इंग्ल्यान्ड २७ वर्षपछि फाइनलमा

एएफपी

बर्मिङ्घम — विश्वकप क्रिकेटले नयाँ विजेता पाउने भएको छ । आयोजक इंग्ल्यान्डले बिहीबार दोस्रो सेमिफाइनलमा पाँचपल्टको विजेता अस्ट्रेलियालाई सजिलै ८ विकेटले सजिलै पराजित गरेपछि यस्तो समीकरण बनेको हो । 

आइतबार लर्डसमा हुने फाइनलमा इंग्ल्यान्ड र न्युजिल्यान्डबीच प्रतिस्पर्धा हुँदै छ । यी दुवै टोलीले अहिलेसम्म विश्वकप जित्न सकेका छैनन् । न्युजिल्यान्डले अघिल्लो दिन पहिलो सेमिफाइनलमा भारतलाई स्तब्ध पारेको थियो । न्युजिल्यान्ड लगातार दोस्रोपल्ट फाइनल खेल्दै छ । समूह चरणको खेलमा इंग्ल्यान्डले न्युजिल्यान्डमाथि १ सय १९ रनको जित हात पारेको थियो ।

इंग्ल्यान्ड २७ वर्षपछि फाइनल पुगेको हो । सन् १९९२ मा पछिल्लो पटक इंग्ल्यान्डले फाइनल खेलेको थियो, जहाँ टोली पाकिस्तानसँग उपाधि भिडन्तमा पराजित भयो । त्यसयता इंग्ल्यान्ड सेमिफाइनल पनि पुग्न सकेको थिएन । १९७९ को फाइनलमा इंग्ल्यान्डलाई वेस्ट इन्डिज र १९८७ मा अस्ट्रेलियाले पराजित गरेको थियो । चार वर्षअघि विश्वकपमा इंग्ल्यान्ड पहिलो चरणबाटै बाहिरिएको थियो ।

त्यसयता इंग्ल्यान्डलाई यो स्थितिमा पुर्‍याउन अस्ट्रेलियाका प्रशिक्षक ट्रेभोर बेलिसको उल्लेखनीय योगदान छ । चार वर्षको अन्तरमा एकदिवसीय अन्तर्राष्ट्रियमा विश्व नम्बर एक बनिसकेको टोली विश्वकप उपाधि नजिक पनि पुगेको छ । अस्ट्रेलिया पहिलोपल्ट सेमिफाइनलमा पराजित भएको हो । यसअघिका सात सेमिफाइनल जित्दा अस्ट्रेलिया पाँचपल्ट विश्वविजेता बनेको थियो ।

टस जितेपछि ब्याटिङमा आएको अस्ट्रेलियालाई इंग्ल्यान्डले एक ओभरअगाडि २ सय २३ रनमा अलआउट गर्‍यो ।

जेसन रोयले आक्रामक ८५ रन बनाएपछि इंग्ल्यान्डले ३२.१ ओभरमै लक्ष्य पूरा गरेका थियो । ६५ बल खेलेका उनले ९ चौका र ५ छक्का प्रहार गरे । रोयले जोनी बेरिस्टोसँग पहिलो विकेटमा १८ ओभरभित्र १ सय २४ रन जोडेपछि इंग्ल्यान्डको जित निश्चितजस्तै भएको थियो । बेरिस्टोले ४३ बलमा ५ चौका प्रहार गरी ३४ रन बनाए । जो रुट ४६ बलमा ४९ र कप्तान इयान मोर्गन ३९ बलमा ४५ रन बनाई अविजित रहे । दुवैले ८–८ चौका प्रहार गरे ।

म्यान अफ द म्याच भने क्रिस वोक्स थिए । जोफ्रा आर्चरले अस्ट्रेलियाका कप्तान आरोन फिन्चलाई शून्यमा आउट गरेको अवस्थामा वोक्सले डेविड वार्नरलाई ९ र पिटर ह्यान्ड्सकोम्बलाई ४ रनमै पेभेलियन फर्काए । उनले मिचेल स्टार्कलाई २९ रनमा आउट गरी तेस्रो विकेट लिए । स्टिभ स्मिथले ८५, एलेक्स केरीले ४६ र ग्लेन म्याक्सवेलले २२ रन बनाए पनि अस्ट्रेलियालाई त्यो मजबुत स्कोरमा पुर्‍याउन पर्याप्त भएन् ।

