राजदूत शेर्पा अस्ट्रेलियामा

नारायण खडका

अस्ट्रेलिया — आफ्नै पूर्व कर्मचारीबाट रकम लिएर अस्ट्रेलिया ल्याएको आरोप लागेपछि अनुसन्धानका लागि नेपाल बोलाइएकी अस्ट्रेलियाका लागि नेपाली राजदूत लक्की शेर्पा अस्ट्रेलिया फर्किएकी छन् ।

दुईदिनअघि अस्ट्रेलिया फर्किएपनि उनी आफ्नो कार्यभार सम्हाल्न दूतावास पुगेकी छैनन् । राजदूत शेर्पाको अनुपस्थितिमा कार्यभार सम्हालेकी उपनियोग प्रमुख दु्रपदा सापकोटाले नै अहिले पनि कार्यवाहकको जिम्मेवारी सम्हालिरहेकी छन् ।

राजदूत शेर्पाले आफूलाई सन्चो नभएको र केही दिन आराम गर्ने बताएपछि कूटनीतिक मर्यादा अनुरूप अस्ट्रेलियास्थित परराष्ट्र मन्त्रालय (डिफ्याट) लाई उनी आएको औपचारिक जानकारी नदिइएको स्रोतले कान्तिपुरलाई बतायो । दूतावासका कर्मचारीहरूले पनि राजदूत शेर्पा कहिले कार्यालय फर्किने बारेमा अनभिज्ञता प्रकट गरे ।

दूतावासका पूर्व कर्मचारी बाङछु शेर्पाले उनलाई आफूसँग पैसा लिएर अस्ट्रेलिया ल्याएको लगायतका आरोपहरू लगाएपछि उनलाई परराष्ट्र मन्त्रालयले अनुसन्धानका लागि करिब १ महिनाअघि फिर्ता बोलाइएको थियो ।

मन्त्रालयमा बोलाइएपछि अनुसन्धान समिति नै बनाएर छानबिन गरिएको सार्वजनिक भए पनि त्यसको निष्कर्ष अहिलेसम्म बाहिर ल्याइएको छैन । राजदूत शेर्पामाथि भइरहेको छानबिनका बारेमा विभिन्न सञ्चारमाध्यमहरूमा यसपहिले फरक फरक समाचारहरू आएपनि उनलाई राजदूतकै रूपमा सरकारले अस्ट्रेलिया फर्काएको हो वा होइन भन्ने बारेमा खुल्न सकेको छैन । प्रतिक्रियाका लागि राजदूत शेर्पालाई सम्पर्क गर्दा सम्पर्क हुन सकेन ।

राजदूत शेर्पाले आफूमाथि लागेको आरोपको पटक पटक खण्डन गर्दै आएकी छन् । उनले वाङछु शेर्पाले लगाएको सबै आरोप निराधार र झुटो रहेको दाबी गर्दै आएकी छन् ।

सरकारबाट राजदूतप्रति भएको छानबिनको औपचारिक निर्णय सार्वजनिक नभएको र मन्त्रीहरूबाट फरक फरक धारणाहरू आइरहेको सन्दर्भमा राजदूतको फिर्तीलाई यहाँका नेपालीहरूले चासोका साथ हेरेका छन् ।

प्रकाशित : माघ ३, २०७५ १५:३१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अब देश विकासको तीव्र गतिमा अघि बढ्छ : प्रधानमन्त्री 

कान्तिपुर संवाददाता

काठमाडौँ — प्रधानमन्त्री केपी शर्मा ओलीले सरकारको एक वर्ष कानुन निर्माण र अन्य तयारीमा बितेको उल्लेख गर्दै अब देश विकासको तीव्र गतिमा अघि बढ्ने बताएका छन् ।

बिहीबार किर्तिपुर नगरपालिका चोभारमा सुख्खा बन्दरगाह शिलान्यास गर्दै प्रधानमन्त्री ओलीले भने,‘संविधान थियो कानुन थिएन । त्यसले गर्दा एकवर्ष हामीले कानुन बनाउने काममा बितायौँ । अब हामीले काम गर्ने वातावरण बनाएका छौँ । अब देश तीव्र गतिमा अघि बढ्छ । ’

कितिर्पुर नगरपालिकाको साबिक हिमाल सिमेन्ट कारखानाले चर्चेको चोभारस्थित ११ दशमवल ७७ हेक्टर जग्गामा करिब १ अर्ब ४८ करोड ३४ लाख रुपैंयाको लागतमा बन्दरगाह सम्पन्न हुने लक्ष्य लिइएको छ ।

बन्दरगाह शिलन्यास गर्दै प्रधानमन्त्री ओलीले अब काठमाडौ‌ंका लागि उपभोग्य वस्तुको अभाव नहुने बताए । दक्षिण र उत्तरबाट आउने रेलले ल्याउने सामानको भण्डारण कक्षको रूपमा बन्दरगाह उपयोग हुने प्रधानमन्त्री ओलीको भनाइ छ ।

उनले स्थानीयवासीका गुनासा र भनाइ सम्बन्धित निकायमा जानकारी गराउन आग्रह गर्दै सरकारले त्यसलाई सकारात्मक ढङ्गले लिने बताए । प्रधानमन्त्री ओलीले बन्दरगाह निर्माणले स्थानीवासीका लागि रोजगारीका धेरै अवसर सिर्जना हुने बताए । उनले निर्माण कर्ता कम्पनीलाई समयमै काम सक्न आग्रह गरेका छन्।

यो पनि पढ्नुहोस्ः

प्रकाशित : माघ ३, २०७५ १५:०२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT