घले दम्पती अस्ट्रेलियाको ८५औँ धनी

नारायण खडका

अस्ट्रेलिया — नेपाली मूलका व्यवसायी दम्पती शेष घले तथा जमुना गुरुङ अस्ट्रेलियाको ८५औं र ८६औं धनी बनेका छन् । अस्ट्रेलियाको प्रतिष्ठित पक्रिका द अस्ट्रेलियनले शनिबार सार्वजनिक गरेको अस्ट्रेलियाका २ सय ५० धनी व्यत्तिहरूको सूचीमा उनीहरू गत वर्षको भन्दा २ सय २४ मिलियन अस्ट्रेलियन डलर जोडदै यो सूचीमा परेका हुन् । 

करिब १० वर्षदेखि अस्ट्रेलियाका धनीहरूको सूचीमा नामांकित हुँदै आएका उनीहरू द अस्ट्रेलियनको सूचीअनुसार पहिलोपटक बिलिनियरको सूचीमा पर्न सफल बनेका छन् । सूचीअनुसार उनीहरूको कुल सम्पत्ति १ दशमलव १ बिलियन डलर रहेको छ ।

हरेक वर्ष अस्ट्रेलियाका धनीहरूको सूची सार्वजनिक गर्दै आएको बीआरडब्लु म्यागजिनका अनुसार उनीहरूको गत वर्षको सम्पत्ति ८ सय ७६ मिलियन डलर रहेको थियो ।

अस्ट्रेलियाको मेलबर्नमा रहेर व्यवसायमा संलग्न उनीहरूले आफ्नो व्यवसायलाई घरजग्गा, होटल, शिक्षालगायत विभिन्न क्षेत्रमा बढाएका छन् । करिब दुई दशक पहिले नेपालबाट विद्यार्थीका रूपमा आएका उनले सुरुका समयमा सामान्य विद्यार्थीहरूसरह नै मिहिनेत गरेका थिए ।

कान्तिपुरसँग केही पहिलेको कुराकानीमा उनले कुन र कस्तो सूचीमा पर्नु आफूहरूको कहिल्यै उद्देश्य नरहेको बताएका थिए । घलेले एकै व्यवसायमा लगानी गर्नुभन्दा पनि लगानीलाई धेरै क्षेत्रहरूमा विस्तार गरेर लगानी गरेको खण्डमा सफलता हात लाग्ने अनुभवसमेत सुनाएका थिए । हरेक वर्ष सयौं मिलियन डलर आफ्नो कुल सम्पत्तिमा थप्दै आएका उनको सम्पत्ति दुई वर्षअघि सन् २०१७ मा ६ सय ४७ मिलियन रहेको बीआरडब्लु पत्रिकाले जनाएको थियो ।

आप्रवासी नेपालीहरूको संगठन एनआरएनका दुई कार्यकालसम्म नेतृत्व सम्हालिसकेका घलेले नेपालमा भूकम्प गएको समयमा भूकम्प प्रभावित क्षेत्रमै गएर पीडितहरूलाई सहयोग पुर्‍याएका थिए । गोरखाको लाप्राकमा भूकम्पपीडितहरूका लागि बनेको घरहरू निर्माणमा समेत उनको महत्त्वपूर्ण हात रहेको थियो । ‘पैसा कमाउनुभन्दा पनि आवश्यक परेको समयमा सहयोगी मन र कार्य गर्नु नै मानिसको सबैभन्दा ठूलो आम्दानी हो ।’कान्तिपुरसँगको कुराकानीमा उनले भनेका थिए ।

घले दम्पतीले अहिले मेलबर्नमा करिब ४ सय ५० मिलियन डलरको लागतमा दुईवटा भवन बनाउने तयारीसमेत सुरु गरेका छन् । यसैगरी उनको मेलबर्नमा रहेको मेलबर्न इन्स्टिच्युट अफ टेक्नोलोजीमा समेत सयौंको संख्यामा अन्तर्राष्ट्रिय तथा स्थानीय विद्यार्थीहरू विभिन्न विषयहरू अध्ययनरत छन् ।

उनको कलेज एमआईटीमा ब्याचलरदेखि सर्टिफिकेट तहसम्मका विभिन्न कोर्सहरू अध्यापन गराइँदै आएको छ । यसबाहेक करिब ५ अर्बको लागतमा उनले नेपालमा समेत होटल बनाउन सुरु गरिसकेका छन् ।

सूचीमा कार्बनबोर्ड र प्रशोधनको व्यवसायमा लागेका एन्थोनी प्राट १३ दशमलव १४ बिलियन डलरसहित पहिलो नम्बरमा छन् भने जिना र्‍यानहार्ट र ह्यारी ट्रिगुबोफ क्रमशः १३ दशमलव १२ बिलियन र १२ दशमलव ३१ बिलियनसहित दोस्रो र तेस्रो नम्बरमा छन् ।

प्रकाशित : चैत्र १७, २०७५ १९:३९
प्रतिक्रिया
पठाउनुहोस्
ADVERTISEMENT
ADVERTISEMENT

अन्तर्राष्ट्रिय संगीत महोत्सवको तयारी

कान्तिपुर संवाददाता

तेह्रथुम — तीनजुरे मिल्के जलजले (टिएमजे) क्षेत्रको चौकी बजार आसपासमा चैत २२ मा विभिन्न देशका करिब २५ हजार पर्यटकको जमघट हुँदैछ । 

संखुवासभाको मादी नगरपालिकाको सहयोगमा काठमाडौंमा रहेको शक्ति पिक नेपाल नामक संस्थाले स्थानीय तीनजुरे गुराँस क्लवको संयोजनमा एक साता लामो अन्तर्राष्ट्रिय स्तरको संगीत महोत्सवको आयोजना गर्न लागेको हो ।

