“जात्रा” को फेरि वर्चस्व

सिने सर्कल अवार्ड
कान्तिपुर संवाददाता

काठमाडौं — सिने सर्कल नेपालद्वारा राजधानीको आर्मी अफिसर्स क्लबमा आयोजित सिने सर्कल अवार्डमा ‘जात्रा’ ले वर्चस्व कायम गरेको छ । गत वर्ष राम्रो समीक्षासमेत पाएको ‘जात्रा’ ले सोमबार सर्वाधिक ६ विधामा अवार्ड जित्यो ।

यस वर्षको हालसम्मका अन्य अवार्डमा पनि उक्त फिल्मको वर्चस्व रहँदै आएको छ ।

उत्कृष्ट फिल्म घोषित ‘जात्रा’ ले अभिनेतातर्फ विपिन कार्की, अभिनेत्रीमा वर्षा राउत, छायाकारमा दीर्घ गुरुङ, उत्कृष्ट पटकथा तथा निर्देशन दुवैमा प्रदीप भट्टराईलाई अवार्ड दिलायो ।

Yamaha

समारोहको आकर्षण भने ‘माइतीघर’ का अभिनेता/अभिनेत्री सीपी लोहनी र माला सिन्हा रहे । ५१ वर्षअघि निजी क्षेत्रबाट निर्मित पहिलो नेपाली फिल्म ‘माइतीघर’ लाई स्मरण गर्दै आयोजना गरिएको सिने सर्कल अवार्डमा फिल्मका मुख्य जोडीलाई नै विशेष सम्मान प्रदान गरियो । अवार्डकै लागि भारतदेखि आएका सीपी दम्पतीलाई उपराष्ट्रपति नन्दबहादुर पुनले सम्मान गरे ।

यसैगरी, सोही फिल्मका गायक प्रेमध्वज प्रधान, गीतकारद्वय किरण खरेल र यादव खरेलसहितका व्यक्तित्वलाई पनि सम्मान गरियो । नेपाली सेनाको ब्यान्डले ‘माइतीघर’ देखि ‘पुरानो डुंगा’ सम्मका लोकप्रिय गीतको धुन प्रस्तुत गर्दै सुरु गरेको अवार्डमा द्वन्द्व निर्देशक एनबी महर्जनलाई ५१ हजार रुपैयाँसहित लाइफटाइम एचिभमेन्ट अवार्ड दिइयो । ‘पुरानो डुंगा’ बाट माओत्से गुरुङ र मेनुका प्रधानलाई उत्कृष्ट जोडीको अवार्ड दिइँदा सोही फिल्मका संगीतकार कालीप्रसाद बाँस्कोटा (निर जैले रिसाउने...) उत्कृष्ट ठहरिए ।

‘छक्का पञ्जा’ ले सर्वाधिक कमाइमा अवार्ड जित्दा सोही फिल्मका दीपकराज गिरी र प्रियंका कार्कीलाई पपुलर अभिनेता/अभिनेत्रीको अवार्ड दिइयो । पोस्टर नक्कलको विवादमा परे पनि ‘छक्का पञ्जा’ कै लागि पोस्टरको अवार्ड सुन्दर श्रेष्ठलाई दिइयो । यसैबाट कविराज गहतराज कोरियोग्राफीमा उत्कृष्ट रहे ।

द्वन्द्व निर्देशकमा हिमाल केसी (के म तिम्रो होइन र), गायकमा युवराज चौलागाईं (पलाँस), गायिकामा मीना निरौला (लुट २), सम्पादकमा अर्जुन जीसी (वीरविक्रम), ध्वनि मिश्रणमा शैलेश श्रेष्ठ (गाजलु) ले अवार्ड पाए ।


जितु नेपालको हास्य प्रस्तुति र कलाकारहरूको नृत्य, गायनले माहोल तताएको अवार्डमा ‘बिजुली मेसिन’ ले प्रशंसनीय अवार्ड जित्दा कालीप्रसाद बाँस्कोटाले ‘ठमेल बजार...’ गीतका लागि वर्षको चर्चित गीतको अवार्ड हत्याए । त्यसैगरी, उत्कृष्ट स्टन्टका लागि राजु तामाङ (जय पर्शुराम), ट्रेलर सुरेन्द्र पौडेल (लुट २) र उत्कृष्ट भीएफएक्सको अवार्ड सत्यम राना र सुदीप आचार्य ‘जय पर्शुराम’ बाट संयुक्त रूपमा विजयी भएका थिए ।

तस्बिर सौजन्य : योगप्रसाद विमली

प्रकाशित : श्रावण २५, २०७४ ०९:०३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

दरौंदीमा प्रेम खोज्दै आशान्त

कान्तिपुर संवाददाता

काठमाडौं — आशान्त शर्मा अभिनयका हिसाबले राम्रा रंगकर्मीमा गनिन्छन् । विसं २०५० पछि रंगमञ्चमा औपचारिक पाइला टेकेका उनले पछिल्लो समय निर्देशनमा समेत निरन्तर क्षमता दर्साइरहेका छन् ।

