अनुप ‘क्रेज’ बेलायतमा उस्तै

कान्तिपुर संवाददाता

लन्डन — छ महिनाबीचमा यतिखेर दोश्रो पटक बेलायती माटोमा छन्, नायक अनुप विक्रम शाही । हांस्यप्रधान चलचित्र ‘कमलेको बिहे’ को रेड कार्पेट प्रिमियर शोका लागि बेलायत आएका उनी नेपाली दर्शकको मायाले दंग छन् ।

 ‘मलाई यूके आएको फिल नै भएको छैन्’, अनुप अनुभव बाँड्दै थिए, ‘तपाईंहरुको यो न्यायो माया र सम्मानले थप हौसला मिलेको छ, म आफू नेपालमै भए जस्तो महशुस गराइरहेको छ ।’ 

माया पब साउथ हयारोले आफ्नो सम्मानमा गरेको कार्यक्रममा क्याजुअल ड्रेसमा देखिएका थिए अनुप । अल्डरसटको वर्ल्ड प्रिमियर शो अत्यधिक सफल भएको सुनाउन उनी उत्साहित देखिए । ‘राजदूतसहित सयौं दर्शकले मन पराएर पुरै फिल्म हेरिदिनु नै मुख्य उपलब्धि हो’, अनुपले भने, ‘हामी हाइ बजेटमा फिल्म बनाउन सक्दैनौं । त्यसैले विदेशी फिल्मसंग तुलना नगरी नेपाली फिल्मलाई माया गरिदिन मेरो आग्रह छ ।’ 

‘कमलेको बिहे’ अर्गानिक कमेडी फिल्म भएको जनाउँदै उनले बेलायतवासी नेपालीलाई बाँकी शोहरुमा आएर हेरिदिन अनुरोध गरे ।

पछिल्लो समय नेपाली फिल्म बेलायतमा ल्याएर प्रिमियर शो गर्ने क्रम बढेको छ । यसले नेपाली फिल्मको बजार अन्तर्राष्ट्रिय स्तरमा बढ्ने विश्वास अनुपलाई छ । 

मोडलिङ हुंदै फिल्म छिरेका अनुपको झण्डै आधा दर्जन नयां फिल्म रिलिजको पर्खाइमा छन् । ‘मलाई सधैं पृथक भूमिकामा अभिनय गर्न मन लाग्छ’, लन्डनमा आफ्ना फ्यानमाझ घेरिएका उनले भने, ‘अहिले हामीबीच प्रतिष्पर्धा छ तर यसले गुणस्तर अभिवृद्धिमा झन् टेवा पुग्छ जस्तो लाग्छ ।’ 

नेपलिज इन्टरटेनमेन्ट यूके र शशी गुरुङको पहलमा कमलेको बिहे बेलायत ल्याइएको हो । उक्त फिल्म ८ तारिखमा साउथ हयारो लन्डनमा प्रदर्शन भइसकेको छ भने १० तारिख आसफोर्ड र १६ तारिख रेडिङमा प्रदर्शन हुने कार्यक्रम छ । 

कार्यक्रममा माया पबका तर्फबाट सिद्धार्थविक्रम क्षेत्री, रविन गुरुङ, बीरेन खड्कालगायतले सम्मान गरेका थिए । 

प्रकाशित : भाद्र २५, २०७४ १६:४६
ADVERTISEMENT
प्रतिक्रिया
पठाउनुहोस्
ADVERTISEMENT

जेगबनीबाट रेल सेवा सुरु

देवनारायण साह

मोरङ — साउन अन्तिम साता आएको बाढीले पटरी बगाउँदा सीमावर्ती जोगबनीबाट दिल्लीलगायत भारतका विभिन्न ठाउँ जाने-आउने अवरुद्ध रेल सेवा शनिबार साँझबाट पुन: सञ्चालनमा आएको छ ।

शनिबार साँझबाट भारतको कलकातालगायतको ठाउँबाट मालबाहक रेल आउन सुरु भएको जोगबनी रेलवे स्टेशनका स्टेशन मास्टर मनोज झाले बताए । उनले अहिले मालबाहक रेल आए पनि सोमबारबाट यात्रुबाहक रेल सेवा सञ्चालनको तयारी भएको बताए । 

बाढीले जोगबनीदेखि दक्षिणतर्फ साढे चार किलोमिटर रेलको पटरी बगाउँदा २८ दिनपछि रेल सेवा सञ्चालन भएको हो । जोगबनी नाका जोड्ने भारतको मिरगंज घाटस्थित एनएच५७ए को प्रमाण नदीको पुलमा बाढीले क्षति पुर्‍याएको र रेल सेवा अवरुद्ध भएकोले विराटनगर भन्सारबाट भारत तथा तेस्रो मुलुक आयात-निर्यात ठप्प भएको थियो । रेल र यातायातको साधन अवरुद्ध भएकोले सुनसरी-मोरङ औद्योगिक कोरिडोरको ५ सय बढी उद्योग प्रभावित भएको थियो । 

विराटनगर भन्सारका प्रमुख कृष्ण बस्नेतले शनिबार साँझ मालबाहक रेल आएपछि भारतलगायत तेस्रो मुलुकबाट रेलमार्गमार्फत आउने मालसामान आउन सुरु भएको बताए । उनले आइतबार विराटनगर भन्सारमा फलामको रोल आउन सुरु भएको सुनाए । उनले रेलवे स्टेशनले बढीमा मंगलबारदेखि यात्रुबाहक रेल सेवा पनि सुरु हुने जानकारी दिएको सुनाए । 

जोगबनी नाकाबाट आयात-निर्यात ठप्प भएपछि सरकारले सुनसरी मोरङ औद्योगिक कोरिडोरको आयात-निर्यात भारत सरकारबाट भिमनगर हुँदै भण्टाबारीबाट रि-रुट गराएर सञ्चालन गराएको थियो । स्वास्थ्योपचारलगायत कामका लागि भारत जान विराटनगरबाट भारतमा ६ किलोकिमटर सिटी रिक्सामा गएर सर्वसाधारणले भारतको बथनाहामा रेल चढन बाध्य भएका थिए । 

प्रकाशित : भाद्र २५, २०७४ १६:४६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT