ओमनबाट ६० घरेलु कामदार उद्धार 

ओमनसँग श्रम, पर्यटन लगायत महत्वपुर्ण सम्झौता गर्ने
कान्तिपुर संवाददाता

काठमाडौँ — ओमनस्थित नेपाली दूतावासले १० महिनामा घरेलु कामदार (हाउसमेड) सहित ६० जना नेपालीको उद्धार गरेको छ । 

नेपाली दूतावासले आफ्नो कार्य प्रगति विवरण सार्वजनिक गर्दै यसबारे जानकारी दिएको हो।

दूतावासले नेपाली कामदारका समस्या पहिचान गरी समाधान र उद्धारलाई प्राथमिकता दिएको जनाएको छ।

‘विश्व राजनीतिमा छुट्टै पहिचान बनाएको ओमनसँगको सम्बन्धलाई थप उचाईमा पुर्‍याउन नेपालले विविध विषयमा सहकार्य गरिरहेको छ,’ दूतावासद्वारा आयोजित कार्यक्रममा राजदूत सर्मिला पराजुली ढकालले भनिन्, ‘हामी छिट्टै ओमनसँग श्रम, पर्यटन लगायत महत्वपूर्ण सम्झौता गर्ने अन्तिम चरणमा छौं।’

दूतावासले वाणिज्य व्यापार तथा लगानी प्रर्वधन गर्न ओमनसँग इन्धन आपूर्ति र हवाई सेवा सम्बन्ध विस्तार गर्ने विषयलाई महत्व दिई काम भइरहेको जनाएको छ। १० महिनाभित्र दुई देशबीचको आर्थिक, सामाजिक, सांस्कृतिक, कूटनीतिक सम्बन्धलाई थप उचाईमा पुर्‍याउन प्रधानमन्त्रीसहितको उच्चस्तरीय भ्रमण तथा ६० वटा महत्वपूर्ण भेटवार्ता भएको दूतावासले जनाएको छ।

दूतावासको समन्वयमा खाडीस्थित नेपाली राजदूतको सम्मेलन, कोलम्बो प्रोसेस र आबुधावी डाइलगको लागि ओमनस्थित कुटनीतिक नियोगसँग छलफल र ओमनमा नेपाली दूतावासको आफ्नै भवन बनाउने सम्भावनाको विषयमा कार्य अगाडि बढेको राजदूत पराजुलीले बताइन्।
‘सुविधायुक्त भवनमा दूतावास राखिएको छ। दूतावासको प्रशासनिक सुधार गर्न दूतावासमा थप स्थानीय कर्मचारी नियुक्ति गरिएको छ। सुरक्षाका लागि दूतावासका प्रत्येक कोठा तथा लबीमा सिसिटिभी जडान गरिएको छ,’ उपनियोग प्रमुख रोजिना ताम्राकारले भनिन्, ‘दूतावासमा नयाँ हटलाईन र नयाँ वेबसाइट संचालन गरिएको छ। नेपालीसँग सहज सम्पर्क बढाउन फेसबुक, वाट्सएप, र ट्वीवर प्रयोगमा ल्याइएको छ।’

ओमनस्थित नेपाली संघसंस्थाका प्रतिनिधिले १० महिने कार्यप्रगतिको प्रशंसा गर्दै आगामी दिनमा नेपालीको हितको विषयमा थप प्रभावकारी बनाउन सुझाव दिए। नेपाली कामदारहरु उमा आचार्य, अनिता तामाङले खाडी मुलुकबाट बिदामा घर जाने महिला घरेलु कामदारलाई आउन नदिएको व्यवस्था दोषपूर्ण रहेको भन्दै त्यसलाई हटाउन दूतावासले पहल गर्न अनुरोध गरे।

सामाजीक कार्यमा सक्रिय डिबी क्षेत्री, देवनारायण तिवारी, छविलाल बस्नेत लगायतकाले दूतावासमा पर्यटन सहचारी राख्नुपर्ने, जनता–जनताबीचको सम्बन्ध विस्तार गर्नुको साथै दूतावासबाटै श्रम स्वीकृति नवीकरण गर्ने सुविधा प्रदान गर्न सुझाव दिएका थिए।

प्रकाशित : चैत्र १३, २०७४ ११:४५
ADVERTISEMENT
प्रतिक्रिया
पठाउनुहोस्
ADVERTISEMENT

