पूर्वमा प्रणय उत्सव

कान्तिपुर संवाददाता

इटहरी — भ्यालेन्टाइन्स डे तन्नेरी पुस्ताको उत्सवको रूपमा स्थापित हुँदै छ । इटहरीमा भने योपटक उमेरले नेटो काटिसकेका वृद्धहरूले पनि आफ्नो रचनामार्फत आफ्नी प्रेमिकालाई सम्झन भ्याए । यस्तो अवसर इटहरी उपमहानगरपालिकाको सांस्कृतिक भवनमा माघ २८ बाट सुरु बृहत् पुस्तक प्रदर्शनी तथा साहित्यिक महोत्सवको पाँचौं दिनमा जुर्‍यो ।

भ्यालेन्टाइन्स डेको अवसर पारिएको कार्यक्रममा ज्येष्ठ नागरिकहरूले पनि प्रेमका कविता वाचन गरे ।

‘जाउँ कान्छी रमाउँदै भ्यालेन्टाइन डे मनाउँदै
तिमी र म मिलेर मायाले गाला जोडाउँदै ।
एक पोल्टो काफल दिउला कुटुकुटु खानलाई
डराइरहनु पर्दैन मिठो माया लाउनलाई...’

७१ वर्षे कवि खेमराज शर्माले प्रेमको कविता सुनाउँदा हल ताली र सिटीले गुन्जयमान भयो । पाकाका प्रणय कविता सुनेर युवाहरू जोसिएका थिए । ७१ वर्षे कविको पालो सकिनासाथ अर्का ९० वर्षका कवि खड्ग खतिवडाले पनि प्रेमका कविता सुनाएर माहोललाई झन् गर्मिलो बनाए । उनी युवालाई छाडा नभई गहिरो प्रेम गर्न सम्झाइरहेका थिए । कृष्णराम अधिकारी, खेमराज शर्मा, राज आशातीत, नवराज मैनाली, जीबी गजल, विशालजी अनन्त, रामप्रसाद खरेल, पुण्यप्रसाद पराजुली, किरण शिवा, सीताराम सुचारु, मणि श्रेष्ठ, भावना श्रेष्ठ, विशालजी अनन्त, संघर्ष क्षेत्री, देवान किराँती, विराट अनुपम, हेमलता खनाल, निलम फुँयाल, विष्णु भण्डारी, शकुन्तला मञ्जरी, टीका मिलन, विवेक विवश रेग्मी, निर्मला अधिकारी, चन्द्रावती, पौडयाल, अर्जुन दाहाल, जयप्रसाद तिम्सिना र दुर्गा पराजुलीले पनि प्रेम रचना वाचन गरे । 

वाटिका युवा परिषद् नेपालका नवीन श्रेष्ठको संयोजनमा भएको कार्यक्रममा युवासँगै पाकाहरूको उत्साहजनक सहभागिता रह्यो । डिकुरा पब्लिकेसन र रेस मिडियाले गरेको प्रदर्शनी एवं महोत्सवमा हरेक दिन विभिन्न साहित्यिक प्रस्तुतिहरू हुँदै आएका छन् । शनिबारसम्म जारी रहने प्रदर्शनीमा १६ वटा सेसन राखिएको डिकुराका अध्यक्ष पुण्यप्रसाद प्रसाईंले जनाए । 

प्रकाशित : फाल्गुन ४, २०७३ ०८:२६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सन्नीको क्यामेरामा सुस्मिता सेन

कान्तिपुर संवाददाता

काठमाडौं — बलिउड नायिका सुस्मिता सेन सन् १९९४ की मिस युनिभर्स हुन् । भारतका लागि पहिलो पटक उक्त ताज जितेकी सुस्मिता दुई वर्षपछि ‘दस्तक’ फिल्ममार्फत बलिउडमा नायिकाको रूपमा छिरेकी थिइन् । पछिल्लोपटक ‘नो प्रोब्लम’ मा चार वर्षअघि फिल्म हलको पर्दामा देखिएकी सुस्मितालाई अझै पनि फेसन डिभाका रूपमा मानिन्छ ।

उनै सुन्दर नायिकाको हालै दुबईको लेक्स भिल्लामा एक नेपाली फोटोग्राफर सन्नी प्रधानले आठ घन्टा लामो फोटोसुट गरेका छन् । प्रधान कार्यरत दुबईको मास्टरकपी फिल्म प्रोडक्सनले सुस्मिता सेनको एक भिडियो विज्ञापन बनाउने र फोटोसुटको जिम्मेवारी पाएको थियो । सन्नी फोटोग्राफर र डिजिटल इमेजिङ टेक्निसियनका रूपमा खटिएका थिए ।

‘सुट टाइट सेडयुअलमा गर्नुपरेको थियो,’ सन्नीले कान्तिपुरसँगको कुराकानीमा भने, ‘सुस्मिताको समय अभावका कारण १२ घन्टा लाग्ने कामलाई ८ घन्टामा सकाउनुपर्ने बाध्यता थियो । तर पनि उनले बेस्ट परफर्मेन्स दिइन् ।’ आफैं ब्रान्ड एम्बेसडरसमेत रहेको मिलानो वाटर प्युरिफायरको उक्त सुटका लागि सेन दुबई पुगेकी थिइन् । ‘नायिका आउनुअगावै हामीले लोकेसनको रेकी गरिसकेका थियौं भने म आफैंले सुट कन्सेप्टमा स्क्रयाच भिडियो तयार पारेको थिएँ,’ फोटोग्राफर प्रधानले सेलिब्रिटी भए पनि सुस्मितामा घमण्ड नरहेको आफूले अनुभव गरेको बताए ।

‘सुरुमा आउनेबित्तिकै उत्साहपूर्वक सबैसँग हाई, हेल्लो गरिन् । नहाँसेकालाई समेत स्माइल प्लिज भन्दै सबैसँग हात मिलाएर सुट आनन्दले गर्नुपर्छ है भनिन्,’ सन्नीले सेनसँगको काम गर्दाको अनुभव सुनाउने क्रममा थपे, ‘प्रत्येक सटको प्रिभ्यु तत्कालै हेर्थिन् र चित्त नबुझेको ठाउँमा यसरी गरौं न भनेर आफ्नो विचार राख्थिन् ।’ फोटोग्राफर सन्नीले त्यसरीभन्दा पनि नायिकाले भिडियो निर्देशक वा क्यामेराम्यानलाई अप्ठयारो नलाग्ने गरी मिजासिलो हिसाबले भन्ने पनि सुनाए । त्यसो त कुनै बेला अरूकै कारण रि–टेक दिनुपरे पनि दिक्क नमान्ने सुस्मिताले कतिपय सट निर्देशकले स्वीकृत गर्दा पनि अझै राम्रो गरौं न भन्दै सट दिएको पनि उनले बताए ।

स्वभावत: सुस्मितालाई सन्नीले ८ घन्टाको मूल्यांकनमा ‘डाउन टु अर्थ’ पाएको बताए । उनले भने, ‘चिया लिएर आउनेदेखि निर्देशकसम्मलाई हाँसेर व्यक्तिगत कुरामा पनि चासो लिएर सोध्ने गर्थिन् । मसँगै सेल्फी खिच्ने क्रममा पनि उनी आफैंले मेरो मोबाइल मागेर खिचेकी थिइन्,’ सेनले आफ्नो कामको समेत तारिफ गरेकोमा सन्नी दंग परे । खिचिएका फोटो हेर्दै सुस्मिताले ‘फोटो हेर्दा नै यति मजाको छ झन् रि–टच गरेपछि कस्तो आउला भनेर छक्क परेर सोचिरा’छु’ भन्दै उत्साहित बनाएको पनि सन्नीले भने । सुस्मितालाई सट दिँदा म्युजिक बजाउनुपर्ने अनौठो बानी रहेछ । ‘उनले नै ल्याएकी मेकअप आर्टिस्टले नै सट दिनुअघि म्युजिक बजाइदिन्थे । त्यही तालमा उनले खुलेर सट दिन्थिन् । सेन आफैंले नै म्युजिकको बिटमा सट दिँदा धेरै मज्जा लाग्छ भन्दै हामीलाई सुनाएकी थिइन्,’ सन्नीले सेनसँगको फोटोसुट आफ्ना लागि अविस्मरणीय रहेको जिकिर गरे ।

प्रकाशित : फाल्गुन ४, २०७३ ०८:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT