पुरुषतर्फ फाइनलमा टाइम्सले त्रिभुवन आर्मी क्लबलाई ८८–७१ स्कोरले पराजित गर्दा कप्तान सदीश प्रधान र श्रीलंकाली स्टार प्रनीत उदुमालागालाले ६० स्कोर गरे ।

अनुषा मल्लको प्रभावशाली भूमिकामा पुलिसले महिला फाइनलमा समृद्धि गोरिल्लाजलाई ६५–५२ ले हरायो ।

टाइम्सले पहिलो क्वालिफायरमा आर्मीसँग २–१ को पराजय बेहोरेको थियो । उपाधि भिन्डतको पहिलो क्वाटरमै १९–१२ को अग्रतासाथ टाइम्सले लय समातेको थियो । त्यसमा प्रनीत एक्लैले ९ स्कोर गरे । लगातार २ अंक जोडेर विनोद महर्जनले पहिलो क्वाटरको ४ मिनेट बाँकी छँदा आर्मीलाई १२–१० को अग्रता दिलाए । प्रनीतले लगातार ३ अंक र विजय बुर्जाले २ अंक जोडेपछि ५३ सेकेन्डको समय बाँकी छँदा टाइम्सले ७ अंकको अग्रता बनाइसकेको थियो ।

प्रनीतले दोस्रो क्वाटरमा पनि ११ अंक थपे । उनले २ अंक र फ्री थ्रोका साथ टाइम्सलाई १३ अंकको अग्रता दिलाए । त्यसपछि सदीशले २ फ्री थ्रो प्रहार गरे । आर्मीका विनोदले एक फ्री थ्रो सदुपयोग गर्न सकेनन् । अनिश दिवाकरले २ अंक जोडेपछि टाइम्सले दोस्रो क्वाटरमा १६ अंकको अग्रता बनाउँदै ४०–२४ मा पुर्‍यायो ।

तेस्रो क्वाटरको सुरुआतमा कप्तान सदीशले एक थ्री प्वाइन्टरसाथ अग्रता २१ अंकमा पुर्‍याए । त्यसयता आर्मीले खेलमा फर्कन कठिन संघर्ष गरेको थियो । खेलभर १५ स्कोर गरेका आर्मीका अजय कुशवाहाले दुई फ्री थ्रो सदुपयोग गरे । तीन मिनेट बाँकी हुँदा आर्मीले ५१–३९ सहित अन्तर कम गर्ने प्रयास गरेको थियो ।

खेलभर टाइम्सले कुनै समयमा पनि दबाब सामना गर्नुपरेन । तेस्रो क्वाटरमा आर्मीले २६ र टाइम्सले २७ स्कोर गरेका थिए । १७ स्कोरको अग्रतासाथ अन्तिम क्वाटर सुरु गरेका दुवैले थप २१–२१ स्कोर गरे । अन्तिम क्वाटरमा टाइम्सका कप्तान सदीशले तीन थ्री प्वाइन्टरसाथ ११ स्कोर जोडेका थिए ।

प्रतियोगिताको लगातार दोस्रो संस्करणमा मोस्ट भ्यालुएबल प्लेयर भएका सदीशले टिमको जित स्वाभाविक भएको बताए । ‘हामी विश्वस्त थियौं किनभने हामीसँग एउटा उत्कृष्ट टिम थियो । सबैले भन्ने भन्ने गर्छन्, प्रनीतले हाम्रो टिमलाई निकै बलियो बनाए तर उनलाई समायोजन गर्न हामीले धेरै मिहिनेत र त्याग गरेका छौं ।

उनले धेरै राम्रो प्रदर्शन गरे र जितमा निर्णायक भूमिका निभाए,’ फाइनलमा ७ थ्री प्वाइन्टर प्रहार गरेका राष्ट्रिय टोलीका कप्तान रहेका सदीशले भने, ‘उनलाई समायोजन गर्न धेरै क्षमतावान खेलाडीले वलिदान दिनुपरेको छ । हामीसँग यस्ता थुप्रै उत्कृष्ट खेलाडी थिए, जसले अधिकांश समय बेन्चमा बिताउनुपर्‍यो । ६–८ महिनादेखि सँगै खेलिरहे पनि उनीहरूले धेरै अवसर पाएनन् । मलाई लाग्दैन उनीहरूको योगदानबिना यो सम्भव भएको हो ।’

महिलातर्फ पहिलो क्वाटर समृद्धि गोरिल्लाजले १२–८ स्कोरको अग्रता बनायो, जहाँ एलिना गुरुङले ६ स्कोर गरिन् । मुना महर्जनको थ्री प्वाइन्टर प्रहारमा फाउल गरेपछि थप तीन फ्री थ्रोका साथ दोस्रो क्वाटरको सुरुमै १७–८ को अग्रता बनायो । सिर्जना गिरीले ३ स्कोर जोडेपछि दोस्रो क्वाटरको १ मिनेट ४० मा गोरिल्लाजले अग्रता २०–८ पुर्‍यायो ।

त्यसपछि प्रीति तुलाचन र कप्तान अनुषा मल्लको थ्री प्वाइन्टर सहयोगमा पुलिस खेलमा फर्कियो । दोस्रो क्वाटरमा पनि २९–२२ को स्कोर पुर्‍याएर गोरिल्लाजले ७ अंकको अग्रता लियो । पुलिस तेस्रो क्वाटरमा फर्कियो । २२–१३ स्कोरसाथ पुलिसले अन्तिम क्वाटरअघि २ अंकको अग्रता बनायो । अन्तिम क्वाटर १६–१० ले टुंग्याउँदै उपाधि जित्यो ।

विजेता टाइम्सले २ लाख र आर्मीले १ लाख रुपैयाँ पुरस्कार पाए । महिला विजेता पुलिसले ५० हजार र उपविजेता समृद्धि गोरिल्लाजले २५ हजार जिते ।

प्रकाशित : असार ८, २०७६ ०८:१७
पूरा पढ्नुहोस्
प्रतिक्रिया
पठाउनुहोस्
ADVERTISEMENT