स्पिनर अदिल रशिदले एकै ओभरमा केरी र मार्कस स्टोइनिस (०) लाई आउट गरी अस्ट्रेलियाको खेलमा फर्किने आशामा ठूलो धक्का दिए । वोक्सले ८ ओभरमा २० रनमात्र दिए । रशिदले १० ओभरमा ५४ रन खर्चेर ३, आर्चरले १० ओभरमा ३२ रन खर्चेर २ र मार्क उडले १ विकेट लिए ।

प्रकाशित : असार २७, २०७६ ०८:०४
प्रतिक्रिया
पठाउनुहोस्

बंगलादेशी प्रशिक्षक बर्खास्त

एएफपी

ढाका — बंगलादेशी क्रिकेट पदाधिकारीले विश्वकपमा टिमको खराब प्रदर्शनपछि प्रशिक्षक स्टिभ रोड्सलाई हटाइएको घोषणा गरेका छन् । ‘हामीले एकापसमा छुट्टिने निर्णय गरेका छौं,’ बंगलादेशी क्रिकेट बोर्डका प्रमुख कार्यकारी निजामुद्दिन चौधरीले भनेका छन्, ‘यो निर्णय तुरुन्त लागू हुनेछ ।’

बंगलादेशी टिम घर फर्केयता प्रशिक्षक बर्खास्त भएको समाचार आएको हो । बंगलादेशले लिग चरणमा खेलेका ८ मध्ये ३ खेलमात्र जितेका थियो । बंगलादेशको तीनै टिम राम्रो प्रदर्शन गर्न संघर्षरत दक्षिण अफ्रिका, वेस्ट इन्डिज र अफगानिस्तानविरुद्ध थियो । हारमा पनि भारत, अस्ट्रेलिया र न्युजिल्यान्डविरुद्ध भने बंगलादेशले राम्रो खेलेको थियो ।

गत वर्ष जुनमा मात्र मुख्य प्रशिक्षक रोड्स बंगलादेशी टिमसँग जोडिएका थिए । उनकै नेतृत्वमा आयरल्यान्डमा भएको धेरै टिम सहभागी प्रतियोगिताको उपाधि बंगलादेशले पहिलोपल्ट जितेको थियो । बंगलादेशी बोर्डसँग अर्को वर्षको आईसीसी वर्ल्ड ट्वान्टी–२० सम्म उनको अनुबन्ध थियो ।

तर एकदिवसीय विश्वकपमा टिमको प्रदर्शन अपेक्षित रहन नसकेपछि रोड्स बर्खास्तगीमा परे । बोर्डले श्रीलंका भ्रमणमा निस्कने बंगलादेशी टिममा रोड्स नरहने जनाएको छ । अर्को महिना बंगलादेशले त्यहाँ तीन एकदिवसीय खेलको शृंखला खेल्दै छ । तीनै खेल कोलम्बोको प्रेमदासा स्टेडियममा हुनेछ । ‘हामीले चाँडै नयाँ प्रशिक्षक घोषणा गर्नेछौं,’ बोर्डका मिडिया कमिटी प्रमुख जलाल जुनिसले भनेका छन् ।

बोर्डले टिमका बलिङ प्रशिक्षक कर्टनी वाल्ससँगको अनुबन्ध पनि नबढाउने निर्णय गरेको छ । स्पिन बलिङ प्रशिक्षक सुनील जोशीसँगको अनुबन्धबारे भने निर्णय भएको छैन । बोर्डले वाल्ससँग सन् २०१६ मा तीनवर्षे अनुबन्ध गरेको थियो । जोशी भने गत वर्ष नियुक्त भएका थिए । विश्वकपमा बंगलादेशको बलिङ प्रदर्शन कमजोर रहेको थियो ।

प्रकाशित : असार २५, २०७६ १०:४०
पूरा पढ्नुहोस्
प्रतिक्रिया
पठाउनुहोस्