कोरियामा कारको ठक्करबाट एक नेपालीको मृत्यु

देवेन्द्र सम्बाहाम्फे

सोल — दक्षिण कोरियामा कारको ठक्करबाट एक नेपालीको मृत्यु भएको छ । बिहीबार राति इन्च्छनमा कोरियन नागरिकले हाँकेको कारले ठक्कर दिँदा स्याङ्जा मनकामनाका इश्वर गुरुङको मृत्यु भएको हो ।



घटना राति ११ बजे भएको सँगै रहेका नेपालीले बताएका छन् । रेस्टुरेन्टबाट खाना खाएर बाहिर निस्किने क्रममा गुरुङलाई पछाडिबाट सोनाटा कारले ठक्कर दिएको थियो ।

घटनापछि प्रहरीले तत्काल अस्पताल पुर्‍याएको भए पनि उपचारकै क्रममा चिकित्सकहरुले गुरुङलाई मृत घोषणा गरेका थिए ।

घटनाबारे प्रहरीले अनुसन्धान गरिरहेको छ भने कार चालक पक्राउ परेका छन् ।

करिब १५ बर्षअघि कोरिया आएका गुरुङ बौद्ध परिवारका अध्यक्ष हुन् । बुद्ध जयन्तीको अवसर पारेर उनकै नेतृत्वमा आउँदो शनिबार र आइतबार लोटस लाल्टिन फेस्टिभलको र्‍याली आयोजना गर्न लागिएको थियो । विगत केही बर्षदेखि उनकै अगुवाईमा यो र्‍याली हुने गरेको छ ।

गुरुङको शव इन्च्छन पुच्छनको साङमु अस्पतालमा राखिएको छ । उनको श्रीमती र छोरी नेपालमा छन् भने छोरा र दाई कोरियामै छन् ।

प्रकाशित : वैशाख २४, २०७३ १२:३३
प्रतिक्रिया
पठाउनुहोस्

सोनिया, राहुल र मनमोहनलाई गिरफ्तार गरी छोडियो

एजेन्सी

नयाँ दिल्ली — भारतको प्रमुख प्रतिपक्षी दल कांग्रेस आईकी अध्यक्ष सोनिया गान्धी, उपाध्यक्ष राहुल गान्धी र पूर्व प्रधानमन्त्री मनमोहन सिंहलगायतलाई भारतीय प्रहरीले गिरफ्तार गरी केही मिनेटमै छोडेको छ ।



भारतको राजनीति, अध्ययन संस्थान र अन्य सामाजिक क्षेत्रमा भाजपा गठबन्धनले ‘आक्रमण’ गरेको भन्दै यसको विरोधमा कांग्रेसले निकालेको र्‍यालीबाट उनीहरुलाई प्रहरीले पक्राउ गरेको थियो ।

‘सेभ डेमोक्रेसी’को नारामा जन्तरमन्तरबाट निस्किएको र्‍याली संसद् भवनतर्फ अघि बढेपछि प्रहरीले अवरोध गरेको थियो । उनीहरुलाई पक्राउ गरेर १५ मिनेटमा छोडिएको भारतीय संचारमाध्यमहरुले जनाएका छन् ।

प्रकाशित : वैशाख २४, २०७३ १२:२५
पूरा पढ्नुहोस्
प्रतिक्रिया
पठाउनुहोस्