‘राधा’ लिएर शर्मिला

कान्तिपुर संवाददाता

लेखनाथ, कास्की — मौलिक लोकगायिकाको परिचय बनाएकी शर्मिला गुरुङले लोक गीतको एल्बम ‘राधा’ लिएर आएकी छन् । उनले अर्का मौलिक लोक गायकको छवि बनाएका नारायण रायमाझीसँगको युगल गीत ‘मेरो माया छ भने राधा’ युटयुबमार्फत सार्वजनिक गरेकी छन् ।

१५ तीज गीतको एकल एल्बम सार्वजनिक गरे पनि लोक गीतको यो उनको दोस्रो एल्बम हो । उनले यसअघि लोक गीतको एल्बम ‘गहना’ ल्याएकी थिइन् । ‘राधा’ मा शब्द र संगीत नारायण रायमाझीको रहेको छ । उत्ताउला र भड्किलो लोकदोहोरी गीत बजारमा आइरहँदा शर्मिला भने सदैव त्यसबाट टाढा रहिन् । नारायणसँगको सहकार्यमा उनले ‘रामदी पुल..’, ‘कालो केशमा रातो रिबन..’, ‘गेटमा बेली जाइ..’ जस्ता चर्चित युगल लोक तथा दोहोरी गीत गाएकी छन् ।

‘राधा’ गीत पनि मौलिकताकै निरन्तरता भएको उनले बताइन् । ‘गीतले युटयुबमा राम्रो प्रतिक्रिया पाइरहेको छ, मेरा पहिलेका गीतमा जस्तै,’ उनले भनिन् । गीतको म्युजिक भिडियो पनि उनको जन्मस्थान स्याङ्जाको एलादीस्थित खाल्टेको सुन्तलाबारी होमस्टेमा छायांकन गरिएको छ । भिडियोको निर्देशन ‘गोर्खा पल्टन’ र ‘परदेशी’ जस्ता चर्चित फिल्म निर्देशन गरिसकेका नारायणले नै गरेका छन् । भिडियोको छायांकन र सम्पादन नारायण सत्यालले गरेका हुन् ।

सांगीतिक कार्यक्रमको सिलसिलामा पोखरा आएकी गुरुङले छिट्टै तीज गीतको एल्बम पनि सार्वजनिक गर्ने बताइन् । ‘धयरी रसैले’ तीज गीतको एल्बम १० दिन भित्र सार्वजनिक गर्ने उनको योजना छ । २ हजार ५ सयभन्दा बढी गीत गाइसकेकी गुरुङले पोखरामा हुने सांगीतिक कार्यक्रम छुटाउन मन नलाग्ने उल्लेख गर्दै भनिन्, ‘स्याङ्जा मेरो जन्मस्थान भए पनि पोखरा आफ्नै घरजस्तो लाग्छ ।’

प्रकाशित : असार १५, २०७४ ०८:३७
प्रतिक्रिया
पठाउनुहोस्
ADVERTISEMENT

क्रस–ड्रेसिङ रुचाउने पार्क

‘सिटी हन्टर’, ‘डक्टर जिन’, ‘ग्लोरी जेन’, ‘रिमेम्बर : वार अफ द सन’, ‘द क्याट’ जस्ता टीभी सिरिज र फिल्म हेरेका दर्शकका लागि पार्क मिन योङ परिचित नाम हो । यी दक्षिण कोरियाली अभिनेत्री आफ्नो नयाँ सिरियल ‘क्वीन फर सेभेन डेज’ का कारण अहिले चर्चामा छिन् । मेबाट प्रसारण सुरु भएको उक्त शृंखला निकै रुचाइएको छ ।

सोही शृंखलाबारे प्रतिक्रिया लिन उनलाई केही दिनअघि कोरियाली सञ्चारमाध्यम ‘केबीएस कुल एफएम’ ले स्टेसनमा निम्त्याएको थियो । ‘ली सु जिज सङ प्लाजा’ कार्यक्रममा अभिनेत्रीले क्रस–ड्रेसिङमा आफूलाई सहज महसुस हुने बताइन् । कुरैकुरामा उनले यो रहस्य फुत्काएपछि होहल्ला मच्चियो, जुन स्वाभाविक थियो ।

‘केटीभन्दा केटाको पहिरनमा मलाई राम्रो देखिन्छ जस्तो लाग्छ,’ उनले भनेकी थिइन्, “क्वीन अफ सेभेन’ को एउटा एपिसोडमा मैले पुरुषको भेष धारण गर्नुपर्ने थियो । केटाको लुगा लगाउनासाथ ममा आत्मविश्वास जागेजस्तोभयो । पूरै माहोल फेरिएको अनुभव गरेँ ।”

क्रस–डेसिङ (केटीले केटा वा केटाले केटीको परिहन लगाउनु) गर्दा आफूले राम्रो फिडब्याक पाएको पार्कको भनाइ थियो । महिला इन्टरटेनरको रूपमा देखिँदाभन्दा पुरुषको गेटअपमा मान्छेले आफूलाई सराहना गरेको उनले बताएकी थिइन् । ‘मेक–अप नगर्दा म केटाजस्तै देखिन्छु नि,’ उनले भनेकी थिइन्, ‘मेरो निधार कत्ति ठूलो छ, अनुहारचाहिँ सानो छ कि क्या हो ।’

प्रकाशित : असार १५, २०७४ ०८:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT