‘भाग्यले बाँचेकाहरू’ लाई अर्को अवार्ड

कान्तिपुर संवाददाता

काठमाडौं — भूकम्पमा पुनर्जीवन पाएकाहरूको कथाव्यथा समेटिएको डकुमेन्ट्री फिल्म ‘भाग्यले बाँचेकाहरू’ ले फेरि अन्तर्राष्ट्रिय अवार्ड जितेको छ ।

भारत पटनामा सम्पन्न बोधिसत्व अन्तर्राष्ट्रिय चलचित्र महोत्सवमा यो डकुमेन्ट्रीले ८० हजार रुपैयाँसहित ‘बोधिसत्व सिल्भर अवार्ड’ जितेको हो । बिहीबार राति आयोजित अवार्ड समारोहमा फेस्टिभलको जुरी अध्यक्ष गोविन्द निहालनीले निर्देशक गणेश पाण्डे र निर्मात्री शारदा गैरेलाई अवार्डसहित नगद हस्तान्तरण गरे । फेस्टिभलमा संसारभरका ७ सय ३० वटा डकुमेन्ट्रीमध्ये प्रतिस्पर्धाका लागि ९ वटा डकुमेन्ट्री छानिएका थिए । त्यसमध्ये ‘भाग्यले बाँचेकाहरू’ ले दोस्रो स्थान हासिल गरेको हो ।

यो डकुमेन्ट्रीले गत महिना मात्रै भारतकै राजस्थान अन्तर्राष्ट्रिय चलचित्र महोत्सवमा ‘उत्कृष्ट निर्देशक अवार्ड’ जितेको थियो । नेपालको महाभूकम्पमा परी चामत्कारिक रूपमा ज्यान बचाउन सफल नेपालीको कथामा बनेको डकुमेन्ट्री ‘भाग्यले बाँचेकाहरू’ ले एक दर्जन अन्तर्राष्ट्रिय अवार्ड जितिसकेको छ भने ३२ वटा भन्दा बढी देशमा प्रदर्शनका लागि छनोट भएको छ । निरन्तरको अवार्ड यात्राबाट सिंगो डकुमेन्ट्री टिम खुसी भएको निर्देशक पाण्डेले नेपाल फर्केपछि प्रतिक्रिया दिए ।

प्रकाशित : फाल्गुन १५, २०७३ ०९:०३
प्रतिक्रिया
पठाउनुहोस्
ADVERTISEMENT

क्लियरिङ बैंक थपिने

कान्तिपुर संवाददाता

काठमाडौं — सेयर कारोबार राफसाफ तथा क्लियरिङका लागि सीडीएस एन्ड क्लियरिङले बैंक थप्ने प्रक्रिया सुरु गरेको छ । हाल एउटा बैंकमार्फत कारोबार राफसाफ तथा फछ्र्योट हुदाँ देखिएका विभिन्न समस्या समाधानका साथै क्लियरिङ प्रक्रियालाई छिटो र व्यवस्थित बनाउने उद्देश्यले थप तीनवटा बैंक थप्न लागिएको नेप्सेले जनाएको छ ।

धितोपत्र बोर्डबाट धितोपत्र कारोबार राफसाफ तथा फछ्र्यौट (तेस्रो संशोधन) विनियमावली, २०७३ स्वीकृत भएपछि सीडीएसलाई क्लियरिङ बैंक थप गर्न बाटो खुलेको हो । सीडीएस नेप्सेको पूर्ण स्वामित्व रहेको कम्पनी हो । 

सीडीएस एन्ड क्लियरि स्थापना भएयता एउटा मात्र बैंकमार्फत राफसाफ तथा क्लियरिङ हुँदै आएको छ । सेयर कारोबार बढेको समयमा समेत एउटा मात्र क्लियरिङ बैंक हुँदा ढिलासुस्ती, सेवा प्रभावकारी नभएको लगायत विभिन्न गुनासाहरू आएका थिए । यी गुनासाहरूलाई मध्यनजर गर्दै क्लियरिङ बैंक थप्न सफ्टवेयर स्तरोन्नतिका साथै नीतिगत व्यवस्था पनि गरिएको थियो । 
नेप्सेका अनुसार खुला प्रतिस्पर्धाका आधारमा क्लियरिङ बैंक थप गरिनेछ । यसका लागि सीडीएसले १५ दिनको समयावधि दिएर आइतबार सूचना आह्वान गर्दै छ । यसरी माग गरिएको आशयपत्रमा इच्छुक वाणिज्य बैंकहरूले आवेदन दिन सक्नेछन् । क्लियरिङ बैंक छनोटका लागि आवेदन प्राप्त वाणिज्य बैंकहरूमध्ये चुक्ता पुँजी बढी भएको, भौतिक तथा प्राविधिक पक्ष सुदृढ भएको, आस्बा प्रणालीको सदस्य भएको, डीपी लाइसेन्स प्राप्त गरेको, विस्तारित शाखा सञ्जाल भएको, सरकारी कारोबार गर्ने गरेको लगायतका मापदण्डलाई आधार बनाइने जनाइएको छ । ‘प्रतिस्पर्धात्मक प्रक्रियाबाट तीन बैंक थप गरिनेछन् । यसबाट धितोपत्र लगानीकर्तालगायत सरोकारवालाले धितोपत्र कारोबार, राफसाफ तथा फछ्र्यौटमा थप सहजता प्राप्त गर्ने विश्वास लिइएको छ,’ नेप्सेद्वारा जारी विज्ञप्तिमा भनिएको छ । 

प्रकाशित : फाल्गुन १५, २०७३ ०९:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT