दृष्टिविहीनलाई सहयोग जुटाउन अस्ट्रेलिया

नारायण खड्का

अस्ट्रेलिया — नेपाली फिल्मका नायक राजेश हमाल केही कलाकारसहित अहिले अस्ट्रेलिया भ्रमणमा छन्  । तीन साता लामो अस्ट्रेलिया भ्रमणमा आएका उनीहरू कुनै सांगीतिक कार्यक्रम गर्न आएका भने हैनन्  ।

बरु दृष्टिविहीनका लागि भवन निर्माणमा सहयोग जुटाउन यहाँ आएका रहेछन् ।


हास्यव्यंग्य कलाकार शैलेन्द्र सिंखडा, गायिका मेनुका पौडेल र एलिसा रेग्मीसहित आएर अस्ट्रेलियाका विभिन्न सहरमा कार्यक्रम गरिरहेका उनले सिन्धुपाल्चोकमा रहेका दृष्टिविहीन बालबालिकाका लागि भवन निर्माणका साथै तालिम केन्द्र निर्माण अभियानमा रहेको सुनाए ।


‘केही भएका हामीले केही नभएका नेपाली दाजुभाइ, दिदीबहिनीहरूलाई सहयोग गरौं भन्ने उद्देश्यले हामी तपाईंसमक्ष आएका हौं,’ हमालले भने । उनका अनुसार २० दिन लामो यात्राका लागि दुई साता पहिले अस्ट्रेलिया आएका उनीहरूको यो सहयोग अभियान मेलबर्नमा कार्यक्रमपछि सकिनेछ ।


‘हामीले ब्रिसबन, गोल्डकोस्ट, सिड्नी, तास्मानियालगायत सहरमा धेरै सहयोगी हातहरू पाइसकेका छौं र यो पुण्य काम चाँडै सम्पन्न हुनेमा विश्वास दिलाउन चाहन्छु,’ कार्यक्रमको सिलसिलामा दक्षिण अस्ट्रेलिया आइपुगेका हमालले भने ।

प्रकाशित : असार ३०, २०७६ १०:१२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

ग्रामीण सडकहरू क्षतिग्रस्त

२ दर्जन घर भत्किए
कान्तिपुर संवाददाता

धनकुटा — वर्षाका कारण धनकुटाका विभिन्न स्थानमा २ सय ३१ घरमा क्षति पुगेको छ । पहिरोमा परी १० जना घाइते भएका छन् । निजी घर र केही विद्यालय, स्वास्थ्य तथा प्रहरी चौकीमा क्षति पुगेको छ । ग्रामीण सडकहरू पहिरोले क्षतिग्रस्त बनेपछि यातायात सञ्चालन प्रभावित बनेको छ ।

जिल्लाका सात स्थानीय तहमध्ये छथर जोरपाटी र चौबिसे गाउँपालिका, धनकुटा, पाख्रिबास र महालक्ष्मी नगरपालिका क्षेत्रमा बढी क्षति पुगेको छ । छथर जोरपाटीमा ५१, धनकुटा नगरपालिकामा ८०, पाख्रिबास नगरपालिकामा २२, महालक्ष्मी नगरपालिकामा १५, सहिदभूमि गाउँपालिकामा ११, चौबिसे गाउँपालिकामा ३२ र साँगुरीगढी गाउँपालिकामा २० घरमा क्षति पुगेको छ ।

दुई दर्जनभन्दा बढी घर भत्किएको र अन्य आंशिक क्षति भएको जिल्ला प्रहरी प्रमुख एसपी सुदर्शन कोइरालाले बताए । विस्थापित अधिकांश परिवारलाई नजिकका विद्यालय तथा छरछिमेकमा राखिएको छ ।

पहिरोका कारण पाख्रिबासमा सीता तामाङ घाइते भएकी छन् । उनको स्थानीय स्वास्थ्य चौकीमा उपचार गरिएको छ । यस्तै, चौबिसेको सौर्यमा २ बालक घाइते भएका छन् । सिधुवामा ७ जना घाइते भएको प्रहरीले जनाएको छ । महालक्ष्मी नगरपालिका ५ लेगुवा बजारमा शनिबार बिहान तीन घरमा क्षति पुगेको प्रहरीले जनाएको छ ।

कपडा पसल गर्दै आएका महम्मद अनुवारको कपडा पसल र घर भत्किँदा करिब ९ लाख बराबरको क्षति भएको छ । सोही स्थानका इन्द्रसागर दास, राजकुमार बुढाथोकीको घरमा समेत पहिरोले क्षति पुर्‍याएको एसपी कोइरालाले जानकारी दिए । आसपासका अधिकांश घर उच्च जोखिममा रहेको स्थानीय सन्तबहादुर कुँवरले बताए । महालक्ष्मी नगरपालिकाको जितपुर बजारस्थित प्रहरी चौकीसमेत पहिरोले जोखिम पुगेको छ ।

यस्तै, पाख्रिबास नगरपालिका ५ स्थित घोर्लीखर्कमा तीन घरमा क्षति पुगेको छ । स्थानीय युवराज कार्की, चक्रबहादुर निरौला र ५ का वडाध्यक्ष गोपालबहादुर थापाको घरमा पहिरोले क्षति पुगेको प्रहरीले जनाएको छ । धनकुटा नगरपालिका ७ चुलिबनका लक्ष्मी लावतीको घरमा पनि क्षति पुगेको छ ।

सहिदभूमि गाउँपालिका ३ मा रहेको अजम्बरी प्राथमिक विद्यालयको भवन भत्किएको छ । छथर जोरपाटीस्थित सिधुवामा रहेको निगाले सिमेन्ट उद्योगमा पहिरोले क्षति पुर्‍याएको छ । नाम्जाङ गाउँमा पहिरो गएपछि फेक्ट्रीको पछिल्लो भाग क्षतिग्रस्त भएको छ ।

प्रकाशित : असार ३०, २०७६ १०:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT