हङकङमा नेपालीलाई सरकारी सम्मान

नेपाल आदिवासी जनजाती महासंघ हङकङका निवर्तमान अध्यष मैनबहादुर थापालाई चिफ एक्जिक्युटिभ्स कमेन्डेसन फर कम्युनिटि सर्भिसबाट सम्मानित हुन लागेका हुन् ।

हङकङ स्थापना दिवसको दिन घोषणा गरी चीनको राष्ट्रिय दिवसको दिन प्रदान गरिने सम्मान लिस्टमा थापाको नाम प्रकाशित गरिएको छ । उनी मेम्बर अफ वर्किङ ग्रुप अन इथ्निक अफेयर्स अफ याउचिममोङ डिस्ट्रिक काउन्सिलका सदस्य समेत रहेका छन् ।

गृह मामिला विभागको विभिन्न समितिमा बसेर कार्य गरिरहेका थापा यसअघि विभिन्न निकायहरुबाट सम्मानित भइसकेका छन् । मगर संघ तथा क्षेत्रीय संघसंस्थाको नेतृत्व गरिसकेका थापाले हङकङ सरकारको सम्मानबाट सामाजिक कामका लागि उर्जा मिलेको बताए ।

पुख्र्यौली स्याङजा भइ बुटवलका ४९ वर्षीय थापा २० वर्ष अघि यहाँ आएका हुन् । विभिन्न संघसंस्थामा सक्रिय उनी सबै भन्दा ठूलो पार्टी डेमोक्रेटिक एलायन्स फर बेटरमेन्ट एण्ड प्रोग्रेस अफ हङकङ (डीएबी)का सदस्य हुन् ।

अहिलेसम्म उक्त सम्मानबाट सम्मानित हुने १२ जना नेपालीमा ८ जना डीएबीका सदस्यहरु रहेका छन् ।