कराँते खेलाडी ठकुरीलाई अमेरिकी अवार्ड

कान्तिपुर संवाददाता

न्युयोर्क — कराँते खेलाडी उज्ज्वल ठकुरीलाई अमेरिकी मार्शल आर्टस् एलाइन्स ( एएमएए) ले प्रतिष्ठित सम्मान मानिने ‘हुज हु लिजेन्ड अवार्ड’ प्रदान गरेको छ । अमेरिकी मार्शल आर्ट विधामा साहसिक एवम उत्कृष्ट सम्मान मानिने यो विधामा सुचीकृत हुने ठकुरी, सम्भवत पहिलो नेपाली खेलाडी हुन् । साहसिक एवम उत्कृष्ट खेल कला प्रर्दशनको आधारमा यो अवार्ड प्रदान गरिन्छ ।

शुक्रबार मेरिल्याण्ड राज्यको नेशनल हर्वरमा आयोजित बिशेष समारोहमा ठकुरीलाई ‘ब्ल्याकबेल्ट लिजेन्ड’ अवार्डले सम्मान गरियो । सो अवसरमा विभिन्न पाँच विधामा साहसिक एवम उत्कृष्ट खेलाडीहरुलाई अवार्ड प्रदान गरिएको थियो । जसमध्ये अमेरिकी मार्शल आर्टस्का बिशिष्ट ब्यक्ति मानिने ग्राण्ड मास्टर झुन रि, पाईनियर एचिभमेन्ट अवार्डबाट पुरस्कृत भए ।

अमेरिकी मार्शल आर्ट एलाईन्सको यो सम्मानसँगै पुरस्कृत ब्यक्तित्वको योगदान, चिनारी एवम उपलब्धि बारे आयोजकले पुस्तक प्रकाशनमा ल्याउने प्रचलन छ । जस अनुसार यसपटकको पुस्तकमा ठकुरीको योगदान, कला एवम साहसिक यात्रा बारे उल्लेख गरिएको छ ।

‘भ्यान डाम स्टाईल’ अन्तर्गत शरीरले एक सय ४० पाउण्ड एवम दाँतले एक सय पाउण्ड वजन उचाल्नुका अतिरिक्त बाइस वटा काठका पाताहरुलाई भाँच्न सफल भएका कारण ठकुरी अवार्ड पाउन सफल भएका हुन् । भ्यानडम स्टाइल तेन्सो काता र भ्यानडम स्टाइल खुकुरी कातामा पोख्त उनी, पाँचौ स्तरका ब्ल्याकबेल्ट हुन ।

अवार्डले उत्साहित उनले भने ‘नेपाली मार्शल आर्टस्लाई संसारमा स्थापित गराउने मेरो लक्ष्य हो । यसैमा लागिपरेको छु ।’ रिटायर्ड लेफिनेन्ट कर्नेल ग्यारी क्लस बाट प्रशिक्षित ठकुरीले अमेरिकाका दश राज्यमा आयोजित विभिन्न च्याम्पियनसीपमा प्रतिस्पर्धा गरिसकेका छन् । विभिन्न साहसिक एवम अनौठा मार्शल आर्टस् विधाका लागि पोख्त, ठकुरी अमेरिका स्थित नेपाली डायस्पोराबाट धेरै पटक सम्मानित एवम् पुरस्कृत भइसकेका छन् ।

प्रकाशित : श्रावण २३, २०७४ १०:३४
ADVERTISEMENT
ADVERTISEMENT
प्रतिक्रिया
पठाउनुहोस्

सरकारी जग्गा अतिक्रमण

अस्थायी टहरामा बसेकाले अन्यत्र घरजग्गा नभएको दाबी
कान्तिपुर संवाददाता

गुलरिया — गुलरिया नगरपालिकाको ११ बिघा सार्वजनिक जग्गा अतिक्रमण भएको छ । सात वर्षअघि अतिक्रमित जग्गामा भारतीय नागरिकले समेत अस्थायी टहरा बनाएर बस्दै आएका छन् । नगरपालिकाले पटक–पटक जग्गा खाली गर्न उर्दी गरे पनि अतिक्रमणकारी हटेका छैनन् ।

अस्थायी टहरामा बसेकाले अन्यत्र घरजग्गा नभएको दाबी गर्दै आएकाले उनीहरूको व्यवस्थापनमा समस्या भएको हो । गत वर्ष गुलरिया नगरपालिकाले ६३ परिवारलाई अतिक्रमित जग्गा खाली गर्न निर्देशन दिएको थियो ।
कार्यकारी अधिकृत रामचन्द्र पौडेलले जबर्जस्ती आफूखुसी घर बनाएकाले निर्वाचित जनप्रतिनिधिले कारबाही प्रक्रिया अघि बढाइसकेको बताए । अतिक्रमण गर्नेमा भारतको आसामबाट आएका दर्जनभन्दा बढी परिवार छन् । अतिक्रमणकारी अधिकांशको अरू ठाउँमा घरजग्गा भएको नगरपालिकाले जनाएको छ । उनीहरूले आफूलाई जबर्जस्ती सुकुम्बासी बताउँदै आएका हुन् ।
गुलरियाका कमल लोधका नाममा सुरजपुरमा १० कट्ठा जग्गा रहेको नगरपालिकाले जनाएको छ । त्यस्तै बारबर्दिया बनघुस्रीकी विष्णुदेवी कुर्मीनीको पनि घरजग्गा रहेको उल्लेख भएको छ । तर उनीहरूले अन्यत्र जग्गा नभएकाले नगरपालिकाको जग्गामा बस्नु परेको बताएका छन् । कर्मचारीका अनुसार अधिकांशले अन्यत्र जग्गा भएको लगतमा खुलाएका छैनन् ।
एक वर्षअघि नगरपालिकाले जबर्जस्ती बसेकालाई हटाउने तयारी गरे पनि निर्वाचनलगायत कारणले रोकिएको थियो । नगरपालिका प्रमुख मुक्तिनाथ यादवले अतिक्रमण गरी बसेकाको तीन पुस्ताको नाममा जग्गा भए/नभएबारे छानबिन गरिने बताए । ‘नगरको बैठकले भारतीय नागरिकलाई तत्काल हटाउने निर्णय गरेको छ,’ उनले भने, ‘नेपाली नागरिकको जग्गा भए/नभएबारे अनुसन्धान गरी हटाइने छ ।’
०४६ सालपछि सर्यु नदीको कोरिडोरमा रहेको करिब ६५ बिघा सार्वजनिक जग्गासमेत व्यक्ति विशेषको नाममा दर्ता भइसकेको नगरपालिकाले जनाएको छ । बाढीबाट डुवान हुने उक्त जग्गा ०२१ सालमा नापी हु‘दा सार्वजनिक भनी उल्लेख थियो । मुलुककै दुर्लभ वन्यजन्तु कृष्णसार संरक्षण क्षेत्रको पश्चिमतर्फको जग्गासमेत सार्वजनिक हो ।

प्रकाशित : श्रावण २३, २०७४ १०:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT