क्यानभासमा नेपाल–भारत रंग

कान्तिपुर संवाददाता

काठमाडौं — के भारत के नेपाल, दुवैतिरका राजनीतिक व्यक्तिहरूले द्विदेशीय सम्बन्धबारे बोल्नुपर्दा नबिर्सने शब्दावली हो– ‘दुवै मुलुकबीच रोटी–बेटीको नाता छ ।’ यसले दुवैतिरका नागरिकको जीवनशैली, संस्कृति र रहनसहनमा कति साम्य छ भन्ने देखाउँछ । समाजको त्यो निकटतम प्रभाव कला क्षेत्रमा प्रतिविम्बित नहुने कुरै भएन ।

के भारत के नेपाल, दुवैतिरका राजनीतिक व्यक्तिहरूले द्विदेशीय सम्बन्धबारे बोल्नुपर्दा नबिर्सने शब्दावली हो– ‘दुवै मुलुकबीच रोटी–बेटीको नाता छ ।’ यसले दुवैतिरका नागरिकको जीवनशैली, संस्कृति र रहनसहनमा कति साम्य छ भन्ने देखाउँछ । समाजको त्यो निकटतम प्रभाव कला क्षेत्रमा प्रतिविम्बित नहुनेकुरै भएन ।
यति बेला नेपाल र भारतका चित्रकारहरू एक ठाउँ उभिएका छन् । बबरमहलस्थित आर्ट काउन्सिलमा बुधबार दुवैतर्फका चित्रकारहरूको संयुक्त कला प्रदर्शनी सुरु भएको छ ।

‘गोल्डेन होराइजन’ थिममा गरिएको प्रदर्शनीमा राखिएका सिर्जनाहरू अवलोकन गर्दा दुवै मुलुकको सामाजिक–सांस्कृतिक निकटता छयाङ्ग हुन्छ । प्रदर्शनीमा नेपाली र भारतका गरी १२ चित्रकारका सिर्जना छन् ।

चित्रकार कृष्णगोपाल श्रेष्ठको सिर्जना भौतिक सम्पदामा केन्द्रित छ । भूकम्पपछिको नेपालको सांस्कृतिक अवस्था कस्तो छ, उनका चित्र हेरेर सहजै अनुमान लगाउन सकिन्छ । उनले एउटा चित्रमा वृद्ध महिला र जीर्ण पुरानो ढोकालाई सँगै प्रस्तुत गरेर तीबीच तुलना गरेका छन्, जसले समय, परिस्थिति र संस्कृतिको वास्तविक चित्रण गर्छ ।

वरिष्ठ चित्रकार किरण मानन्धर (बायाँ) लाई आफ्नो सिर्जनाबारे अथ्र्याउँदै चित्रकार कृष्णगोपाल श्रेष्ठ ।

सधैं आशावादी रहने चित्रकार सत्यशीला कसजूले यस पटक शान्तिभाव चित्रमा उतारेकी छन् । उनले शालीन मुद्रामा रहेका बुद्धको आकृतिमा रंग पोतेकी छन् । बादलको पृष्ठभूमिमा पीपलको पात उडेको मुभमेन्ट उतारेकी उनले आफूभित्रको सकारात्मक सोच प्रस्तुत गरेकी छन् । यसो त प्रदर्शनीमा राखिएका धेरै चित्रले आशाकै किरण देखाएका छन् ।

भारतका चित्रकार रमेश मोतुकुरीको क्यानभासमा रंग मात्रै छ । कुनै निश्चित आकृति छैन । इन्द्रेणीको स्वरूप झल्कने उनको चित्रले जीवनको रंगीन मनोभाव दर्साएको अनुभूति गर्न सकिन्छ । हुने पनि हरेक रंगले जीवनको अर्थ प्रतिविम्बित गर्छ ।

स्वस्ति मिश्रले समय चक्रलाई आफ्नो कलाको केन्द्रिबिन्दु बनाएकी छन् । डाइनोसोरजस्तो देखिने जनावरभित्र सानो घडी राखेर उनले समयसापेक्ष नचले लोप हुने खतरा रहेको भाव प्रस्तुत गरेकी छन् ।

रवि आर कुलकर्णी प्राय: मानवशक्तिको थिममा चित्र कोर्ने गर्छन् । यो पटक भने नेपालमा ल्याएको उनको काम ल्यान्डस्केप सौन्दर्यमा केन्द्रित छ ।

त्यस्तै, नेपालकी चित्रकार सरिता डंगोलको कला भने भौतिक विषयभन्दा पनि मनोविज्ञानसँग गाँसिएको छ । खुर्सानीजस्तो निर्जीव वस्तुमा उनले मानव जीवनको परिकल्पना गरेकी छन् । सञ्जित महर्जनको चित्रले काठमाडौंको प्रदूषित वातावरणमाथिव्यंग्य गरेको छ । सानो बालक मास्क लगाएर हिँड्नुपर्ने समसामयिक विडम्बना उनको चित्रमा झल्किन्छ । सन्ध्या सिलवालको कला पेपर कटिङ टेक्निकमा आधारित छ । यसले फरक स्वाद दिएको छ ।

भारत र नेपालका कतिपय चित्रकारहरूका सिर्जनामा रंग, माध्यम र विचारदृष्टिमा एकरूपता देख्न सकिन्छ ।

नेवा छेँ आर्ट ग्यालरी र क्लासिक आर्ट ग्यालरीद्वारा थालिएको प्रदर्शनी असोज २९ सम्म चल्नेछ ।

प्रकाशित : आश्विन २६, २०७४ ०९:५४
ADVERTISEMENT
प्रतिक्रिया
पठाउनुहोस्

जसलाई सतायो गम्भीर रोगले

कान्तिपुर संवाददाता

काठमाडौं — हलिउड नायिका/गायिका सेलेना गोमेज आफ्नो स्वास्थ्य स्थितिलाई लिएर खुला किताबझैं छिन् । सन् २०१५ मा उनले आफूलाई ‘लुपस’ नामक रोग लागेको बताएकी थिइन् । पूर्ण निर्मूल पार्न नसकिने उक्त रोगसँग लड्न नियमित केमोथेरोपी गराउनुपरेको थियो ।

तर, लुपसकै कारण उनको मृगौला खराब भयो । हालै उनले मृगौला प्रत्यारोपण गराइन् । साथी फ्रान्सिया राइसाले किडनी दिएपछि सेलेनाले नयाँ जीवन पाएको प्रतिक्रिया दिएकी थिइन् । 

प्रत्यारोपणअघि २०१६ मा पनि उनले आफूलाई एन्जाइटी, प्यानिक अटयाक र डिप्रेसन भएको बताएकी थिइन् । ‘म खुसी र सक्रिय हुन चाहन्छु,’ उनले भनेकी थिइन्, ‘त्यसका लागि स्वास्थ्य ठीक हुनुपर्‍यो । तसर्थ, केही समय ब्रेक लिने निर्णय गरेकी छु ।’ नयाँ म्युजिक भिडियोहरू लन्च गरिरहे पनि सेलेना त्यसपश्चात् म्युजिक सिनबाट हराएकी थिइन् । उनी अझै ब्रेकमै छिन् । 

लुपस फाउन्डेसन अफ अमेरिकाका अनुसार, यो रोग पुरुषलाई भन्दा बढी महिलालाई लाग्छ । यसले शरीरको प्रतिरोधात्मक शक्तिलाई निष्क्रिय बनाउनुका साथै विभिन्न अंग, जोर्नी, छाला वा भित्री अंगहरू बिगारिदिन्छ । यसको उपचार सम्भव छैन । सेलेनासँगै गायिका टोनी ब्राक्स्टन र गायक निक क्यानोन लुपससँग जुधिरहेका छन् । लेडी गागालाई पनि यो रोग लागेको हल्ला चलेको थियो । तर, त्यो कुरा झूटो भएको गागाले स्पष्ट पारिसकेकी छन् ।

हेर्दा चिरिच्याँट्ट वा आकर्षक देखिए पनि थुपै्र सेलिब्रिटी भित्रभित्रै विभिन्न रोगसँग लडिरहेका हुन्छन् । हाम्रै मनीषा कोइराला क्यान्सरलाई जितेर नयाँ जीवन बाँचिरहेकी छन् । अस्तव्यस्त जीवनशैली, जंकफुड आदिले आफूलाई क्यान्सरसम्म पुर्‍याएको उनको भनाइ थियो । ‘मैले स्वयंलाई माया गरिनँ,’ उनी भन्छिन्, ‘अस्पतालको बेडमा महिनौंसम्म बस्दा जीवनको महत्त्व बुझेँ ।’ अचेल उनी आफूलाई क्यान्सरविरुद्धको योद्धा भन्न रुचाउँछिन् ।

अभिनेता टम हयांक्स डाइबिटिजपीडित हुन् । २०१३ मा उनले यो रहस्य उजागर गरेका थिए । १९९० देखि २००० सम्म खूब चर्चित रहेकी गायिका पिंक सानैदेखि रोगी थिइन् । उनलाई अस्थमा अर्थात् दम छ । यद्यपि, रोगलाई उनले बाधक ठानिन् । कोलम्बियन गायिका साकिराका पनि सबै कुरा पर्फेक्ट छैनन् । उनलाई टाक्जोप्लाज्मोसिस भन्ने रोग छ । काँचो मासु वा घरपालुवा जनवारमार्फत सर्ने यो रोगले मांसपेसी दुख्ने, ज्वरो आउनेलगायत समस्या पैदा गर्छ । 

अभिनेता हयु ज्याकम्यानलाई छालाको क्यान्सर छ । टेलिशृंखला ‘बेवाच’ मार्फत चिनिएकी अभिनेत्री पामेला एन्डरसन हेपटाइटिस सीबाट प्रताडित छिन् । यसले गर्दा उनलाई अचानक ज्वरो आउने, थकान महससु हुने र पेट दुख्ने समस्या आइपर्छ । र्‍यापर लायल वाइनी मस्तिष्कसम्बन्धी समस्याको औषधि सेवन गर्छन् । उनलाई एपिलेप्सी नामक रोग छ । मोर्गन फ्रिम्यानलाई पूरै जीउ दुख्ने समस्या छ । मेडिकल भाषामा यसलाई फाइब्रोमाइअल्जिया भनिन्छ ।

– एजेन्सी 

प्रकाशित : आश्विन २६, २०७४ ०९:५४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT