राजधानीमा आनाको कथा

सजना बराल

काठमाडौं — दोस्रो विश्वयुद्धका बेला अडोल्फ हिटलरले यहुदीहरूको हत्या गर्दा दुई जर्मन परिवार नेदरल्यान्ड्समा लुकेर बसे । डच नागरिककै सहयोगमा फ्रंक र भानडान परिवार एम्स्टरड्याको एउटा घरमा लुकेका थिए ।

सन् १९४२ देखि १९४४ सम्म एकै ठाउँमा बस्दाको अनुभव र त्यस बेलाको सामाजिक वस्तुस्थितिबारे १३ वर्षीया आना फ्रंकले डायरी लेखेकी थिइन् । ‘द डायरी अफ योङ गर्ल’ नाममा छापिएको उनको पुस्तक विश्वप्रसिद्ध छ ।

त्यही लेखमा आधारित भएर बनाइएको ‘द डायरी अफ आना फ्रंक’ नामक नाटक शनिबार र आइतबार पाटनको रातो बंगला स्कुलमा प्रर्दशन गरियो । नाटकमा नाजी जर्मनले नेदरल्यान्ड्समाथि कब्जा जमाएको बेलाको भयावह अवस्थालाई चित्रण गरिएको छ । भित्तामा कालो स्वस्तिक छाप र पहेंलो तारा अंकित चित्र टाँगिएको सेटमा फ्रंक र भानडान परिवार जसोतसो अटाएको देखाइन्छ । दुई परिवारका आठ सदस्य आपसमा लडदै–भिडदै ‘एड्जस्ट’ गरिरहेका हुन्छन् । उनीहरूको दैनिकी स्वाभावैले कठोरतापूर्वक चलेको हुन्छ ।

दु:खका बेला धैर्य र सामूहिक एकता कति महत्त्वपूर्ण हुन्छ भन्ने कुरा नाटकमार्फत बुझ्न सकिन्छ । एक व्यक्तिले बिराउँदा सम्पूर्ण समूहलाई नै असर पर्छ । नियमित रासन पाउन छोडेपछि परिवारमा अनिकाल आउँछ । त्यही बेला मिस्टर भानडानले पाउरोटी चोरेर खाइदिन्छन् । साना केटाकेटी आधा पेट सुतेका बेला अभिभावकले नै त्यस्तो हर्कत गरेको थाहा पाएपछि सबै रुष्ट हुन्छन् । अरू बेला सधैं शान्त र धैर्यशील रहने मिसेस फ्रंकसमेत रौद्र रूपमा प्रस्तुत हुन्छिन् ।

वान वल्र्ड थिएटरले तयार पारेको नाटकलाई डेबोरा मेरोलाले निर्देशन गरेकी हुन् । यसअघि होटल वज्रको नागा थिएटर र पाटनकै यलमाया केन्द्रमा नाटक मञ्चन गरिएको थियो । यसमा आनाको भूमिका रोजिता बुद्धाचार्यले निर्वाह गरेकी छन् भने उनको बुबा बनेका छन्, राजकुमार पुडासैनी । मिसेस फ्रंकका रूपमा रोज स्विट्ज, मिस्टर र मिसेस भानडानमा गोपाल अर्याल र लुनिभा तुलाधर छन् । आशान्त शर्मा, सिमरन गिरीय, अमृत दाहाल, अलिजे बियानिक, भिन्सेन्ट जियानोट्टि र हिमांशु अग्रवालले पनि अभिनय गरेका छन् ।

‘विपतका बेला साहस र धैर्यपूर्वक काम गर्न सकिन्छ भन्ने कुरा नाटकमा समेटिएको छ,’ निर्देशक मेरोलाले भनिन्, ‘मैले टिनएज हुँदै आनाको भूमिका निर्वाह गरेकी थिएँ । आफ्नै परिचय बनाउने उनको सपनाले मलाई छोएको थियो ।’ नेपाली युवतीमा पनि त्यो चाह बढिरहेको परिस्थितिमा नाटक सान्दर्भिक हुने ठानेको उनले बताइन् । 

प्रकाशित : फाल्गुन १७, २०७३ ०९:३२
प्रतिक्रिया
पठाउनुहोस्
ADVERTISEMENT
ADVERTISEMENT

पर्यटनलाई संगीत

कान्तिपुर संवाददाता

काठमाडौं — श्रुति संगीत विद्यालयले गरेको ‘श्रुति संगीत सन्ध्या–२०७३’ मा चर्चित गायकगायिकाले प्रस्तुति दिए । संगीतकार कल्याणकारी कोषको सहयोगार्थ सोमबार नेपाल पर्यटन बोर्डमा कसन्र्ट गरिएको हो । गायक नरहरि प्रेमीले ‘यही देशको लागि...’ बोलको गीतमार्फत कार्यक्रम प्रारम्भ गरेका थिए ।

उनीपछि ग्लोरी हायर सेकेन्डरी स्कुलका छात्राहरूले ‘लाग्दछ मलाई रमाइलो...’ गीतमा नृत्य देखाए । लगत्तै सुमिना लोले ‘मायाको डोरी...’ बोलको गीत सुनाइन् । गायिका कुन्ती मोक्तान र जुना प्रसाईंको प्रस्तुति रुचाइए । लोक गायक कुलेन्द्र विश्वकर्मा र कृष्ण काफ्लेले पनि गीत सुनाए । 

समारोहमा श्रुति संगीतकै विद्यार्थी सन्ध्या केसीले संगीतकार कोषलाई सहयोगस्वरूप १५ हजार रुपैयाँ हस्तान्तरण गरिन् । कोषका अध्यक्ष लक्ष्मण शेषले संगीतकर्मीकै हितका लागि कोष स्थापना गरिएको बताए । कोषबारे जानकारी फैलाउन र नेपालको पर्यटन प्रवद्र्धनका लागि सांगीतिक कार्यक्रम आयोजना गर्दै आएको श्रुति संगीत विद्यालयका प्रेमीले स्पष्ट पारे । ‘देश आर्थिक रूपमा सम्पन्न भए मात्रै संगीत क्षेत्र सबल हुन्छ’, उनले भने, ‘देशलाई बलियो बनाउन पर्यटन प्रवद्र्धन आवश्यक छ ।’

प्रकाशित : फाल्गुन १७, २०७३ ०९:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT