सिड्नीमा गजल मुसायरा

नारायण खड्का

अस्ट्रेलिया — युवाकवि मोतीराम भट्टको जन्मोत्सवको अवसर पारेर आयोजना गरिएको गजल मुसायराले सहभागीहरुलाई मनोरञ्जन मात्र दिएनन् कि गजलकारलाई आफ्नो मनको कुरा खोल्ने वातावरण पनि सिर्जना गरिदियो ।

कुरा आकाशका हुन्छन्, कुरा पातालका हुन्छन् ।
देउवा, ओली र हजुर कुरा दाहालका हुन्छन् ।
तपाई बढ्ता नबोल्नुस् प्रधानमन्त्री कड्किनुभो
चोकचोकमा कुरा साझा सवालका हुन्छन् ।’

साहित्यकार प्रदीप चापागाईंले सिड्नीमा आयोजना गरिएको गजल मुसायरामा सुनाएको यो गजलले वाहवाही मात्र हैन साहित्यिक वातावरणलाई नै मनोरञ्जक बनाइदियो । एक दर्जन बढी गजलकारहरुले गजल सुनाउँदा दर्शकहरुले 'वान्समोर'ले स्वागत गरेका थिए ।

नेपाली गजललाई विदेशमा प्रवर्द्धन गर्ने र साहित्यमा रुची राख्नेहरुका लागि साहित्यिक वातावरण सिर्जना गर्ने उद्देश्यले सिड्नीमा साहित्यिक कार्यक्रम गजल मुसायरा सम्पन्न भएको थियो । अस्ट्रेलियाका सबै राज्यहरुबाट सहभागिता जनाइएको कार्यक्रममा सहभागीहरुले देशभक्ति, राजनीति, मायाप्रेम, विछोडलगायत गजलहरु प्रस्तुत गरेका थिए । गजलकारहरुले गजल सुनाइरहँदा सहभागीहरुले ताली र वाहवाहले प्रोत्साहन दिएका थिए ।

‘म मर्नुअघि एकफेर आफ्नै देशमा पुगेर,
राष्ट्रियता जगाउनु छ, झन्डा फरफराउनु छ ।’


गजलकार रिमेन आलोकले देशभक्तिले भरिएको यो गजल सुनाउँदा सहभागीहरु नतमस्तक बनेका थिए । यसै गरी अर्का गजलकार गणेश गौतमले सुनाएको विद्यमान जातीय विभेदलाई व्यङ्य गर्दै प्रस्तुत गरेको गजलले समेत दर्शकहरुलाई भावुक बनाएको थियो ।

‘सँगै चिया पिइरहेको साथी उठेर गयो,
लाग्यो अचानक उसले मेरो जात सम्झियो ।’

कार्यक्रमको आयोजनामा लागिपरेका जितेन्द्र मल्लका अनुसार प्रत्येक वर्ष गरिँदै आएको यो कार्यक्रममा यसवर्ष एक दर्जन बढी साहित्यकारहरुले आफ्नो गजल वाचन गरेका थिए । चौथो पटक आयोजना गरिएको कार्यक्रम हरेक वर्ष आयोजना हुने उनले जानकारी दिए ।

प्रकाशित : भाद्र २०, २०७४ १५:४७
प्रतिक्रिया
पठाउनुहोस्

काठमाडौंको फोहोर फाल्न ओखरपौवावासीको अवरोध

कान्तिपुर संवाददाता

नुवाकोट — काठमाडौँ उपत्यकाको फोहोर फालिँदै आएको ओखरपौवाका बासिन्दाले अनिश्चित समयका लागि बन्दको घोषणा गरेका छन् ।

प्रभावित क्षेत्रमा आवासलाई दिँदै आएको मुआब्जाको दूरी र सीमा घटाएको विरोधमा बासिन्दाले फोहोर फाल्न अवरोध गरेका छन् । स्थानीयवासीको अवरोधले सोमबार साँझ र मंगलबार बिहान आएका ८५ गाडीलाई फोहोर विसर्जन गर्न दिएर अनिश्चित समयका लागि बन्द गरेको भन्दै सडक ठप्प बनाएको ककनी गाउँपालिका–२ ओखरपौवाका वडाध्यक्ष केदार पौडेलले बताए । 'फोहोरको विसर्जनबाट ९०० मिटर दूरीमा पर्ने आवास र गोठका अति प्रभावितलाई प्रतिस्क्वायर मिटर वार्षिक रु ५० दिँदै आएकामा नयाँ आवदेखि घटाएकाले विरोधमा अवरोध गर्नुपरेको हो', पौडेलले भने, 'फोहोरको वैज्ञानिक व्यवस्थापन नहुँदा प्रभावित क्षेत्रको दूरी र वार्षिक मुआब्जा वृद्धिको माग भइरहेको समयमा त्यसलाई निस्तेज बनाउन महानगरपालिकाले गरेको निर्णय अमान्य छ ।' 

एक साताअघि भएको सहमतिको कार्यान्वयन नभएको, मुआब्जाको सीमा र रकम शुल्क घटाएको विरोधको माग सम्बोधन नभएसम्म फोहोर फाल्न नपाउने भन्दै फोहोर बोकेका गाडी नल्याउन स्थानीयवासीले सचेत गराएका छन् । 

काठमाडौँ महानगरपालिकाले तीन वर्षका लागि प्रस्ताव गरेको ओखरपौवाको सिसडोलमा तेह्र वर्षदेखि फोहोर फालिँदै आएको छ । स्थानीयवासीले उठाएका वैज्ञानिक रुपमा फोहोर विसर्जन, लिचडको प्रशोधन, फोहोर फ्याँक्ने आउने मूल सडकको स्तरोन्नति र गाउँको शाखा सडक कालोपत्र हुनुपर्ने माग महानगरपालिकाले एक साताभित्र पूरा गर्न यही भदौ १३ गते जनाएको प्रतिबद्धता पूरा नभएकाले आन्दोलनमा उत्रन बाध्य भएको स्थानीयवासीले बताएका छन् । 

फोहोर फ्याँक्न सिसडोलबाट एक हजार ९०० मिटरको दूरीमा पर्ने वैकल्पिक स्थान बञ्चरेडाँडामा पूर्वाधार निर्माण र प्रभावित बासिन्दाका लागि पन्ध्र श्यया क्षमताको अस्पतालको निर्माण सुरु गर्नुपर्ने माग पनि प्रभावित बासिन्दाले उठाएका छन् । काठमाडौंमा दैनिक उत्पादन हुने करिब एक हजार ५०० टन फोहोरको विसर्जन सिसडोलमा गरिँदै आएको छ । रासस 

प्रकाशित : भाद्र २०, २०७४ १५:४७
पूरा पढ्नुहोस्
प्रतिक्रिया
पठाउनुहोस्