ओमनमा एनआरएन क्लवको साधारण सभा
काठमाडौँ — गैरआवासीय नेपाली सामाजीक क्लव, ओमनको वार्षिक साधारण सभा सम्पन्न भएको छ ।
क्लवका अध्यक्ष दीपक श्रेष्ठको सभापतित्वमा सम्पन्न सभाको उद्घाटन गर्दै ओमनका लागि नेपाली राजदूत सर्मिला पराजुली ढकालले ओमनमा कार्यरत नेपालीको हितको लागि दूतावास २४ सै घण्टा क्रियाशील रहेको वताइन् । ‘नेपालीको हितमा सामाजीक क्लवका कार्यमा दूतावासको साथ र समन्वय सधै रहिरहनेछ,’ उनले भनिन्,‘स्थिर सरकार रहेकोले प्रवासमा कार्यरत नेपालीको समस्यालाई समाधानको लागि सम्वोधन गर्न सहज छ ।’
गैरआवासीय नेपाली संघ, अन्तराष्ट्रिय समन्वय समितिका सचिव डिवी क्षेत्रीले मध्यपुर्वमा देखिएका नेपालीको समस्यालाई सम्बोधन गर्न सरकारले ठोस नीति ल्याउनुपर्ने वताए । ‘स्थायी सरकारले आफ्नो कार्यसम्पादन गरिसकेकोले अब सरोकार निकायलाई काम गर्न सहज छ,’ उनले भने ।
मध्यपूर्व संयोजक आर.के शर्माले मध्यपुर्वका रहेका नेपालीका सवाल साझा भएकोले समाधानका लागि संगठीत रुपमा प्रयास गर्न जरुरी रहेको वताए । क्लवका प्रवक्ता बिकल झाका अनुसार सभामा वर्षभरीको गतिविधिमा छलफल भएको थियो । सभामा आर्थिक बिवरण र एक बर्षे कार्यप्रगति बिवरण पेश भएको थियो ।
अध्यक्ष श्रेष्ठले महाधिवेशनवाट पारित घोषणापत्रको समिक्षा गर्नुको साथै पाइपलाईन रहेको एजेन्डालाई कार्यान्वयन गरिनेमा जोड दिए ।
भेलामा समाजसेवामा सहयोग गरेका विभिन्न व्यक्ति तथा संस्थालाई सम्मान गरिएको थियो ।