चार वर्षका साझा एकैपटक

प्रकाशनको पुलचोकस्थित मुख्यालयमा आयोजित साहित्यिक जमघटमा साझा पुरस्कारसँगै लोकसाहित्य, बालसाहित्य र गरिमा सम्मान हस्तान्तरण गरियो ।
साझाले २०६६ को साझा पुरस्कार पुरुषोत्तम सुवेदी -माथिको तस्बिर), २०६५ को नारायण ढकाल, ०६४ को ऋषिराज बराल र २०६३ को हरि अधिकारीलाई दिने घोषणा गरेको थियो । ५१ हजार रुपैयाँ र सम्मानपत्र रहेको पुरस्कार थाप्न मंगलबार ढकाल र सुवेदी मात्रै आइपुगे । ढकाललाई 'प्रेतकल्प' उपन्यासका लागि, सुवेदीलाई 'संक्रमणको साहित्य र समकालीनता', बराललाई 'साहित्य र समाज' समालोचना कृति र अधिकारीलाई कविता कृति 'हरि अधिकारीका कविताहरू' का लागि पुरस्कृत गरिएको हो ।
साझा बालसाहित्य पुरस्कार अनिल पौडेलको 'आमाचरी' बालउपन्यास -२०६३), विनय कसजूको 'वनको दमकल' कथासंग्रह -२०६४), शान्तदास मानन्धरको 'भुइँचालोबारे हजुरआमाको कथा' -२०६५) र देवेन्द्र मिश्रको 'बगियाक गाछ' मैथिली कथासंग्रह -२०६६) लाई प्रदान गरियो । लोकसाहित्य पुरस्कार भने 'नेपालमा प्रचलित नृत्य र नृत्यनाटिकाहरू' -२०६३) खोजमूलक कृतिका लागि डा. मोतीलाल पराजुलीलाई, 'लिम्बूवानका लोककथा' -२०६५) का लागि धनहाङ राई र 'डोटी प्रदेशको लोक वाङ्मय कोष'
-२०६६) का लागि वासुदेव भट्ट 'भाइ साप' ले पाए । उल्लेख्य कृति नभएकाले २०६४ को लोकसाहित्य पुरस्कार भने घोषणा गरिएको थिएन । बाल र लोकसाहित्य दुवै पुरस्कारमा १५ हजार रुपैयाँ छ ।
साझाले साहित्य मासिक प्रकाशन 'गरिमा' मा वर्षभरि छापिएका रचनामध्ये गद्य र पद्य गरी उत्कृष्ट दुईलाई हरेक वर्ष १० हजार रुपैयाँको 'गरिमा सम्मान पुरस्कार' दिँदै आएको छ । यसअन्तर्गत ललिजन रावल र रुद्र खरेल -२०६३), श्यामल र राजेन्द्र विमल -२०६४), रेखा सुवेदी र राजेन्द्र पराजुली -२०६५) तथा कणाद महषिर् र अविनाश श्रेष्ठ
-२०६६) लाई पुरस्कृत गरियो । दिवंगत रुद्र खरेलबाहेकलाई संस्कृतिविद् सत्यमोहन जोशी र सहकारी मन्त्री मृगेन्द्रसिंह यादवले पुरस्कार हस्तान्तरण गरे ।
'राज्यको सहयोग नलिईकन साझाले सय वर्षदेखि भाषा- साहित्यमा पुर्‍याएको योगदानको प्रशंसा गर्नैपर्छ,' जोशीले भने, 'विडम्बना, आज साझा प्रकाशन रुग्ण अवस्थामा छ । यसलाई राज्यले बचायो भने यसले पनि राज्यका भाषा र साहित्यलाई बचाउनेछ ।'
 

प्रकाशित : असार ३०, २०६७ ०८:५३