लन्डनमा नेपाल बिर्साउने मेला

एम्बासडर कप लमजुङ समाज यूकेलाई
नवीन पोखरेल

लण्डन — दिनभर परिरहेको झरी पर्वाह नगरि आइतबार केम्पटन पार्क रेस कोर्समा हजारौं नेपाली ओइरिए । बेलायतका नेपालीलाई तानेको थियो नेपाली मेलाले । नेपालमै दुर्लभ लाग्ने साँस्कृतिक झांकी, नृत्य र भेषभुषाले ‘मिनी नेपाल’ झैं लाग्थ्यो त्यहाँको माहोल ।

मेलामा दुई दर्जन नेपाली संघसंस्थाले झाँकी र करिब डेढ दर्जनले नृत्यमा प्रतिष्पर्धा गरेर आफ्नो मौलिक कला सँस्कृति उजागर गरे।

Yamaha

सोरठी, घाँटु, बालन, लाखे, कृष्ण चरित्र नाच, धान नाच, चुडका, कौडा, रत्यौली देखि तीज र टहोंटे पर्व झल्काउने मौलिक प्रस्तुतिले रंगीयो रेस कोर्स। झांकीमा नेपालमै दुर्लभ ढिकी जांतो, डोको नाम्लो, हलो जुवा, कुटो कोदालो, स्याखु, चर्खा, राडी, गुन्द्री, चर्खा, ठेकी मदानी जस्ता करिब तीन दर्जन सामाग्री देखाएर लमजुङ समाज यूकेले नेपालमात्र बिर्साएन, एम्बासडर कप नै जित्यो।

‘मेलामा सिंगो नेपाल झल्किएको आभास हुन्थ्यो’, मेला हेर्न पुगेकी एकजना दर्शक अलिसा सुवेदीले भनिन्, ‘यसले नेपाली कला संस्कृति जगेर्नामा अवश्य टेवा पुग्नेछ।’

ति दर्शकले भनेजस्तै उद्देश्य लिएर तमुधिं यूकेले लन्डनस्थित नेपाली दूतावास र अन्य संघसंस्थाको सहकार्यमा गरेको हो दशौं नेपाली मेला। मेलाले नयां पुस्तामा नेपाली भाषा, कला र संस्कृति हस्तान्तरण हुने आशा समेत तमुधिं यूकेको छ। बेलायतमा नेपालीले गर्ने ‘इभेन्ट’ मध्ये गोर्खा कप पछि वृहत मानिन्छ नेपाली मेला। सन् २००९ देखि वर्षेनी नेपाली मेला हुंदै आएको छ।

मेला अवलोकन गर्न बेलायतका लागि यमन, इराक, यूएइ, उज्वेकिस्तान, ट्युनिसियाका राजदूतहरु एवं बहमास, बंगलादेश, जोर्डन, रोमानिया, माल्दिभ्स, केन्या, इजिप्ट, स्वाजील्याण्ड, आइसल्याण्ड, एल साल्भाडोर, ताजिकिस्तान, बुल्गेरियाबाट प्रतिनिधित्व गर्ने विभिन्न तहका कुटनीतिज्ञ र बेलायतको विदेश मन्त्रालय (एफसीओ) का प्रतिनिधि पनि प्रत्यक्ष सहभागी थिए। कुटनीतिज्ञ निम्त्याउने चांजोपांजो नेपाली दूतावासले गरेको हो।

सम्वोधनका क्रममा राजदूत डा. दुर्गाबहादुर सुवेदीले नेपाली मेला बेलायतको नेपाली समाजमा एउटा इतिहास, पर्व र अभिन्न अंग भइसकेको बताए। ‘मेला नेपाली संस्कृतिको रुपमा परिचित भइसकेको छ र यसले बेलायतभर छरिएर रहेका नेपालीमाझ एकता र भातृत्वको सन्देश दिएको छ’, राजदूतले भने।

केक काटेर मेलाको दशौं संस्करण मनाइरहँदा आयोजक तमुधिं यूके अध्यक्ष ज्ञाम गुरुङले मेला आयोजनाको उद्देश्य प्रकाश पार्दै यसलाई जीवन्त राख्न समस्त नेपालीको अठोट आवश्यक रहेको औंल्याए।

मेला संयोजक हितकाजी गुरुङले सहयोगीप्रति आभार व्यक्त गरे।

मेलामा प्रमुख आकर्षण बन्यो झाँकी र नृत्य। उत्कृष्ट झाँकी र नृत्य गरि लमजुङ समाज यूकेले एम्बासडर कप जित्यो भने सिक्लेस पार्चे समाज यूके दोश्रो र घान्द्रुक वेलफेयर सोसाइटी यूके तृतीय भए। सांस्कृतिक नृत्यमा घान्द्रुक समाज यूके प्रथम, लमजुङ समाज यूके दोश्रो र सिक्लेस पार्चे समाज यूके तेश्रो भयो।

