बेलायतका मिसेस सुन्दरीहरुले बालबालिकालाई १० लाख दिने

कार्यक्रमबाट करिब दश लाख रुपैयाँ संकलन भएको मिसेस नेपाल यूके सल्लाहकार तथा च्यारिटीकापरिकल्पनाकार शिवजी श्रेष्ठले जानकारी दिए । संकलित रकम छिट्टै नेपाल गएर प्रदान गर्ने योजना छ ।

कार्यक्रमका प्रमुख अतिथी राजदूत डा. दुर्गाबहादुर सुवेदीले दिदी बहिनीले पवित्र र परोपकारी भावनाले च्यारिटी गरेको भन्दै प्रशंसा गरे । ‘तपाईंहरुले प्रस्तुत गर्नुभएको फरक फरक खालका नृत्य र नाटकले एकताको सन्देश दिएको छ’, राजदूत सुवेदीले जोड दिए, ‘हामीहरु जहाँ भएपनि मनभित्र नेपाल हुनुपर्छ ।’

सुन्दरीहरुले गरेको स्वागत नृत्यमा प्रस्तुत शब्द जस्तै सय थरि गोडा भएपनि एउटै चाल र बाजा सयथरि भएपनि ताल एउटै हुनुपर्ने उनले बताए ।

ब्रेन्ट काउन्सिल मेयर भगवानजी चौहानले आफू विगत ११ वर्षदेखि नेपाली समुदायसंग निकट रहेको उल्लेख गर्दै कार्यक्रममा पाएको न्यानो आतिथ्यप्रति आभार व्यक्त गरे ।

कार्यक्रममा एनआरएनए यूके अध्यक्ष योगकुमार फगामी, मिसेस नेपाल यूके संस्थापक मनिषा डंगोल श्रेष्ठले पनि च्यारिटीको प्रशंसा गरेका थिए ।

दोश्रो चरणको सांस्कृतिक कार्यक्रममा मिसेस नेपाल यूके टिमले प्रस्तुत गरेको करिब आधा घण्टाको अपांग र नारी सम्बन्धि सन्देशमुलक नाटकले सहभागी सबैको मन जित्यो ।

आस्था जोशी र अमृता गिरी गजुरेलले स्वागत मन्तव्य दिए भने गिता बस्नेत पाण्डे र प्रिमा भट्टराईले मस्तिष्क पक्षघात रोग र सहयोग प्रदान गर्न लागिएको संस्था अनि त्यहां आश्रित बालबालिकाको स्थितिबारे पावर पोइन्ट प्रिजेन्टेसन दिएका थिए ।

अन्जु श्रेष्ठ, शर्मिला पछाइ थापा र शंकर गजुरेलले गायन प्रस्तुत गरे । गिता बस्नेत पाण्डे र अमृता गिरी गजुरेलको रुपै मोहनी नारान... बोलको गीतमा प्रस्तुत नाचले धेरैको ध्यान आकृष्ट गरयो ।

उक्त अवसरमा आस्था जोशी, मन्जु शाह, प्रिमा भट्टराई, पुनम गुरुङ, दीपक थापा मैथाने लगायतले पनि नृत्य गरे ।