भिजिट नेपाल २०२० : हङकङमा वार्मअप

किसन राई

हङकङ — नेपाल पर्यटन वर्ष २०२० ‘भिजिट नेपाल २०२०’ सफल बनाउन वार्मअपको रुपमा नेपाल पर्यटन बोर्डले ३२औँ हङकङ अन्तर्राष्ट्रिय ट्राभल एक्सपोमा सहभागिता जनाएको छ ।

Yamaha

चार दिने एक्सपोको समापनको दिन बोर्डका निर्देशक मणिराज लामिछानेले हङकङलगायत चीनबाट आइरहेका पर्यटन संख्या दोब्बर बनाउने उद्देश्य अनुरुप सहभागिता जनाइएको र सफल भएको दावी गरेका छन् ।

‘२० लाख पर्यटन भित्र्याउने लक्ष्यसहित घोषणा गरिएको भिजट नेपाल २०२० को वार्मअपको रुपमा सहभागी भएका हौँ’, लामिछानेले भने, ‘हाल हङकङलगायत चीनबाट आइरहेका पर्यटन संख्या दोब्बर बनाउने उद्देश्य अनुरुप सहभागिता जनाइएको थियो जुन सफल भएको छ ।’

नेपाल पर्यटन बोर्डको स्टलमा नेपाल वायु सेवा निगम र चारवटा ट्राभल्स कम्पनीका छुट्टाछुट्टै सबस्टल रहेका थिए । निगमले प्रर्वद्धनात्मक हवाई भाडा र ट्राभल्स कम्पनीहरुले टुर प्याकेज लगायतका सामग्रीहरु वितरण र जानकारी गराएका थिए ।

बोर्डका प्रवर्द्धन अधिकृत प्रदीप बस्नेतका अनुसार नेपालमा भूकम्प र नाकाबन्दीको असर विश्वले बिर्सिसकेको छ । चार दिनको प्रदर्शनीमा कुनै पनि सहभागीले यस विषयमा प्रश्न गरेनन् र जिज्ञासा पनि राखेनन् । सो अवसरमा नेपालको पर्यटन क्षेत्रको जानकारीमूलक सामग्री निशुल्क वितरण समेत गरिएको थियो ।

नेपाल घुम्न र हेर्नका लागि प्याकेज टुरको बारेमा निकै जिज्ञासा राखिएको सिनेक एडभेन्जरका निर्देशक खेमकुमार निरौलाले अनुभव सुनाए । उनका अनुसार टुर प्याकेजको प्रर्वद्धन गर्न सके नेपाल घुम्न आउने पर्यटकको संख्या बढाउन सहयोग पुग्ने छ ।

प्रकाशित : असार ४, २०७५ १५:४७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मकाओमा आत्महत्या प्रयास गर्नेलाई कन्सुल जनरलले भेटे

किसन राई

हङकङ — मकाउमा आत्महत्याको प्रयास गर्ने ईश्वर थिङलाई नेपाली कन्सुल जनरल कमलप्रसाद भट्टराईले भेटेका छन् । प्रहरीको कडा निगरानीमा स्थानीय सान्तोङ अस्पतालमा उपचाररत उनीसंग कसैलाई भेट्न दिइएको थिएन ।

उपचाररत ईश्वर थिङलाई भेट्न पुगेका नेपाली कन्सुल जनरल कमलप्रसाद भट्टराई र एनआरएनए मकाउकी अध्यक्ष शान्ति अधिकारी ।

कन्सुल जनरल भट्टराईसंगै रहेकी गैरआवासीय नेपाली संघ (एनआरएनए) की अध्यक्ष शान्ति अधिकारीका अनुसार थिङको अवस्था सामान्य रहेको छ । घाटीको घाउमा खाटा बसिसकेको भएपनि प्लास्टिकको पाइप लगाइएकोले बोल्न कठिनाइ रहेको छ ।

उपचारकै क्रममा पनि उनले आत्महत्याको प्रयास गरेको चिकित्सकले बताएका छन् । घाटीमा प्वाल पारेर लगाइएको प्लास्टिकको पाइप निकालेर फ्याकेको कारण उनको उपचारमा ढिलाइ भएको हो ।
उपचारपछि स्थानीय कानुन अनुसार उनीमाथि छानबिन हुने छ । आत्महत्या पनि अपराध हुने भएकोले सोही बमोजिमको कार्वाही हुने संभावना छ । कार्वाही पश्चात् उनलाई मकाउ निकाला गरिने छ, उनी स्वयं पनि नेपाल फर्कन चाहन्छन् ।

उनलाई पठाउने काठमाडौंस्थित देवान कन्सल्टेन्ट्स प्रालिले मकाउ आउन लागेको सम्पूर्ण रकम फिर्ता दिने आश्वासन दिएको छ । मकाउ प्रतिनिधि एल.जे. लामेइरसले उक्त कम्पनीसंग सम्पर्क भइरहेको बताएका छन् ।
कागजी रुपमा देवान कन्सल्टेन्ट्स प्रालि भए पनि काठमाडौंका विशाल थपलिया र मकाउका युवराज न्यौपानेमार्फत सम्पर्क भएको कारण सम्पूर्ण रकम फिर्ता हुनेमा भुक्तभोगीहरु आशंका व्यक्त गर्छन् ।

अघिल्लो महिना मात्र कामको लागि आइपुगेका २६ वर्षीय ईश्वर थिङ मकवानपुरका हुन् । १२ लाख खर्च गरेर आएका उनी सम्झौता अनुसार सुविधा नभएपछि खुसी नभएको निकटकाले बताउने गरेका छन् । ग्लोबल सेक्युरिटि म्यानेजमेन्ट लिमिटेडमा कार्यरत १२ जनालाई एउटै फ्लाटमा कोचिएको उनले गुनासो सुनाउने गरेका थिए ।

काममा लागेको केही दिनमै विरामी विदामा बसेपछि कम्पनीबाट दुर्व्यवहार र मानसिक यातना दिइएको सहकर्मीहरुलाई उनले बताउने गरेका थिए । अनुसन्धान भइरहे पनि घटनाको कारण मानसिक यातना र अनावश्यक दवाव रहेको अनुमान गरिएको छ । आत्महत्याको प्रयासमा उनले ज्येष्ठ १९ का दिन कोठामै चक्कुले घाटी रेटेका थिए ।

प्रकाशित : असार ३, २०७५ १२:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT