रोहितको कीर्तिमानी शतक

(एएफपी)

लिड्स — भारतका रोहित शर्मा एकै विश्वकपमा ५ शतक बनाउने पहिलो खेलाडी बनेका छन् । उनीसहित लोकेल राहुलले शतक बनाएपछि भारतले शनिबार हेडिङ्लेमा आफ्नो अन्तिम खेलमा श्रीलंकामाथि सहज ७ विकेटको जित हात पारेको छ । 

एन्जेलो म्याथ्युजले १ सय १३ रन बनाएपछि पहिले ब्याटिङ गरेको श्रीलंकाले निर्धारित ५० ओभरमा ७ विकेट गुमाई २ सय ६४ रन बनायो । रोहितले १ सय ३ र राहुलले १ सय ११ रन बनाउँदै पहिलो विकेटमा १ सय ८९ रनको साझेदारी गरेपछि भारतले ६ ओभरभन्दा बढीको खेल बाँकी छँदै विजय हात पार्‍यो ।

कसुन रजिथाको बलमा चौका प्रहार हान्दै शतक पूरा गरेर रोहितले एकै विश्वकपमा सर्वाधिक शतकको कीर्तिमान बनाएका हुन् । सन् २०१५ को पछिल्लो विश्वकपमा श्रीलंकाका कुमार सांगाकाराले चार शतक बनाएका थिए । रोहितले श्रीलंकाविरुद्ध ९२ बलमै शतक पूरा गरे । त्यसलगत्तै उनी रजिथाको बलमा आउट भए । म्यान अफ द म्याच उनले ९४ बलको इनिङ्समा १४ चौका र २ छक्का प्रहार गरे ।

‘हिटम्यान’ को रूपमा चिनिने रोहित जारी प्रतियोगितामा ८ खेल खेल्दै ६ सय ४७ रन बनाएर सर्वाधिक रन बनाउनेमा अग्रस्थानमा आएका छन् । यो उनको लगातार तेस्रो शतक पनि हो । उनले यसअघिको दुई खेलमा बंगलादेशसँग १ सय ४ र इंग्ल्यान्डसँग १ सय २ रन बनाएका थिए । प्रतियोगितामा भारतको पहिलो खेलमा उनले दक्षिण अफ्रिकाविरुद्ध अविजित १ सय २२ र त्यसपछि पाकिस्तानसँग तेस्रो खेलमा १ सय ४० रन बनाएका थिए ।
एकै विश्वकपमा ६ सयभन्दा बढी रन बनाउने उनी केवल चौथो खेलाडी हुन् । यसअघि भारतकै सचिन तेन्दुलकर (सन् २००३), अस्ट्रेलिया म्याथ्यु हेडन (२००७) र बंगलादेशका सकिब अल हसन (जारी प्रतियोगिता) ले यो कीर्तिमान बनाएका थिए ।

राहुलले १ सय १८ बल खेल्दै ११ चौका र १ छक्का प्रहार गरे । ऋषभ पन्त ४ रनमा आउट भए । कप्तान विराट कोहली ३४ र हार्दिक पाण्ड्ये ७ रनमा अविजित रहे ।

यसअघि म्याथ्युजले एकदिवसीय अन्तर्राष्ट्रियमा आफ्नो तेस्रो शतक पूरा गरे । श्रीलंका ५५–४ को स्थितिमा पुगेको समयमा उनले लाहिरू थिरिमानेसँग पाँचौं विकेटमा १ सय २४ रन जोडेपछि श्रीलंकाको स्कोर चुनौतीपूर्ण बनेको थियो । तीव्र गतिका बलर जसप्रित बुमराहले ओपनरद्वय दिमुथ करुनारत्ने (१०) र कुशल परेरा (१८) लाई आउट गरी श्रीलंकालाई गतिलो झट्का दिएका थिए । बुमराहले कुल १० ओभर बलिङ गर्दै ३७ रन खर्चेर ३ विकेट लिए ।

म्याथ्युजले १ सय २८ बल खेल्दै १० चौका र २ छक्का प्रहार गरे । थिरिमानेले ६८ बलमा ५३ रन बनाए । धनञ्जय डी सिल्भा ३६ बलमा २९ रन बनाई अविजित रहे ।


स्कोर कार्ड

भारत
७ विकेटले विजयी

श्रीलंका
५० ओभर २६४/७
एन्जेलो म्याथ्युज–११३
लाहिरू थिरिमाने–५३
धनन्जय डी सिल्भा–२९८

जसप्रित बुमराह ३/३७
रवीन्द्र जडेजा १/४०


भारत
४३.३ ओभर–२६५/३
रोहित शर्मा–१०३
लोकेश राहुल–१११
विराट कोहली–३४८

कसुन रजिथा १/४७
इसुरु उडाना १/५०

प्रकाशित : असार २२, २०७६ १०:०४
प्रतिक्रिया
पठाउनुहोस्

३६ वर्षे जवान

(एएफपी)

बेलो होरिजोन्टे, ब्राजिल — ब्राजिली टिमका कप्तान ड्यानी अल्भेस ३६ वर्षको उमेरमा पनि युवा छन् । उनले आफ्नो ट्रफीको संख्यालाई थप गर्दै संन्यास लिने सोचेका थिए भने त्यसलाई बिर्सन सक्नेछन् । ब्राजिलले कोपा अमेरिकाको फाइनलमा आइतबार पेरुविरुद्ध रियो दी जेनेरियोस्थित माराकाना रंगशालामा प्रतिस्पर्धा गर्दा अल्भेस मुख्य भूमिका निर्वाह गर्ने तयारीमा छन् । यी फुलब्याकमा पछाडि हट्ने कुनै संकेत देखिएको छैन ।

‘म कति वर्षको भएँ भन्ने मलाई थाह छ र त्यो भनेको फुटबलमा के हो भन्ने अर्थ पनि थाह छ । तर, मानिसहरूले नतिजा चाहन्छन् भन्ने मैले सिकेको छु,’ गत महिना पेरिस सेन्ट जर्मेन छाडेको घोषणा गरेयता क्लबविहीन रहेका अल्भेसले भने, ‘म त्यसप्रति केन्द्रित छु । म मेरो उमेरमा केन्द्रित भइरहेको छैन र मेराबारे मानिसहरू के भन्छन् भनेर पनि । म यहाँ कसैलाई चूप लाउन आएको होइन । सामान्य रुपमा भन्नुपर्दा म यहाँ मेरो काम गर्नलाई आएको हो ।’ उनको ‘ट्रफी क्याबिनेट’ मा यसअघि नै कोपा अमेरिका र अरु केही उपाधि जोडिएका छन् । उनी बाँचेको वर्षभन्दा बढी ट्रफी उनीसँग रहेको छ । उनले च्याम्पियन्स लिग तीनपल्ट जितेका छन् । युरोपेली महादेशीय क्लब स्तरमा पुरानो यूईएफए कप दुईपल्ट, क्लब विश्वकप तीनपल्ट, युरोपियन सुपर कप चारपल्ट हात पारेका छन् । उनले बार्सिलोनासँग ला लिगा ६ पल्ट, पेरिस सेन्ट जर्मेनसँग फ्रेन्च लिग वान दुईपल्ट र युभेन्ट्ससँग सिरी ‘ए’ एकपल्ट जितेका छन् । स्पेन, फ्रान्स र इटालीमा जितेका घरेलु कपका आठ उपाधिलाई उल्लेख गरिरहनु नपर्ला ।

अल्भेसले ब्राजिलसँग सन् २००७ को कोपा अमेरिका र दुईपल्ट कन्फेडेरेसन कपको उपाधि जिते । उनको टिमले कोपा अमेरिकाको सेमिफाइनलमा मंगलदबार अर्जेन्टिनालाई २–० ले हराएको थियो । त्यसमा उनले २० मिनेटभित्र अर्जेन्टिनी तीन खेलाडीलाई छक्याएर रोबर्टो फिर्मिनोलाई बल दिएका थिए र फिर्मिनोको क्रसमा ग्याब्रियल जेससले गोल गर्दै बेलो होरिजोन्टेमा ब्राजिललाई अग्रता दिलाएका थिए । त्यसप्रति उनी सन्तुष्ट भएको हुनसक्छन् ।

अल्भेसको कौशल निकै सुन्दर हुने गर्छ । उनले चिप गर्दै मार्कुस एक्युनालाई उछिने, लिएन्ड्रो पाराडेसलाई गलत दिशामा स्लाइड हान्न लगाए र निकोलस टाग्लियफिकोलाई ओझेलमा पार्दै फिर्मिनोलाई पास दिएका थिए । ‘बक्स’ मा ब्राजिल थियो । काउन्टर एट््याकमा म्यानचेस्टर सिटीका जेससको पासमा फिर्मिनोले ‘ट्याप’ गरेर ब्राजिलले जित सुरक्षित गर्‍यो र फाइनलमा स्थान पक्का गर्‍यो ।

त्यो गोलमा अल्भेसको एक्लो दिमागको प्र्रतिबद्धता अर्को उदाहरण हो । बलसँग नहुँदा र रेफ्रीले नदेखेको अवस्थामा उनले मैदानमा सर्जियो अगुइरोसँग नोकझोक गरिहेका थिए । त्यस बेला अगुइरो खेलमा संलग्न भएका थिएनन् तर अल्भेसले कुनै अवसर दिइरहेका थिएनन् । त्यो नियमविपरीत थियो । फाउल थियो । त्यसमा पेनाल्टीसम्म पनि हुनसक्थ्यो । तर त्यसबाट अल्भेस टाढै रहे र सबै हिसाबले जित हात पारे । त्यसमा उनी लामो समयदेखि नै जानकार थिए भन्ने बुझ्न सकिन्छ ।

प्रकाशित : असार २१, २०७६ ०९:०२
पूरा पढ्नुहोस्
प्रतिक्रिया
पठाउनुहोस्