झाँकी तथा नृत्य प्रतियोगितामा उत्कृष्ट हुने संस्थालाई नेपाली दूतावास लन्डनले सन् २०१० देखि प्रायोजन गर्दै आएको एम्बासडर कप र गत वर्ष देखि एनआरएनए यूकेले प्रायोजन गरेको एनआरएनए यूके कप, मेडल, प्रमाणपत्र र ११ सय पाउण्ड नगद प्रदान गरियो। साथै, उपविजेतालाई ७ सय पाउण्ड र तेश्रो हुनेले ५ सय पाउण्ड नगद, मेडल र प्रमाणपत्र पाए। त्यस्तै नृत्य तर्फको प्रथम हुने समूहलाई ५ सय पाउण्ड, दोश्रोलाई ४ सय पाउण्ड र तेश्रोलाई तीनसय पाउण्ड प्रदान गरिएको थियो।

उक्त प्रतियोगिताको निर्णायक मण्डलमा संयोजक एकेन्द्र गुरुङ र अन्य विभिन्न क्षेत्रको प्रतिनिधित्व गर्ने व्यक्तिहरु अतिप्रसाद पुन, तारा गुरुङ, नरेश खपांगीमगर, उत्तरमान लिम्बु र सनमकुमार बैराग निर्णायकमा थिए।

मेला सफल बनाउन ६५ सदस्यीय तयारी समितिले तीन महिना यता निरन्तर गृहकार्य गरिरहेको थियो। मेला सफलताका लागि नेपालका उपराष्ट्रपति, परराष्ट्रमन्त्री र तमुधिं यूके संरक्षक शेष घलेले शुभकामना पठाएका थिए।

तस्विर सौजन्य: मिलन तमु

Esewa Pasal

प्रकाशित : भाद्र ११, २०७५ १८:३३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

मृत्यु भएका आफन्तलाई क्षतिपूर्ति र रोजगारी दिने सहमतिपछि ओखरपौवा शान्त 

कृष्ण थापा

नुवाकोट — ककनी गाउँपालिका-१ महालक्ष्मीस्थानमा गाडीको ठक्करले एक स्थानीयको मृत्यु भएको नौ घण्टापछि आन्दोलित स्थानीयबासी र सरोकारवाला निकायबीच दुई बुँदे सहमति  भएको छ । सहमतिसँगै आन्दोलन मथ्थर भएको छ ।  

सहमतिमा मृतक छोरा राजु बलामीलाई महानगरपालिकाले रोजगारी दिलाउने र २० लाख रुपैयाँ क्षतिपूर्ति दिने भएपछि आन्दोलन टुंगोमा पुगेको प्रहरीले जनाएको छ । मृतकका आफन्तले शव बुझेर पोष्टमार्टमका लागि काठमाडौं लगेका छन् ।

सोमबार बिहान पैदल हिँडिरहेका ककनी गाउँपालिका-१ का ४५ वर्षीय स्थानीय बासिन्दा पदम बलामीलाई बा२ख ६११८ नम्बरको टिपरले ठक्कर दिँदा उनको घटनास्थलमा मृत्यु भएको थियो । उक्त टिपर सोमबार पौने आठ बजे फोहोर फाल्न काठमाडौंबाट सिसडोलतर्फ जाँदै गर्दा उक्त घटना भएको प्रहरीले जनाएको छ ।

टिपर सञ्चालक र काठमाडौं महानगरपालिका वातावरण विभाग प्रमुख हरि कुँवर र पीडित पक्षका तर्फबाट ककनी गाउँपालिका १ र २ का वडाध्यक्षहरु चन्द्रबहादुर बलामी र केदार पौडेल र मृतकका आफन्तबीच सहमति भएको छ ।

घटना भए लगतै स्थानीयबासीले फोहोर फाल्न गएका गाडीहरुलाई रोकेका थिए । आक्रोसित स्थानीयबासीले उक्त टिपरको सिसा फुटालेको प्रहरीले जनाएको छ । फरार टिपर चालक प्रहरीको नियन्त्रणमा आइसकेका छन् । त्यसैगरी जिल्लाबाट खटिएको प्रहरी टोली पासाङ ल्हामुमार्गको ककनी गाउँपालिका-१ चिसोपानीधारामा तीन घण्टा पहिरोमा परेको थियो ।

पहिरो पन्छाउँदै प्रहरी घटनास्थल पुगेको थियो । स्थिति तनावग्रस्त भएपछि साम्य पार्न काठमाडौंदेखि प्रहरी परिचालन गरिएको थियो । काठमाडौं उपत्यकाको फोहोर १३ वर्षदेखि ओखरपौवाको सिसडोलमा फालिँदै आइएको छ । त्यहाँ दैनिक ८० भन्दा बढी गाडी सिसडोलमा फोहोर फाल्न आवतजावत गर्छन् ।

प्रकाशित : भाद्र ११, २०७५ १८:३२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT