साप्ताहिक ब्लोअप : बेनिशा हमाल

हिरोइनको असार
कृष्ण भट्टराई

काठमाडौ — नायिका बेनिशा हमाल वैशाख १२ गतेको भूकम्पपछि गत असार ८ गतेमात्र मन खोलेर हाँसिन् । भूकम्पपछि आफ्नै समकालीन कलाकारहरूले सञ्चालन गरेको ‘वि फर अल’ अभियानमा उनी भूकम्पप्रभावित क्षेत्रहरूमा पुगेर राहत, उद्धार तथा पुनर्निर्माणको काममा सक्रिय भइन् ।


‘लामो समयपछि हाँस्ने अवसर जुराइदिनु भएकोमा धन्यवाद,’ बेनिशाले साप्ताहिकसँग भनिन्– ‘जीवनमै दोस्रोपटक हिलोमा बसेर धान रोप्न पाउँदाको रमाइलो शब्दमा वर्णन गर्न गाह्रो छ ।’
बाल्यकालमै गृहनगर चितवनको गीतानगरमा रहरै–रहरले हिलोमा पसेर पहिलोपटक धान रोपेकी बेनिशालाई आर्टिस्ट नेपाल डटकमको संयोजनमा गत सोमबार भक्तपुरको भत्केको पाटी पुग्दा रोपाइँको अनुभव यति रमणीय होला भन्ने लागेको थिएन । स्थानीय महिनाहरूसँगै करिब तीन घण्टा हिलोमा बिताउने क्रममा बेनिशाले वर्षको एकपटक हिलोमा पस्ने निर्णयसमेत गरिन् । ‘कम्मरचाहिँ नराम्रोसँग दु:खी रहेको छ,’ बेनिशाका अनुसार उनलाई धान रोप्ने क्रममा जुकाको ठूलो डर थियो, तर धन्न उनलाई जुकाले फेला पार्न सकेन ।
भूकम्पपछि यसको पीडा बिर्साउने विभिन्न आधा दर्जन म्युजिक भिडियोमा अभिनय गरिसकेकी बेनिशाले केही आधुनिक गीतका भिडियोमा समेत काम गरिन् । स्नातकोत्तर तहका लागि थेसिस लेखनमा व्यस्त हुने भएकाले बेनिशाले दसैंपछि मात्र चलचित्रमा फर्कने योजना बनाएकी छिन् । बेनिशा भन्छिन्– ‘हाम्रो अभियानले काभ्रेको पोखरीचौरमा एउटा विद्यालय निर्माण गर्दैछ, त्यसपछि मात्र म आफ्नो व्यक्तिगत काममा व्यस्त हुनेछु ।

तस्बिर : कुबेर तामाङ/आर्टिस्टनेपाल डटकम
लोकेसन : भत्केकोपाटी, भक्तपुर
मेकअप : टेक लामा (भाइरस)
 





















 
 

प्रकाशित : असार ११, २०७२ १५:१९
प्रतिक्रिया
पठाउनुहोस्
ADVERTISEMENT

मध्यान्ह काम गर्न रोक

दोहा — तापक्रम बढेपछि कतार सरकारले मध्यान्हको समयमा बाहिरी क्षेत्रमा काम गर्न रोक लगाएको छ। उसले बिहान ११:३० बजेदेखि दिउँसो ३ बजेसम्म रोक लगाएको हो।


श्रम तथा सामाजिक मन्त्रालयका अनुसार सोमबार जुन १५ (जेठ ३२) बाट लागू हुने गरी अगस्ट ३१ सम्ममा मध्यान्ह काममा लगाउन नपाउने व्यवस्था गरेको हो। ‘सरकारको नियमअनुसार गर्मी समय भर दिउसोको समयमा बाहिर क्षेत्रमा काममा लगाउन पूर्ण रुपमा रोक लगाएको छ’, मन्त्रालयद्वारा जारी सूचनामा भनिएको छ, ‘यसलाई उल्लंघन गरिएमा रोजगारदातालाई कारबाही गरिनेछ।’
निर्माण क्षेत्रमा कार्यरत नेपालीसहित विदेशी कामदारलाई यसबाट ठूलो राहत मिलेको छ। ‘बिहान ८ बजेबाटै एकदमै बोल्न थाल्छ,’ दोहाको मुसरिफ प्रोजेक्टमा काम गर्ने तनहुँका सुमन मल्लले भने, ‘११ बजेसम्म थेग्न पनि निकै गार्‍हो हुन्छ।’ ठूला ठूला प्रोजेक्टमा सरकारको नियमलाई पछ्याउँदै कम्पनीहरूले काम गर्ने समय पनि परिवर्तन गरेको छ। रातीको डिउटी दिउँसो ३ बजेदेखि बिहान १ बजेसम्म र बिहानको डिउटी बिहान १ देखि ११ बजेसम्म तय गरेको छ। ‘हामीलाई यही रूपमा काम गर्न कम्पनीले सूचना दिएको छ,’ महोत्तरीका बलराम रायले भने, ‘यसले तातोबाट पोल्नुबाट त जोगिन्छ।’
गर्मीमा काम गर्न धेरै कामदारहरू कार्यस्थलमै ढल्ने गर्छन्। ‘धेरै साथीहरू ढेलेको देख्छु,’ स्याङ्जाका रतन सापकोटाले भने, ‘शरीरमा रहेको नुन पसिना भएर बग्छ। त्यस्तो उनीहरू ढल्छन्।’
कतारमा रहेका नेपाली डाक्टर नरेन्द्र शाक्यले यस्तो बेला कामदारले विशेष ध्यान दिनुपर्ने बताउँछ। ‘यो समय सबैभन्दा होसियारी पुर्‍याउनुपर्छ। घाममा काम गर्न सुरक्षाका सबै उपायलाई कामदारले आफ्नो लागि अपनाउनुपर्छ,’ उनले भने, ‘बारम्बार पानी पिउने, शितलमा आराम गर्ने, तुरुन्तै चिसो नबस्ने गर्नुपर्छ।’
कतारमा झन्डै चार लाख नेपाली कार्यरत छन्। त्यसको ६० प्रतिशत नेपाली बाहिरी क्षेत्रमा काम गर्छन्। उच्च रक्तचाप र मुटुका रोगी भएका कामदारहरू बढी जोखिममा पर्ने डा. शाक्यले बताए।

प्रकाशित : असार ११, २०७२ १५:०६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT