मलेसियाका २ सहरमा श्रमिक सचेतना कार्यक्रम

नेपाली श्रमिकहरुको जनचेतना अभिबृद्धि गर्ने र उनीहरुको गुनासो बुझ्ने उद्देश्यले उक्त कार्यक्रम गरिएको दूतावासले जनाएको छ ।

दूतावासले गत माघ १४ मा पेनाङ र गत आइतबार जोहोरबारुमा गत आइतबार सचेतना कार्यक्रम सम्पन्न गरेको हो ।

कार्यक्रममा दूतावासको कन्सुलर सेवा लगायत अन्य सेवाहरु, सरोकारवाला विभिन्न निकायबाट प्रदान गरिने सेवा, मलेसियामा रहंदा भइपरि आउनसक्ने समस्या तथा तिनका समाधानका उपाय, स्वास्थ्यसम्बन्धी अपनाउनुपर्ने सावधानी, उनीहरुका हक, हित र जेल तथा फिर्ती केन्द्रमा रहेका नेपालीहरुको उद्दार एवं कानुनी सहायताबारे जानकारी गराइएको थियो ।

कार्यक्रममा कार्यबहाक राजदुत कुमार राज खरेल, द्वितीय सचिवहरु प्रेमराज गौतम, विनोद मुखिया, महेश्वर मणि त्रिपाठी श्रम काउन्सिलर बद्री बहादुर कार्की लगायतले ती विषयहरुमा जानकारी गराएका थिए ।

कार्यक्रममा सहभागी नेपाली एवं विभिन्न संघसंस्थाका प्रतिनिधिहरुले दूतावासका अधिकारीहरुसमक्ष आफूहरुले देखे भोगेका विभिन्न समस्याबारे जानकारी गराउँदै समाधानबारे जिज्ञासा राखेका थिए ।

वैदेशिक रोजगारीमा नेपालीहरुमा कतिपय सामान्य जानकारी नहुँदा समेत विभिन्न समस्याहरु आइपर्ने गरेको पाइन्छ । खाडी एवं मलेसिया लगायत श्रमिक गन्तव्य मुलुकहरुमा कार्यरत नेपाली श्रमिकहरुको जनचेतना अभिवृद्धि गर्न सरकारले हाल त्यहाँस्थित नेपाली दूतावासमार्फत यस्ता सचेतना कार्यक्रमहरु सञ्चालन गर्दै आएको छ ।