तर, निर्देशनमा उनी आफैंलाई भने अझै चित्त बुझेको छैन । रंगमञ्चमा अभिनय गर्दा जति सहज महसुस गर्छन्, त्यति निर्देशन र अन्य पाटोमा चुनौती नै लाग्छ उनलाई । ‘तैपनि रंगमञ्चमा अभिनय मात्रै पूर्ण होइन,’ उनी भन्छन्, ‘सबै क्षेत्रमा उत्तिकै अनुभव बटुल्नुपर्छ ।’ 

आधा दर्जन नाटक निर्देशन गरिसकेका आशान्तलाई यति बेला राजधानीको शिल्पी थिएटरमा भेट्न सकिन्छ, नाटकसहित । उनकै लेखन र निर्देशन रहेको ‘दरौंदीको पानी’ यतिबेला मञ्चन भइरहेको छ । गोर्खा राज्यका राजा राम शाह, गुरु गोरखनाथका शिष्य लखन थापामगर र राम शाहकी महारानी लीलावतीबीचको सम्बन्धलाई यो नाटकले टिपेको छ । यो नाटकमा एउटै मञ्चमा सात कलाकारले राजा, रानी, नोकर, जनता, गोरखनाथ, जोगीहरू, पुजारी, गाउँलेलगायत थुप्रै पात्रको अभिनय गरेका छन् । दर्शकले पत्तो नै नपाउने गरी मञ्चमा चरित्रहरूको बदलाब आउनु यसको विशेषता हो । 

आशान्तले कलाकारको अभिनयमा भन्दा पनि शैली र प्रस्तुतिमा बढी जोड दिएको देखिन्छ । ‘यो नाटक अलिक फरक नै छ,’ उनी भन्छन्, ‘डबलीमा देखाउने खालको बनाएको छु ।’ यस्तो प्रकारको नाटक मञ्च, सडक, डबली हरेक स्थानमा मञ्चन गर्न सहज हुने आशान्तले बताए । रंगमञ्चलाई व्यापक दर्शकको पहुँचमा विस्तार गर्न पनि यस्तो शैली प्रभावकारी हुन्छ । त्यसो त आशान्त नेपाली रंगमञ्चमा केही न केही फरक नै गरिरहेका छन् । केहीअघि उनले कथाहरूलाई नाटकमा ढालेर मञ्चन गरेका थिए । ‘तीन एकान्त’, ‘मलामी’, ‘टलक जंग भर्सेस टुल्के’, ‘कन्फ्रेन्स अफ दी गड’, ‘इन द रेड एन्ड ब्राउन्ड वाटर’, ‘वेटिङ फर गोदो’, ‘मास्टर हेरल्ड एन्ड द ब्वाइज’ लगायतमा नाटकमा आशान्तले अब्बल रंगकर्मीको छवि छाडिसकेका छन् । लेखन, निर्देशन, लाइटिङजस्ता रंगमञ्चका अनेक विधामा उनी अनुभव बटुल्न चाहन्छन् । ‘त्यही भएर अभिनय मात्र नभई निर्देशनलाई पनि निरन्तरता दिइरहेको हुँ,’ उनी भन्छन् । 

फरक अभिनयका साथ फिल्मतिर पनि बेलाबेला झुल्किने उनी ‘अभिनय गर्दा जति स्वतन्त्र महसुस हुन्छ, निर्देशनमा त्यो अवसर नपाइने’ अनुभव सुनाउँछन् । झन्डै डेढ घण्टा लामो नाटक ‘दरौंदीको पानी’ मा उनले लखन थापा र महारानी लीलावतीको प्रेमप्रसंग जोडेका छन् । साथै टुक्रेराज्य एक बनाउन राजाहरूले गर्ने अनेक षडयन्त्र, राजदरबारभित्रको चलखेल, त्यसबेलाको नेपाली जीवनशैलीका स–साना तर लोभलाग्दा दृश्यहरू नाटकमा छन् । यस हिसाबले नाटक इतिहासको गर्भमा लुकिबसेका स–साना तर रोचक थुँगाहरूको सुन्दर माला बनेको छ । गम्भीर विषयवस्तु बुलन्द पार्न कलाकारहरूले अभिनयमार्फत उत्तिकै काम गरेका छन् । नाटकमा कमल देवकोटा, अजस्र ढुंगाना, प्रयास बान्तवा राई, नमिता घिसिङ, बिना थापा, अस्मिता खनाल, वीरेन्द्र मुखियाले अभिनय गरेका छन् ।

‘दरौंदीको पानी’ साउनभर मञ्चन हुनेछ । 

प्रकाशित : श्रावण २५, २०७४ ०९:०३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT