आगलागीमा परी कोरियामा एक नेपाली कामदार गम्भीर घाइते

कान्तिपुर संवाददाता

सोल — दक्षिण कोरियाको चुङनाम आसान प्रान्तमा रहेको दोङही कम्पनीको अपार्टमेन्टमा सोमबार आगलागी हुँदा इलामका ३० वर्षीय किशोर राई गम्भीर घाइते भएका छन् । उनी तीन वर्ष अघि इपिएस मार्फत कोरिया आएका थिए । राईको  हाल छनान स्थित सुनछन ह्यन अस्पतालमा उपचार भइरहेको छ ।

गम्भीर अवस्थामा उपचार गराई रहेका राई हिडडुल गर्न नसक्ने अवस्थमा छन् । राईको शनिबार ढाडको शल्यक्रिया गरिएको छ । दाहिने खुट्टाको घुँडा मुनी र कुरकुचामा र देब्रेखुट्टाको गोलिगाठा निर भाचिएको अस्पताल पुगेका एनसीसीका अध्यक्ष अन्जु केसीले जानकारी दिइन् ।

कम्पनीमा संगै बस्ने साथीले जानकारी दिए अनुसार करिब ४० जना नेपाली कार्यरत मोटरपार्टस बनाउने सो कम्पनीको नेपाली कामदारहरू बस्ने अपार्टमेन्टमा सोमबार रातको साढ़े १ बजे तिर आगलागी भएको थियो । एउटा कोठामा बालेको हिटरबाट आगों सल्केको थियो ।

मध्यरातमा मस्त निद्रामा रहेका बेला तेस्रो तल्लाको पहिलो कोठाबाट शुरू भएको आगलागीले भीषण रूप लिएपछि अरुले थाहा पाएका थिए । सोही क्रममा झ्यालबाट छतमा चढ्न कोशिस गर्दा राई तीन तलाबाट भुइँमा खसेका थिए । आगलागी भएको कोठाको वरीपरीका कोठाका सामान पनि जलेर नष्ट भएका छन् । तीन वटा दमकलको सहारामा आगलागी नियन्त्रणमा लिएका थिए ।

प्रकाशित : पुस २३, २०७४ १४:५९
प्रतिक्रिया
पठाउनुहोस्

अनिश्चितकालिन बन्दले संखुवासभाबासी मारमा, हवाई सेवापनि नहुँदा थप अप्ठ्यारो

कान्तिपुर संवाददाता

संखुवासभा — प्रदेश राजधानी माग गर्दै अनिश्चितकालिन धनकुटा बन्द भएपछि संखुवासभाबासीलाई समस्या भएको छ ।



बन्दका कारण लगातार ५ दिनदेखि यातायातका साधन सञ्चालन भएको छैन । यात्रुहरु मारमा परेका छन् । सदरमुकाम खाँदबारीबाट साना तथा ठूला सवारीका साधन चल्न सकेको छैन । बिहान खाँदबारीबाट यातायातका साधन चलेपनि धनकुटा र संखुवासभाको सिमानामा पर्ने केवा खोला पुगेपछि घण्टौ कुर्नुपर्ने बाध्यता छ । खाँदबारीका हिमाल श्रेष्ठ बन्दका कारण समस्यामा परेको बताउँछन् । बन्दकर्ताले राति ११ देखि बिहान ५ बजेसम्म सडक खुल्ला गरेपनि ठाउँठाउँमा अवरोध भएको उनले बताए । बन्दको मारमा व्यापारी र बिरामी मर्कामा परेका छन् ।

जिल्ला अस्पतालबाट रिफर भएका बिरामी मारमा परेको जिल्ला स्वास्थ्य प्रमुख डा. विनितकुमार झाले बताए । 'यहाँबाट रिफर गरेर बिरामी पठाउँछौं, बाटोमा समस्यामा पर्ने गरेका छन्' उनले भने, 'पर्याप्त एम्बुलेन्स नहुँदा कतिपयले साना सवारी साधन रिर्जभ गरेर लैजाने गरेका छन् ।'

तुम्लिङटारबाट राजधानीसम्म दैनिक निजी एयरलाईन्स्ले उडान गर्ने भएपनि टिकट अभाव रहेको स्थानीयको भनाई छ । बुद्ध एयरले सातामा तीन पटक बिराटनगर तुम्लिङटार उडान भर्ने गरेको भएपनि एकसाता देखि नियमित छैन । खाँदबारीका शेरबहादुर वन निजी एयरलाईन्स्ले सर्वसाधारणलाई चाहिएको बेला सेवा दिन नसकेको बताउँछन् ।

धनकुटा बन्द भएर यात्रु, बिरामी र बृद्धबृद्धा अलपत्र भइरहँदा पनि बुद्धले उडान झिकेको उनले बताए । 'बन्दको बेला गाडीको बिकल्प हवाई जहाज हो । तर, बुद्ध एयरले यो बन्दको मौका छोपेर एक सातासम्म उडान गरेन' उनले भने, 'आईतबारबाट उडान गर्ने भनेपनि साताको ३ उडान गर्दै आएको बुद्धले दूई फ्लाईटमात्रै राखेको पाईयो ।'

सर्वसाधारणलाई समस्या परेको बेला बुद्धले उडान गर्नुको सट्टा झिकेको उनको आरोप छ । निजी एयरलाईन्स सेवा भन्दापनि नाफामुखी भएको उनले बताए । बन्द बाहेकका सामान्य अवस्थामा पनि तुम्लिङटार–बिराटनगरको टिकट पाउन यात्रुलाई समस्या थियो, एकसातादेखि उडान झिकेको छ । सिजनका बेला र पर्यटक भित्रिने समयमात्रै बुद्धले तुम्लिङटार विराटनगर उडान राख्ने गरेको छ ।


प्रकाशित : पुस २३, २०७४ १४:५४
पूरा पढ्नुहोस्
प्रतिक्रिया
पठाउनुहोस्