सिड्‌नीमा ओसिनिया क्षेत्रका विज्ञहरुको सम्मेलन हुने

कान्तिपुर संवाददाता

अष्ट्रेलिया — अष्ट्रेलियाको सिड्नीमा पहिलोपटक ओसिनिया क्षेत्रमा रहेर विभिन्न क्षेत्रहरुमा सफलता हासिल गरेका विज्ञहरु सम्मिलित सम्मेलनको आयोजना हुने भएको छ ।

सम्मेलनबाट उनीहरुले जानेको सीप र ज्ञानलाई नेपालको विकासमा प्रयोग गर्न सकिने माध्यमहरुको बारेमा खोजी समेत गरिने भएको छ ।

Yamaha


यही सेप्टेम्बरको १५ तारिखमा आयोजना हुन लागेको कार्यक्रममा अष्ट्रेलिया, न्युजिल्याण्ड, पपुवान्युगिनी, फिजी लगायतका ओसिनिया क्षेत्रमा रहेका विभिन्न विधामा विज्ञता हासिल गरेका विज्ञहरुको सहभागिता रहने आयोजकले जनाएको छ ।

एनआरएनको ओसिनिया क्षेत्रले आयोजना गर्न लागेको कार्यक्रमको मुख्य उद्देश्य नै विदेशमा रहेको सीप र ज्ञानलाई कसरी आफ्नो देशको विकासमा पुर्‍याउन सकिन्छ भन्ने रहेको आयोजक तथा ओसिनिया संयोजक धर्मराज अधिकारीले बताए ।

उनले पहिलोपटक आयोजना गरिएको यस कार्यक्रमबाट निकालिएको निष्कर्ष भर्खरै संघीयतामा गएको नेपालका लागि अत्यन्तै महत्वपुर्ण हुने दाबी समेत गरे ।

अधिकारीका अनुसार कार्यक्रममा पूर्वाधार विकासका साथै कृषि, रेलवे निर्माण, सुरुङ मार्ग, स्वास्थ्य, शिक्षा, खाद्य सुरक्षा लगायतका क्षेत्रहरुमा काम गरिरहेका विज्ञहरुले सहभागिता जनाउनेछन् ।

कार्यक्रमको निष्कर्षले यही अक्टोबरमा काठमाडौंमा दुई दिनसम्म हुन लागेको एनआरएन विश्व विज्ञ सम्मेलनलाई ठोस सहयोग र सल्लाह पुर्‍याउने विश्वास आयोजकले लिएको छ । कार्यक्रममा विभिन्न विषयहरुमा कार्यपत्र समेत प्रस्तुत गरिनेछ ।

प्रकाशित : भाद्र १०, २०७५ १५:३१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

नेप्लिज नर्सिङ एसोसिएसन यूकेले जुम्लामा मातृशिशु केन्द्र बनाउने 

कान्तिपुर संवाददाता

लन्डन — नेप्लिज नर्सिङ एसोसिएसन यूकेले जुम्लाको सिन्जा गाउँपालिकास्थित भादगाउँमा मातृशिशु केन्द्र बनाउन एक च्यारिटी गर्दै आफ्नो दसौँ वार्षिकोत्सव मनाएको छ ।

एसोसिएसनले सिन्धुपाल्चोक र गोरखामा एक एक वटा विद्यालय निर्माण गरिसकेपछि जुम्लाको मातृशिशु केन्द्र तेस्रो महत्वाकांक्षी प्रोजेक्टका रुपमा लिएको हो ।

एसोसिएसनकी अध्यक्ष प्रसुना कँडेलले मातृशिशु केन्द्र बनाउन करिब ६० लाख (४२ हजार पाउण्ड) आवश्यक भएकामा हालसम्म च्यारिटीसहित चन्दाबाट करिब २० हजार पाउण्ड संकलन भएको जनाइन् ।

कार्यक्रमका प्रमुख अतिथी राजदूत डा. दुर्गाबहादुर सुवेदीले बेलायतका नेपाली नर्सहरु नेपालको स्वास्थ्य क्षेत्रको विकास र ग्रामीण भेगमा सिमान्तकृत बासिन्दाको स्वास्थ्य सेवामा निरन्तर लागि रहेकामा प्रशंसा गर्दै उनीहरुको प्रतिष्ठित र सम्मानित पेशा समस्त नेपालीले गौरव गर्ने पेशा भएको उल्लेख गरे ।

कार्यक्रममा नेप्लिज डक्टर्स एसोसिएसन (एनडिए) यूकेका अध्यक्ष डा. सविन जोशी, रोयल कलेज अफ नर्सिङका डेपुटी प्रेसिडेन्ट रड थोम्पसन, एनआरएनए यूकेका अध्यक्ष योगकुमार फगामी लगायतले एशोसिएसनले नेपाल र बेलायतमा गरेका मानवीय कार्यको खुलेर प्रशंसा गरेका थिए ।

कार्यक्रममा संस्था स्थापनाको दशक लामो अवधिमा महत्वपूर्ण योगदान पुर्‍याउने संस्थापक अध्यक्ष अजिता सिम्खडा, पूर्व अध्यक्षत्रय शान्ता संग्रौला, बासु लामिछाने र सुशीला कार्की, सल्लाहकारहरु टुका स्याण्डवेल क्षत्री, मन सुनुवार, राजेन्द्र क्षत्री लगायतलाई विशेष सम्मान गरियो ।

एसोसिएसनले नेपालका चर्चित हांस्यव्यंग्य कलाकार एवं साहित्यकार शैलेन्द्र सिम्खडालाई पनि सम्मान गरेको थियो ।

प्रकाशित : भाद्र १०, २०७५ १४:४५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT