न्युजिल्याण्डका सडकमा नेपालको प्रवर्द्धन

नारायण खड्का

अष्ट्रेलिया — अहिले न्युजिल्याण्डको मुख्य शहर क्राइष्टचर्चमा भिन्न किसिमले नेपालको प्रचारप्रसार सुरु गरिएको छ ।

क्राइष्टचर्चको एयरर्पाेट, सेन्ट्रल सिटी मात्र नभएर मुख्य मुख्य स्थानमा नेपाल सम्बन्धि करिब १ दर्जन ‘डिजिटल डिस्प्ले बोर्ड’ राखेर प्रचारप्रसार गर्न थालिएको हो।

एक सातासम्म राखिने यी बोर्डले नेपालको पर्यटन प्रवर्द्धन मात्र गर्ने नभएर न्युजिल्याण्डमा रहेका विदेशीहरुलाई नेपाल घुम्ने र नेपालका हिमशिखरहरुको आरोहण गर्न समेत प्रेरित गर्ने आशा राखिएको छ।

न्युजिल्याण्डमा विगत ४ वर्षदेखि एभरेष्ट डे मनाइदै आइएको छ। नेपाल प्रवर्द्धनको नयाँ उपायले अहिले दैनिक हजारौँ न्युजिल्याण्डवासीको ध्यानाकर्षण गराएको छ।

भुकम्पपछि सुस्ताएको नेपालको पर्यटनलाई राहत दिने उद्देश्य स्वरुम यो कामको थालनी गरिएको आयोजक एनआरएन न्युजिल्याण्डका सचिव विसाल सापकोटाले बताए। यो अभियानलाई नेपाल पर्यटन बोर्डले समेत सहयोग पुर्याएको छ।

एनआरएन न्युजिल्याण्डका सदस्यहरुले डिजिटल बोर्ड राख्ने मात्र नभएर स्थानीय बजार र मलहरुमा गएर नेपाल सम्बन्धि पर्चा पम्प्लेट बाँडिरहेको उनले बताए।

उनका अनुसार एडमण्ड हिलारीले पहिलोपटक सगरमाथाको आरोहण गरेकाले समेत न्युजिल्याण्डवासीहरुले नेपालको पर्यटनमा धेरै चासो दिने गरेका छन्।

प्रकाशित : जेष्ठ १४, २०७५ १६:३४
प्रतिक्रिया
पठाउनुहोस्

रातारात हराए सिमा स्तम्भ

चन्द्र कार्की

पाँचथर — नेपाल–भारत सिमा क्षेत्रको पाँचथरतर्फको १६ वटा साना सिमा स्तम्भ रातारात गायब भएका छन् ।पाँचथर प्रहरीले गरेको सिमा स्तम्भ अवलोकनको क्रममा यतिका परिमाणका साना सिमा स्तम्भ नभेटिएका हुन् । 

नेपाल भारत सिमा पाँचथरको फालेलुङ गाउँपालिका-४ चाररातेमा पहिरोले बगाउन लागेको सिमा स्तम्भ । भारततर्फको पश्चिम बंगाल सरकारले दशगजा आसपास धमाधम सडक निर्माण गरि रहेकाले स्तम्भ पनि हराउने अवस्थामा पुगेका छन् ।  तस्बिर : लक्ष्मी गौतम/कान्तिपुर टिभी

उत्तरपूर्वी पाँचथरको याङवरक गाउँपालिका–१ र २, फालेलुङ गाउँपलिकाको–३, ४ र ७ नम्बर वडा भारतको सिक्किम र पश्चिम बंगाल राज्यसँग सिमाना जोडिएको छ । पाँचथर तर्फको ४४ दशमलव ३८ किलोमिटर सिमा क्षेत्रमा रेहका १ सय १३ वटा सिमा स्तम्भ (पिलर) थिए ।

यहाँ रहेका १ सय ३ साना सिमा स्तम्भ मध्ये १६ वटा हराएको जिल्ला प्रहरी कार्यालय पाँचथरका प्रमुख प्रहरी नायब उपरीक्षक वामदेव गौतमले बताए ।

प्रहरीले यो क्षेत्रमा १६ दिन लगाएर सिमा स्तम्भको अध्ययन गरेको थियो । अध्ययनका क्रममा १ सय ३ साना सिमा स्तम्भ मध्ये ८७ वटा मात्र फेला परेको प्रहरी प्रमुख गौतमको भनाई छ ।

