सेलिब्रिटीका सेलिब्रिटी फयान

गायिका एरियाना ग्रान्डी पनि कमेडी सुपरस्टार जिम क्यारेकी ठूलो फयान हुन् । क्यारेलाई पहिलो पटक भेट्दा उनी धरधरी रोएकी थिइन् । उनीहरू भेट्दाको तस्बिर र भिडियो इस्टाग्राममा निकै पपुलर बनेको थियो । उक्त भेट निकै छोटो भए पनि एरियानाको प्रतिक्रिया हेर्न लायकको थियो । उनी केही बेर अक्क न बक्क परेकी थिइन् । 

माइली साइरसलाई बियोन्से मन पर्छिन् । फेभरेट गायिकाको कन्सर्ट हेर्दा माइलीले आफूलाई पत्यार नलागेको बताएकी थिइन् । ‘सपनाहरू पूरा हँुदा रहेछन्,’ उनले ट्वीट गरेकी थिइन्, ‘मेरैसामु बियोन्से 
धमाका मच्चाइरहेकी छन् । म पत्याइरहेकी छैन ।’ माइलीले बियोन्से स्टेजमा गाउँदै गरेको तस्बिर पनि सेयर गरेकी थिइन् । 

टेलर स्विफ्टले त झन् पप क्विन म्याडोनासँग स्टेज नै सेयर गर्ने मौका पाएकी थिइन् । त्यो बेला उनी म्याडोनालाई हेरेको हेर्‍यै भएकी थिइन् । ‘म ठीकै छु होला तर ठीकठाक छुइनँ,’ उनले इन्स्टाग्राममा क्याप्सन लेखेकी थिइन्, ‘म्याडोना एन्ड टेलर ।’ कालो पहिरनमा देखिएका गायिकाद्वयको गाउँदै गरेको फोटोमा प्रशस्त लाइक्स आएको थियो ।

निकलोडियन्स च्यानलमा आउने ‘ट्रु ज्याक्सन भीपी’ की अभिनेत्री केके पाल्मर हिलारी डफलाई भेट्दा अवाक् बनेकी थिइन् । गोल्डेन ग्लोब अवार्डमा डफलाई देख्नासाथ केके खुसीले उफ्रिएकी थिइन् । उनले आफूलाई सम्हाल्नै नसकेको प्रतिक्रिया दिँदा फोटोपत्रकारहरूले अनौठो मानेनन् । उनको हाउभाउले झूटो बोलिरहेको थिएन । 

सेलिब्रिटीका फयान धेरै हुन्छन् । तर, सेलिब्रिटी स्वयं पनि अर्को सेलिब्रिटीको फयान हुन सक्छन् भन्ने कुरा डेमी र टेलरहरूको अनुभवले बताउँछ । यता, बलिउडमा पनि यस्ता उदाहरण प्रशस्त छन् । आयुष्मान खुरानाकै कुरा गरौं । उनी प्रीति जिन्टाका फयान हुन् । स्कुल पढ्दादेखि नै प्रीति आफूलाई मन पर्ने गरेको उनी बताइहिँड्छन् । ‘उहाँको अन्तरवार्ता लिँदा निकै नभर्स भएको थिएँ,’ उनी भन्छन्, ‘त्यो क्षण स्वप्निल थियो ।’

करिना कपुर लियोनार्दो डिक्याप्रियो भनेपछि भुतुक्क हुन्छिन् । ‘टाइटानिक’ फिल्मले आफूलाई मुग्ध बनाएको उनले बताउने गरेकी छन् । आलिया भट्टलाई चाहिँ रनवीर कपुर साह्रै मनपर्दो रहेछ । ‘उहाँ मेरो बिगेस्ट क्रस हो,’ उनले भनेकी छन्, ‘र, सँधै मन पराइरहनेछु ।’ कट्रिना कैफ रोबर्ट प्याटिसनकी फयान हुन् । ‘ट्वाइलाइट’ एक्टरलाई भेट्ने उनको उत्कट इच्छा छ ।