एनआरएनए कोरिया अध्यक्षमा लक्ष्मी गुरुङ निर्वाचित

कान्तिपुर संवाददाता

सोल — गैरआवासीय नेपाली संघ (एनआरएनए) कोरियाको सौलमा सम्पन्न छैटौं महाधिवेशनबाट लक्ष्मी लामा गुरुङ अध्यक्षमा निर्वाचित भएकी छन् ।

लक्ष्मी प्रतिस्पर्धी ओम जुग्जाली र जुनु गुरुङलाई हराउँदै अध्यक्षमा विजयी बनिन् । उनले ६ सय ६० मत पाएकी थिइन् । निर्वाचनमा १ हजार ४ सय ७४ मत खसेको थियो । अघिल्लो कार्यसमिति लक्ष्मी उपाध्यक्ष थिइन् ।

त्यस्तै वरिष्ठ उपाध्यक्षमा विपिन गुरुङ, तीन उपाध्यक्षमा जीवन थापा, अमृत राई र साजन शर्मा, महासचिवमा इन्दिरा तिवारी, सचिवद्वयमा नेत्र पौडेल र नवीन पुडासैनी विजयी बनेका छन् । कोषाध्यक्षमा आलोक बानियाँ र सहकोषाध्यक्षमा जीत थापा सरु मगर विजयी बनेका छन् । त्यस्तै सदस्यहरुमा विजय गुरुङ, सुरेश ब्लोन, अंशुबर्मा लिम्बू, सकिन श्रेष्ठ, विजय रेग्मी र देवेन्द्र पोख्रेल निर्वाचित भएका छन् ।

आईसीसी सदस्यमा लोचन राई र प्रकाश धमला विजयी बने । युवा संयोजकमा सन्तोषकुमार राई र महिला संयोजकमा भावना गुरुङ र्निविरोध चयन भए । कुल मतदाता २२ सय ८३ मध्ये ६३ प्रतिशत अर्थात् १४ सय ७४ जना मतदाताले मतदान गरेको निर्वाचन मण्डलले जनाएको छ ।

अधिवेशन कानुनमन्त्री यज्ञबहादुर थापाले शनिबार उद्घाटन गरेका थिए । अधिवेशनमा सामाजिक अभियन्ता महावीर पु्न पनि उपस्थित थिए ।

प्रकाशित : भाद्र २८, २०७४ १३:४६
प्रतिक्रिया
पठाउनुहोस्

सडक मर्मत नहुँदा सर्वसाधारणलाई सास्ती

हरिहरसिंह राठौर

धादिङ — गत वैशाखदेखिकै वर्षात्‌ले अवरुद्ध ग्रामीण सडक मर्मत नभएपछि दसैंलगायत चाडपर्व मान्न गाउँघर आवतजावत गर्ने नागरिकलाई सास्ती भएको छ ।

सदरमुकाम नीलकण्ठ नगरपालिकादेखि जिल्लाका विभिन्न भागमा जाने नियमित सञ्चालनमा आएका आधा दर्जन ग्रामीण सडक सडक मर्मत गरी सञ्चालन गर्न सम्बन्धित निकायले चासो नदिएपछि स्थानीय मर्कामा परेका हुन् । यातायातका साधन नचल्दा दुर्गममा लामो दूरीमा पैदल यात्रा गर्नुपर्ने र दैनिक उपभोग्य सामान आपूर्ति निकै समस्या परेको स्थानीयको गुनासो छ । सदरमुकामबाट उत्तरी भेगका गाउँसम्म पुग्न २/३ दिन नै पैदल हिँड्नुपर्छ ।

सदरमुकामबाट अन्य क्षेत्र जाने मुख्य सडकहरु सल्यानटार, कटुन्जे, सुनौला बजार, धुवाँकोट, मैदी, चैनपुरका ग्रामीण सडकको अवस्था खराब छ । अहिले ठुला सवारीसाधन मात्रै हैन स-साना जिप समेत सञ्चालन हुन सकेका छैनन् । 

जिल्लामा निर्माण गरिएका २५ सय किलोमिटर सडक व्यवस्थित गर्न नसकेपछि वर्षात्‌पछिका ४ महिना स्थानीयवासीले निकै सास्ती व्यहोर्नुपर्ने तत्कालीन सल्यानटार गाविसका पूर्वगाविस अध्यक्ष फणिकान्त छत्कुलीले बताए । उनकाका अनुसार ढल निकासको उचित प्रबन्ध नहुँदा कच्ची सडक झनै बिग्रने मात्रै हैन विभिन्न स्थानमा पहिरोको जोखिम बढाएको छ । कतिपय सडक पैदल हिँड्नसम्म नहुने गरी पहिरोले लगेको छ । 

तर, सडक निर्माणका नाममा हरेक वर्ष लाखौं रकम खर्च हुँदै आएको छ । जिल्ला प्राविधिक कार्यालयका भरत अर्यालले सडक मर्मत गर्न बजेट नभएको बताए । 

प्रकाशित : भाद्र २८, २०७४ १३:४६
पूरा पढ्नुहोस्
प्रतिक्रिया
पठाउनुहोस्