महारानी बन्दै सिपोरा
कास्की — हुन त भलिबल खेलेरै सिपोरा गुरुङको नाम चम्किएको हो। राम्रो सट हानेर बेस्ट स्पाइकरको रूपमा खेलप्रेमीमाझ पहिचान बनाएकी सिपोरा पछिल्लो क्रममा भने फिल्म दुनियाँमा आइपुगेकी छन्।
थुम्रो इन्टरनेसलनले निर्माण गर्न लागेको 'यम्फावती द पि्रन्सेस' मा उनी नायिकामा अनुबन्धित भएकी छन्। पोखरामा मंगलबार पत्रकार सम्मेलनमार्फत यसको घोषणा गरियो । 'यो फिल्ममा सिपोरालाई ६ लाख रुपैयाँमा एग्रिमेन्ट गरिएको हो,' फिल्म निर्देशक कृष्णकुमार गुरुङले भने, 'सायद यो नेपाली फिल्ममा अरू नायिकाहरूले लिने पारिश्रमिकभन्दा धेरै होला।'
सिपोराले गुरुङद्वारा निर्देशित 'घलेक द साइन अफ लभ' फिल्मबाटै अभिनय यात्रा थालेकी हुन्। त्यो फिल्ममा भने उनले दुई लाख रुपैयाँ पारिश्रमिक लिएकी थिइन्।
'रोल र पारिश्रमिक फिल्ममा राम्रो पाएकी छु,' उत्साही देखिएकी सिपोराले भनिन्, 'सांस्कृतिक पक्ष समेटिएको महिलाप्रधान विषय उठान गरिएकोले पनि यो फिल्म राम्रो हुने ठानेकी छु।'
तीन वर्षअघि खुट्टाको लिगामेन्ट च्यातिएर खेल्न नसकेकी सिपोरा अघिल्लो वर्षदेखि खेलमा फर्किएकी थिइन्। सन् २०१३ को मिस नेपाल प्रतियोगितामा समेत सहभागी भएकी उनले मिस ट्यालेन्ट टाइटल पाएकी थिइन्।
आफू खेल जीवनबाट सन्न्यास लिएर फिल्म क्षेत्रमा लागेको भन्ने हल्ला निराधार रहेको उनले बताइन् । फिल्महरूकोअफर धेरै आइरहे पनि छानेर मात्रै खेल्ने गरेको उनले खुलाइन्। 'भलिबलबाट म कहाँ टाढा हुन सक्छु ? भर्खर भलिबल कोर्टबाटै आएकी हुँ,' उनले भनिन्, 'खेललाई निरन्तरता दिन्छु र राम्रो फिल्म छानेर खेल्नेछु।'
ऐतिहासिक कथामा आधारित 'यम्फावती द पि्रन्सेस' मा उनी महारानीको भूमिकामा देखिनेछिन्। ऐतिहासिक महत्त्व बोकेको कोरी भन्ने ठाउँमा यसको सुटिङ हुने छ। पर्यटकीय गाउँ सिक्लेसबाट दुई दिन पैदल हिँडेर पुगिने उक्त स्थानमा एक दुई भेडीगोठ बाहेक मानवबस्ती शून्य रहेको थुम्रोकी प्रवक्ता सरस्वती गुरुङले बताइन्।
२५ दिन त्यही अनकन्टार ठाउँमा हुने सुटिङका लागि बुधबार ३५ जनाको टोली पोखराबाट प्रस्थान गर्दै छ। गुफाभित्र बस्ने राजकुमारीको परापूर्वकालको ऐतिहासिकतालाई फिल्ममा देखाउन खोजिएको छ।
प्रकाशित : भाद्र ११, २०७१ ०८:५१
प्रतिक्रिया