जेल सजाय भोगेर नेपाल फर्कन लागेका युवाको मृत्यु
क्वालालम्लपुर — मलेसियाबाट स्वदेश फर्कने तयारीमा रहेका एक युवको मंगलबार मृत्यु भएको छ । गैरकानुनी अवस्थामा कार्यरत रहेको अभियोगमा करिब ३ महिनाअघि पक्राउ परेका अंगेश तामाङ मलेसियाको जोहोरस्थित पोन्टेनको फिर्ती केन्द्र (डिपोर्टेसन सेन्टर)मा रहेका र अचानक बिरामी भएपछि उपचारकै क्रममा स्थानीय अस्पतालमा मृत्यु भएको हो ।
दूतावासका द्वितीय सचीव महेश्वर त्रिपाठीका अनुसार तामाङले जेल सजाय पूरा गरिसकेको हुँदा उनी यही मार्च २२ मा स्वदेश फर्केने मिति तय भएको थियो । उनको मृत्युबारे फिर्ती केन्द्रले बुधबार दूतावासलाई जानकारी गराएको हो ।
माझीफेदा गाविस, काभ्रे निवासी तामाङको सेप्टी सक र भाइरस इन्फेक्सनका कारण मृत्यु भएको पोस्टमार्टम रिपोर्टमा उल्लेख छ । ‘स्वदेश फर्काउन हवाई टिकट लिने तयारी भइरहेको थियो । तर, अचानक उनको मृत्यु भएको खबर आयो’ उनलाई स्वदेश फर्काउन दूतावाससँग समन्वय गर्दै आएका नेपाल आदिवासी जनजाति महासंघ मलेसियाका अध्यक्ष पि.टी शेर्पाले भने ।
तामाङको शव नेपालमा जिम्मा लिने परिवार वा आफन्तजनबाट आधिरिक मञ्जुरीपत्र आवश्यक पर्छ । उक्त पत्र प्राप्त भएपछि शव पठाइने दूतावासले जनाएको छ ।
प्रकाशित : चैत्र १, २०७४ १७:३५