त्यसमा पनि १२ वटा सिमा स्तम्भको निशाना नै पत्ता नलागेको, ४ वटाको स्तम्भ गाडिएको स्थानसम्म फेला पारिएको अवलोकन टोलिमा संलग्न प्रहरीको भनाई छ ।

फेला परेका सिमा स्तम्भ पनि मर्मत सम्भार गर्नुपर्ने अवस्थामा रहेको छन् । अधिकांश स्तम्भ पुराना भएर ढलेका तथा ढल्ने अवस्थामा छन् भने केही सिमा स्तम्भ पहिरोले बगाउन लागेको अवस्थामा छन् ।

प्रहरीका अनुसार मानिस र घरपालुवा जनावर पुग्न नसक्ने दुर्गम स्थानका सिमा स्तम्भ अन्य भन्दा राम्रै अवस्थामा भेटिएका छन् । सडक पुगेको, चौरी गाईको चरन क्षेत्र र पर्यटकको आवगमन बढी हुने स्थानका सिमा स्तम्भ हराएका र जीर्ण अवस्थामा रहेको प्रहरीले जनाएको छ ।

सिमा क्षेत्रसँगै रहेको पर्यटकीय स्थल फालोट क्षेत्रमा अन्तरिक तथा बाह्य पर्यटकको आवगमन बढी हुने गरेको छ ।

यहाँ घुम्न आउने आन्तरिक तथा बाह्य पर्यटकले सिमा स्तम्भमा चढ्ने, पिलरलाई हल्लाउने जस्ता कार्य गर्नाले त्यो क्षेत्रका स्तम्भहरु थप असुरक्षित रहेको याङवरक गाउँपालिका–१, च्याङथापुका मंगल बहादुर बेघाले बताए ।

जीर्ण अवस्थामा रहेका स्तम्भमा चौरी गाईहरु रगटिने कारणले पनि स्तम्भ जीर्ण बन्न पुगेको प्रहरीको भनाई छ । ‘जीर्ण अवस्थामा रहेका कतिपय स्तम्भहरुमा हामीले चौरी गाई रगटिएको निशाना र चौरी गाईको रौंहरु भेटेका थियौं ।’ बेघाले भने ।

सिमा स्तम्भको दशगजा वरपर दुवै पक्षले कुनै संरचना निर्माण गर्न नहुने भएपनि भारतीय पक्षबाट सिमा स्तम्भ नै धरापमा पर्ने गरी सडक निर्माण गरिँदा कतिपय स्तम्भ जोखिममा परेका छन् ।

याङवरक गाउँपालिका–२, को तिम्बुङ पोखरीदेखि फालेलुङ गाउँपालिका–७, को सन्दकपुर आहाल छेउ सम्मको पाँचथर तर्फको सिमा क्षेत्रमा ३५ नम्बर देखि ५७/२ नम्बर सम्मका सिमा स्तम्भ रहेका छन् ।

कार्यालयको आन्तरिक अभिलेखलाई चुस्त, दुरुस्त राख्न पाँचथर प्रहरीले केही दिनअघि १६ दिन लगाएर सिमा क्षेत्र तथा सिमा स्तम्भहरुको अवलोकन गरेको प्रहरी नायब उपरीक्षक गौतमले बताए । भारतीय पक्षबाट नियमित रुपमा सिमा क्षेत्रको अनुगमन भएपनि नेपाल पक्षबाट भने आक्कल–झुक्कल मात्र अनुगमन हुने गरेको छ ।

प्रहरीको टोलीले सीमा स्तम्भको अवस्था, सीमा क्षेत्रको अवस्थाबारे पनि अवलोकन गरेको थियो । अवलोकनले तत्काल सीमा स्तम्भ मर्मत र संरक्षण गर्नुपर्ने देखाएको छ ।

तीन प्रकारका पिल्लरमध्ये जंगे र मझौला भन्दा साना पिल्लरको संरक्षण तत्काल थाल्नुपर्ने अवस्था छ । प्रहरी टोलीले दुई चरणमा सीमा सर्वेक्षण गरेको थियो ।

प्रकाशित : जेष्ठ १४, २०७५ १५:५२
पूरा पढ्नुहोस्
प्रतिक्रिया
पठाउनुहोस्