यही मेसोमा विश्वभरका २५ हजारभन्दा बढी पर्यटक र संगीतका पारखीहरू चौकी बजारमा भेला हुन लागेको मादी नगरपालिकाका प्रमुख विदुर लिङथेपले बताए । नेपालमै पहिलो पटक हुन लागेको सांगीतिक कार्यक्रमका लागि संखुवासभाको चौकी र मंगलबारे क्षेत्रमा धमाधम पूर्वाधार निर्माण भइरहेको छ ।

‘कार्यक्रमका लागि अहिलेदेखि नै तयारी भइरहेको छ,’ नगर प्रमुख लिङथेपले भने, ‘गुराँस र विदेशी पर्यटकका टेन्टले नयाँ वर्ष अगावै चौकी र मंगलबारे क्षेत्र रंगिनेछ ।’ मादी नगरपालिका १ राँकेधार डाँडामा हुने कार्यक्रममा विश्वका ख्याती प्राप्त संगीत ब्यान्डमा आबद्ध संगीतकर्मीहरूको सहभागिता हुने आयोजक संस्थाले जनाएको छ ।

महोत्सवको संयोजन गरिरहेको स्थानीय तीनजुरे गुराँस क्लवका अध्यक्ष रविन तामाङका अनुसार चैत २२ देखि वैशाख ७ गतेसम्म महोत्सव आयोजना हुनेछ । तर नगरपालिकाले भने एक साताका लागि मात्र दैनिक १ हजार राजस्व जम्मा गर्न लगाएर आयोजकलाई महोत्सवका लागि स्वीकृति दिएको छ ।

गत वर्ष यही सिजनमा आयोजना भएको कार्यक्रममा भने नगरपालिकाले राजस्व लिएको थिएन । तर यस पटकबाट एनदमै न्यून कर लिएर आफ्नो नगरपालिका क्षेत्रमा विदेशी पर्यटक भित्र्याउन लागिएको नगर प्रमुख लिङथेपको भनाइ छ ।

महोत्सवका कारण विश्वको ध्यान संखुवासभाको मादी नगरपालिकामा तानिने उनले दाबी गरे । गुराँसभूमि टिएमजे क्षेत्रको विश्वमा प्रचारप्रसार गर्न महोत्सवको आयोजना गरिएको नगरपालिकाले जनाएको छ । ‘हामीसँग विश्वमै नभएको प्राकृतिक गुराँस वन सहितको सम्पत्ति छ,’ नगर प्रमुख लिङथेपले भने, ‘यिनै प्राकृतिक सम्पत्ति देखाएर विश्वको ध्यान मादीमा केन्द्रीत गर्ने अभियानमा हामी छौं ।’

महोत्सवमा भाग लिन आउने अमेरिका, बेलायत, जर्मनी, रूस, क्यानडा, जापान लगायतका देशका संगीतकर्मीहरूको जमघटले टिएमजे क्षेत्रको मात्र नभई नेपालकै पर्यटन प्रवर्द्धनमा सहयोग पुग्ने चौकी बजारमा लालीगुराँस होटल सञ्चालन गरी बसेका उदय तामाङले बताए ।

कार्यक्रमको तयारी र व्यवस्थापनका लागि ठूलो संख्यामा स्थानीय महिनायता खटिरहेका छन् । गुराँसको राजधानी भनिएको यो क्षेत्रमा भ्रमणका लागि आउनेहरूलाई नयाँ वर्ष २०७६ अन्तर्राष्ट्रिय स्तरको संगीतका साथ मनाउन पाउने अवसर रहने अध्यक्ष तामाङले बताए ।

एकै पटक यति धेरै देशका पर्यटक आफ्नै घर आँगनमा आउने भएपछि चौकी बजार, मंगलबारेदेखि आसपासका गाउँबस्तीका बासिन्दा निकै उत्साहित छन् । सडक मार्गका कारण पछिल्लो समय ओझेलमा परेको यो क्षेत्रको पदमार्ग र पर्यटन व्यवसायले पुनः गति लिने आशा पलाएको चौकी बजारका स्थानीय सुरेश कुमार पाठकले बताए ।

महोत्सवलाई स्थानीयले आफ्नो क्षेत्रको ठूलो र महत्त्वपूर्ण चाडका रूपमा लिएका छन् । विश्वभरका पर्यटकले महोत्सवमा आउन अहिलेदेखि नै अनलाइनमार्फत फाराम भरिरहेको नगर प्रमुख लिङथेपले बताए ।

यहाँसम्म आएका पर्यटकले उच्च पहाडी हावापानी, यहाँको जंगली सुन्दरता र लेकाली जनजीवनमा रमाउन समेत पाउने छन् । महोत्सवलाई संगीत र कलाको पर्वका रूपमा मनाउन १ सय २ देशका विदेशी पर्यटक र कला र संगीतका पारखीहरू समेतको मादी नगरपालिकामा जमघट हुने ९ नम्बर वडाध्यक्ष पासाङ शेर्पाले बताए ।

पर्यटक बस्नका लागि चौकी, मंगलबारे र गुफा बजारको मध्यभागमा रहेको खुला चौरमा टेन्ट टाँगेर पूर्वाधार निर्माण भइरहेको छ । चौरमै खाने, बस्ने, सुत्ने र रमाउने प्रबन्ध मिलाउने गरी बस्दोबस्तीका सामान तयारी गरिरहेको आयोजक संस्थाका कार्यक्रमका प्रबन्धक सुवास केसीले जानकारी दिए ।

प्रकाशित : चैत्र १७, २०७५ १९:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT