प्रफुल्ल परिणीति

कान्तिपुर संवाददाता

काठमाडौं — रोहित शेट्टी निर्देशित ‘गोलमाल अगेन’ प्रदर्शनको तरखरमा छ । अभिनेत्री परिणीति चोपडा अचेल यो फिल्मको प्रचारमा व्यस्त छिन् । यही क्रममा उनले कमेडी फिल्म खेल्दाको अनुभव र यसबाट प्राप्त उपलब्धिबारे बताउन थालेकी छन् ।

कुनै बेला सजिलो ठानेको कमेडी विधा असलमा निकै गाह्रो भएको उनको अनुभव छ । 

यो फिल्म आफ्ना लागि विविध कारणले महत्त्वपूर्ण रहेको उनले बताएकी छन् । ‘सबैभन्दा ठूलो कुराचाहिँ यो फिल्म खेलेर मैले राम्रा साथी कमाएँ,’ उनी भन्छिन्, ‘सुरुमा मलाई डर लागेको थियो । अजय देवगण, तब्बु, अरसद वारसी, तुसार कपुरजस्ता स्टारहरू थिए । उनीहरू आपसमा रमाएको देख्दा म के गर्ने होला भन्ठान्थेँ । तर, जसै उनीहरूसँग नजिक भएँ, मेरो खुसीको सीमा रहेन ।’ 

पहिले पहिले कमेडी जानरालाई आफूले झारपात ठान्ने गरेको पनि उनले खुलाएकी छन् । काम थालेपछि भने उनको सोच फेरिएछ । ‘मान्छेलाई हँसाउनु त हो, कमेडी गर्न के गाह्रो होला र जस्तो लाग्थ्यो,’ उनी भन्छिन्, ‘तर, यो त झन् च्यालेन्जिङ रहेछ । बरु, ड्रामाटिक सिन पो सजिलो लाग्न थालेको छ ।’ उनका अनुसार, परबाट हेर्दा हल्काफुल्का लागे पनि कमेडी भनेको सिरियस बिजनेस हो ।

अर्कातिर, यी अभिनेत्री पाँच वर्षपछि अर्जुन कपुरसँग स्क्रिन सेयर गर्दै छिन् । सन् २०१२ मा ‘इशकजादे’ फिल्ममा सहकार्य गरेका उनीहरू ‘सन्दीप और पिंकी फरार’ मा पुन: देखिन लागेका हुन् । कुरा यति मात्रै होइन, उनीहरूले ‘नमस्ते क्यानडा’ मा पनि एकसाथ काम गर्ने टुंगो भइसकेको छ । 

‘यी फिल्मको लागि म पूर्ण तयारीमा छु,’ इन्डियन एक्सप्रेससँग अर्जुनले भनेका छन्, ‘यसकै लागि म दिल्ली पुगेको थिएँ । पात्रभित्र पस्न खोज्दै छु ।’ दिवाकार बनर्जीले निर्देशन गर्ने भनिएको ‘सन्दीप और पिंकी फरार’ मा दुई फरक समुदायका पात्रको कथा उनिएको छ । 

परिणीतिले पनि दिवाकारसँग काम गर्ने आफ्नो सपना रहेको बताएका छिन् । उनका फिल्म अलि फरक शैलीका हुने भएकाले अर्जुन र आफू सँधै लालायित हुने गरेको परिणीतिको भनाइ छ ।

‘म उहाँको पात्रमा डुब्न चाहिरहेकी छु,’ परिणीतिले प्रफुल्ल हुँदै भनेकी छन्, ‘दर्शकलाई केही गम्भीर चिज दिने इच्छा छ ।’ 

 

प्रकाशित : आश्विन २४, २०७४ ०८:५४
प्रतिक्रिया
पठाउनुहोस्

स्तरीय गीत लेख्न राष्ट्रकविको आग्रह

कान्तिपुर संवाददाता

काठमाडौं — यसपालिको ‘कालिका एफएम म्युजिक अवार्ड’ मा राष्ट्रकवि माधवप्रसाद घिमिरेलाई ‘लाइफटाइम अचिभमेन्ट अवार्ड’ प्रदान गरिएको छ । एफएमका अध्यक्षसमेत रहेका वन तथा भू–संरक्षण मन्त्री विक्रम पाण्डेले घिमिरेलाई दोसल्ला ओढाई ट्रफी र ताम्रपत्र प्रदान गरे ।

राष्ट्रकविलाई सम्मान गर्दा आफूहरू नै सम्मानित भएको मन्त्री पाण्डेले बताए । ‘उहाँ सय वर्ष पुगेपछि र महाकाव्य लेखिभ्याएपछि अचिभमेन्ट अवार्ड प्रदान गर्ने सोच थियो,’ उनले भने, ‘तर, हाम्रो धैर्यको बाँधटुट्यो । यसै पालि मौका मिलेकाले यो सम्मान दिएका हौं ।’ कालिका एफएम स्रष्टा र श्रोताप्रति समर्पित रहेको पनि उनले बताए ।

राष्ट्रकविलाई सोमबार होटल हार्दिकमा आयोजित समारोहमा सम्मान गरिएको हो । कवि, गीतकार, गायक, संगीतकर्मीलगायत स्रष्टाका माझ राष्ट्रकविलाई आदर गरियो । म्युजिक अवार्ड समारोह भने असोज २६ मा गैँडाकोटस्थित नारायणी रिसोर्टमा आयोजना गरिने एफएमकी निर्देशक रिना गुरुङले बताइन् । ‘हामीले यसअघि धेरै स्रष्टालाई सम्मान गरिसकेका छौं’, उनले भनिन्, ‘तर, राष्ट्रकविलाई सम्मान नगरेसम्म अधुरो महसुस भयो ।’

पत्नी महाकाली घिमिरेसँगै कार्यक्रममा उपस्थित ९९ वर्षीय राष्ट्रकविले अचिभमेन्ट अवार्ड प्रदान गरेकामा आयोजकलाई धन्यवाद दिए । त्योभन्दा पनि बढी चाहिँ उनले समारोहमा विविध व्यक्तित्वलाई भेट्न पाएकामा खुसी व्यक्त गरे । ‘स्वास्थ्य अवस्थाका कारण घरबाहिर ननिस्किएको धेरै भएको थियो,’ कामेका हातले माइक समाउँदै उनी बोले, ‘आज यत्तिका समयपछि तपार्इंहरूलाई देख्दा खुसी लागेको छ ।’

घिमिरेले सबै स्रष्टालाई समाजप्रति उत्तरदायी रहन आग्रह गरे । गीत रच्दा स्तरीयतालाई ख्याल राख्न अनुरोध गरे । ‘सधैँ साइँली–माइली फकाउने कुरा मात्रै रचेर/गाएर हुँदैन,’ उनले भने, ‘कवि/गीतकारले समाजप्रतिको कर्तव्य पनिबोध गर्नुपर्छ । सञ्चारमाध्यमले पनि मनोरञ्जन प्रदान गर्नुसँगै भाषा/साहित्यलाई पनि सुधार्नुपर्छ ।’

गीतकार कृष्णहरि बरालले सही व्यक्तिलाई सम्मान गर्दा संस्था आफैं सम्मानित हुने तर्क गरे । ‘स्रष्टालाई सम्मान गर्न काठमाडौंसम्म आएर कालिका एफएमले नमुना काम गरेको छ,’ उनले भने । गायक कुमार बस्नेतले चाहिँ राष्ट्रकविभन्दा पहिले आफू नै सम्मानित भएको उल्लेख गर्दै कविको उन्नति र प्रगतिको कामना गरे ।

गीतकार यादव खरेलले स्रष्टालाई सम्मान गर्दा मर्यादाक्रम याद राखिदिन आग्रह गरे । ‘हामीभन्दा पछि पो उहाँलाई सम्मान गरियो,’ खरेलले भने, ‘मर्यादाक्रमको अध्ययन गरेको भए हुनेथियो । भविष्यमा यो कुरायाद राखिदिनुहोला ।’ उनले पनि राष्ट्रकविको दीर्घायुको कामना गरे ।

समारोहमा गायक प्रेमध्वज प्रधान, साहित्यकार माया ठकुरी, गीतकार राजेन्द्र थापा, प्रा.डा. खगेन्द्र लुइँटेल लगायतले पनि घिमिरेलाई बधाई दिएका थिए ।

प्रकाशित : आश्विन २४, २०७४ ०८:५४
पूरा पढ्नुहोस्
प्रतिक्रिया
पठाउनुहोस्