पेरिसमा नेपाली मेलाको रौनक [फोटोफिचर]
काठमाडौँ — नेपालका विभिन्न जातजातिको भेषभूषा तथा संस्कृति झल्काउने नृत्य र जीवित देवी कुमारीको रथयात्रा प्रदर्शन गर्दै पेरिसमा १६ औं नेपाली मेला आयोजना गरिएको छ । पेरिसको भासेन पार्कस्थित बुद्धको प्यागोडा रहेको ठाउँमा मेला गरिएको हो । नेपाली सांस्कृतिक गृह, पेरिसले गरेको मेला शनिबारदेखि दुई दिनसम्म चल्ने छ । मेलामा हजारौं फ्रान्सेली लगायत नेपाली सहभागी छन् ।
प्रवासमा नेपाली खानाको स्वाद चखाउन मम, सेल, पकौडा, रसवरी, जुलेबी, नेपाली दालभात, गहुँको रोटी लगायत परिकार राखिएको छ । काठमाडौं उपत्यकाको मौलिक पर्व कुमारीको रथका साथै लाखे नाचले नेपाली र फ्रान्सेलीलाई विशेष आकर्षण गरेको थियो । नेपाली खानाप्रति आकर्षित गराउन आयोजकले सहभागीहरुलाई मम बनाउन सिकाउने कार्यक्रम पनि राखेका छन् । यसमा धेरै फ्रान्सेली सहभागी भएका आयोजकले दाबी गरेको छ ।
मेलामा नेपाली गरगहना, पस्मिना, ढाकाका कपडा, अचार, तितौरा, दाल, चाउचाउ लगायतका खाद्य र विभिन्न हस्तकलाका सामग्रीको प्रदर्शनी र बिक्री स्टल राखिएका छन् । फ्रान्सेलीहरुले नेपालका बारेमा प्रकाशित केही पुस्तकसमेत बिक्रीका लागि राखेका छन् ।
कार्यक्रममा फ्रान्सका लागि नेपाली राजदूत दिपक अधिकारीले नेपाल र फ्रान्सबीच दौत्य सम्बन्ध कायम भएको ७० औं वर्ष भएकाले पनि यो वर्ष विशेष महत्का साथ मनाइने उल्लेख गरे । नेपाल र फ्रान्स भाषा, संस्कृति, सभ्यतामा समान रहेकाले यी दुई देशले सहकार्य गर्नुपर्ने बताए ।