बाँकी खेल आज

एएफपी

म्यानचेस्टर — भारत र न्युजिल्यान्डबीचको मंगलबार पहिलो सेमिफाइनल खेल वर्षाले गर्दा स्थगित भएको छ । म्यानचेस्टरस्थित ओल्ड ट्राफोर्डमा टस जितेर ब्याटिङ गरिरहेको न्युजिल्यान्डले ४६.१ ओभरमा ५ विकेट गुमाई २ सय ११ रन बनाइरहेको समयमा खेल वर्षाले रोकिन पुगेको थियो । 

खेल रोकिँदा रस टेलर ६७ र टम लाथम ३ रन बनाई क्रिजमा थिए । त्यसपछि पटक–पटक वर्षाले खेल अवरुद्ध बनाउँदा भारतले २० ओभर खेल्ने मौका पनि छाडेन । चार घण्टा पनि खेल नभएपछि स्थगित हुन पुगेको हो । वैकल्पिक दिन राखिएकाले रोकिएको खेल बुधबार हुनेछ । न्युजिल्यान्डले इनिङ्सको बाँकी २३ बल खेलेपछि भारत लक्ष्य लिएर मैदानमा आउने छ ।

बुधबारको मौसम मंगलबारभन्दा पनि खराब रहने मौसम अनुमानले खेल हुनेमै शंका गरिएको छ । खेल पूरा नहुन सकेमा भारत फाइनलमा पुग्नेछ । १० राष्ट्रसम्मिलित राउन्ड रोबिनको खेलमा भारत शीर्षस्थानमा र न्युजिल्यान्ड चौथो स्थानमा थिए ।राउन्ड रोबिनमा चार खेल वर्षाले पूरै बिथोलेको थियो, जहाँ कुनै वैकल्पिक दिन राखिएको थिएन ।

भारतले इनिङ्सको पहिलो बलमै भुवनेश्वर कुमारको बलमा मार्टिन गुप्टिलमाथि एलबीडब्लू अपिल गर्दै रिभ्यू लिएको थियो । बल लेग स्टम्पबाहिर गइरहेको पाइएपछि भारतले रिभ्यू गुमाउनुपरे पनि कसिलो बलिङ गरेर न्युजिल्यान्डको ब्याटिङलाई बाँधेको थियो । निकै खराब फर्ममा रहेको गुप्टिलले १४ बल खेल्दै १ रनमात्र बनाउन सके । ५१ बलमा २८ रन बनाएका हेनरी निकोलसलाई रवीन्द्र जडेजाले बोल्ड गरे ।

निकोलसले कप्तान केन विलियम्सनसँग मिलेर न्युजिल्यान्डको इनिङ्स उकास्ने प्रयास गरेका थिए । राम्रो लयमा रहेको विलियम्सनले ९५ बलमा ६७ रन बनाए । उनले ५ चौका प्रहार गरे । जिम्मी निसम १२ र कोलिन डी ग्रान्डहोम १६ रन बनाई आउट भए । टेलरले ८५ बल खेली ३ चौका र १ छक्का प्रहार गरे । वर्षाले खेल रोकिनुअघि न्युजिल्यान्डले अन्तिम ओभरमा ४८ रन जोडेपछि टोलीको स्कोर २ सय रन नाघेको थियो ।

भारतको बलिङ निकै अनुशासित रहेको थियो । जसप्रित बुमराहले ८ ओभरमा १ मेडन राख्दै २५ रन खर्चे । जडेजाले पनि १० ओभरमा ३४ रनमात्र दिए । भुवनेश्वरले ८.१ ओभरमा २५ रन खर्चेर १ विकेट लिए । युजभेन्द्र चहलले १० ओभरमा ६३ रन खर्चेर १ विकेट लिने अर्का खेलाडी थिए ।

प्रकाशित : असार २५, २०७६ ०९:५३
प्रतिक्रिया
पठाउनुहोस्

परीक्षणबिनै भित्रियो तरकारी

कान्तिपुर संवाददाता

विराटनगर — विराटनगर भन्सार नाकाबाट मंगलबारदेखि विषादी परीक्षणबिनै तरकारी र फलफूल भित्रन थालेको छ । भन्सार विभागले सोमबार बेलुका तरकारी तथा फलफूलको विषादी परीक्षणबिनै जाँच पास गर्न परिपत्र गरेपछि भित्रिन थालेको हो । ‘आज फाटफुट रूपमा तरकारी आयो, हामीले विषादी परीक्षणको प्रमाण पत्र मागेनौं क्वारेन्टाइन भएपछि पास भएका छन्,’ प्रमुख भन्सार अधिकृत मिमांस अधिकारीले भने ।

सरकारले ताजा तरकारी तथा फलफूल पैठारी गर्दा सम्बन्धित भन्सार विन्दुमा क्वारेन्टाइन र जीवनाशक विषादीको अवशेष परीक्षण अनिर्वाय गर्नुपर्ने नियम राजपत्रमा प्रकाशित गरेसँगै २० दिनदेखि आयात बन्द भएको थियो । केही दिनअघि मात्र मन्त्रिपरिषदको बैठक उक्त निर्णयबाट पछि हटे पनि भन्सार कार्यालयले भने विभागबाट परिपत्र नआएको भन्दै बिनापरीक्षण आयातमा लगाएको रोकलाई सोमबारसम्म यथावत् राखेको थियो ।

भारतबाट विराटनगरको गुद्री बजारमा मात्र दैनिक दुई सय टन तरकारी आउँछ । हरियो तरकारी सीमा नजिक रहेका भारतका कटियार, पूर्णिया, फार्बेसगन्जलगायत क्षेत्रबाट आउने गरेको छ । आलु उत्तरप्रदेश र प्याज नासिकबाट आउँछ । विराटनगर नाकाबाट गत वर्ष सवा २ अर्बभन्दा बढी मूल्यको तरकारी आयात भएको छ । प्रदेश १ का १४ जिल्लामा गत आर्थिक वर्षमा ८२ हजार ४ सय ९२ हेक्टर क्षेत्रफलमा तरकारी खेती गरिएको थियो ।

प्रकाशित : असार २५, २०७६ ०९:५०
पूरा पढ्नुहोस्
प्रतिक्रिया
पठाउनुहोस्