निकुञ्जको भावर क्षेत्रमा डढेलो

कान्तिपुर संवाददाता

पर्सा — पर्सा राष्ट्रिय निकुञ्जको दक्षिणी भावर क्षेत्रमा डढेलो लागेको छ । ‘हाल निकुञ्जको चुरेको सिरान भावर क्षेत्रमा बढी डढेलो लागेको देखिएको छ,’ निकुञ्जका प्रमुख संरक्षण अधिकृत हरिभद्र आचार्यले भने, ‘हालसम्म ठूलो नभई स–साना डढेलो लागेका छन् ।’

पर्सा राष्ट्रिय निकुञ्जका विभिन्न स्थानमा फैलिएको डढेलो । तस्बिर : कान्तिपुर

सुक्खा मौसम सुरु भएसँगै डढेलो थोरै देखिएको हुन सक्ने उनले बताए । फागुनदेखि जेठसम्मै यसरी निरन्तर डढेलो लागिरहने उनले बताए । बीच–बीचमा पानी परे डढेलो निभ्न पनि सक्छ । यसपटक हालसम्म पानी नपरेकाले डढेलो चाँडै फैलिरहेको छ । गत वर्ष तुलनात्मक रूपमा डढेलो धेरै स्थानमा लागेको थियो । गत वर्ष एकै दिनमा निकुञ्जमा ६ सय बढी स्थानमा डढेलो लागेको थियो ।

निकुञ्जमा प्रवेश गर्ने गोठालाहरूले चुरोटको ठुटा र सलाई कोरेर फाल्दा डढेलो लाग्ने गरेको छ । यसबाहेक मानवीय गतिविधि नभएका क्षेत्रमा चट्टानहरूको घर्षणबाट आगोको झिल्का उत्पन्न भएर डढेलो लाग्ने गरेको छ । दक्षिणी सिमाना जोडिएको राष्ट्रिय वनबाट पनि वर्षेनी निकुञ्जमा डढेलो सल्किने गरेको छ ।

निकुञ्ज प्रशासनले समेत बर्सेनि यही मौसममा विभिन्न स्थानमा डढेलो लगाउने गर्छ । निकुञ्जभित्रका घाँसे मैदान व्यवस्थित गर्न यसो गरिन्छ । वर्षेनी घाँसे मैदानमा उम्रिने रूख र झारपात जलाएर नमारे त्यसले निकुञ्जको घाँसे मैदानै नष्ट गर्छ । यसो हुँदा बाघ तथा अन्य मांसाहारी जनावरको आहारा प्रजातिका हरिण, चित्तल आदिले चर्ने घाँसे मैदान नष्ट हुने सम्भावना रहन्छ ।

निकुञ्जले विभिन्न घाँसे मैदानमा लगाएको आगो यस वर्ष निभिसकेको र त्यहाँ घाँसको नयाँ पालुवा आउने क्रम पनि सुरु भइसकेको आचार्य बताउँछन् । हाल भावर क्षेत्रमा देखिएको डढेलो प्राकृतिक रहेको उनले बताए । डढेलोले निकुञ्जका ठूला रूख ठूला वन्यजन्तुलाई हानि नगरे पनि सरीसृप र अन्य किराफट्यांग्रालाई भने हानि गर्छ । ठूलो डढेलोले भने रूख बिरुवा र वन्यजन्तु पनि प्रभावित हुन्छन् । ‘यस्तो बेलामा बन्यजन्तु आफ्नो बासस्थान छोडेर अन्यत्र जान्छन्,’ आचार्य भन्छन्, ‘डढेलो निभेपछि उनीहरू बस्दै आएको क्षेत्र/बासस्थानमा पुन: फर्कन्छन् ।’

डढेलो रोकथामकै लागि निकुञ्ज प्रशासनले विभिन्न क्षेत्रमा फायर लाइन पनि बनाएको छ । निकुञ्ज क्षेत्रमा २ सयदेखि २ सय ५० किमि फायर लाइन रहेको उनले बताए । जंगलमा बनाइने यस्ता फायरलाइनका कारण एक भागबाट अर्को भागमा आगो फैलिन सक्दैन ।

प्रकाशित : चैत्र १३, २०७४ ११:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT