कांग्रेसको बेल्जियम अधिवेशन स्थगित

कान्तिपुर संवाददाता

काठमाडौँ — कांग्रेसको बेल्जियमस्थित जनसम्पर्क समितिको पाँचौ अधिवेशन स्थगित भएको छ । जनसम्पर्क समिति बेल्जियमकी अध्यक्ष सीता सापकोटाले शनीबार विज्ञप्ति जारी गर्दै अधिवेशन स्थगित भएको जानकारी दिएकी हुन् ।

उनका अनुसार यही आइतबार हुने भनिएको अधिवेशन कांग्रेस केन्द्रीय कार्यसमितिको निर्देशन अनुसार स्थगित गरिएको हो । अर्को सूचना जारी नभएसम्म अधिवेशन नगराउन केन्द्रीय कार्यालयले हालै परिपत्र गरेको थियो ।

'केन्द्रसँगको परामर्श र सम्बन्धित सबै पक्षको छलफल, सल्लाह, सहमति र सहभागितामा यस समितिको पाँचौ अधिवेशन यथासक्य छिटो सम्पन्न गरिने जानकारी गराउँछौं' अध्यक्ष सापकोटाद्वारा जारी विज्ञप्तिमा उल्लेख छ ।

प्रकाशित : फाल्गुन १८, २०७५ १४:३८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

रवीन्द्रको क्षेत्रमा उठ्दिँन, कुप्रचार नगरियोस् : वामदेव 

कान्तिपुर संवाददाता

काठमाडौँ — सत्तारूढ नेकपाका नेता वामदेव गौतमले हेलिकोप्टर दुर्घटनामा निधन भएका पर्यटनमन्त्री रवीन्द्र अधिकारीको निर्वाचन क्षेत्रमा उपचुनाव हुँदा आफू उम्मेदवार नहुने बताएका छन् । उनले शनिबार विज्ञप्ति जारी गरी स्वर्गीय अधिकारीको निर्वाचन क्षेत्र कास्की-२ मा आफू उम्मेदवार हुन लागेको भनेर दुष्प्रचार सुरु गरिएकामा आपत्ति जनाउँदै खण्डन गरेका हुन् ।

उनले पार्टीले आफूलाई उम्मेदवार बनाउने निर्णय गरेको खण्डमा पनि त्यसलाई स्वीकार नगर्ने उल्लेख गरेका छन् । 'श्रद्धाञ्जली दिन पोखरा पुगेको घटनालाई आधार बनाएर मलाई दिवंगत रवीन्द्रको निर्वाचन क्षेत्रबाट उम्मेदवार बन्ने आशा राखेको आरोप लगाइएको छ । यो मेरो चरित्र हत्या गर्ने निकृष्ट र षडयन्त्रमूलक विचार राखेर सुरु गरिएको कुप्रचारमात्र हो' उनले विज्ञप्तिमा भनेका छन् ।

उनले मृत्युको शोकबाट आफूले व्यक्तिगत लाभ लिने काम कहिल्यै नगरेको र अब पनि नगर्ने उल्लेख गरेका छन् । गौतमले रवीन्द्रको खाली भएको निर्वाचन क्षेत्रमा उनकै परिवारबाट उम्मेदवार बनाउनुपर्ने धारणा अघि सारेका छन् ।

'मृत्यु शोकमा पाइला टेकेर व्यक्तिगत स्वार्थ पूरा गर्ने विचारलाई मैले कहिल्यै मान्यता दिइन । जीवनभर दिने पनि छैन' गौतमले विज्ञप्तिमा भनेका छन्, 'मेरो इच्छाविपरीत पार्टीले निर्णय गरे छ भनेपनि म रवीन्द्रको दुःखद निधनबाट खाली भएको निर्वाचन क्षेत्रमा उम्मेदवार बन्ने छैन । मेरो सम्पूर्ण प्रयत्न स्वर्गीय रवीन्द्रको परिवारका सदस्यलाई नै उम्मेदवार बनाउन लगाउने छु ।'

प्रकाशित : फाल्गुन १८, २०७५ १४:२२
पूरा पढ्नुहोस्
प्रतिक्रिया
पठाउनुहोस्