डिप्रेसनको तीतो अनुभव

कान्तिपुर संवाददाता

काठमाडौं — सेलेब्रिटीहरू आफ्ना समस्या प्राय: लुकाउँछन् । बलिउड अभिनेत्री दीपिका पादुकोणले चाहिँ त्यस्तो गर्ने गरेकी छैनन् । आफू डिप्रेसनबाट पीडित भएको कुरा उनले नधकाईकन सुनाइन् । यो मानसिक समस्याबाट छुटकारा पाउने क्रममा उनले ‘लिभ लभ लाइफ’ नामक संस्था नै खोलिन् । ३१ वर्षे अभिनेत्री डिप्रेसनसम्बन्धी आफ्ना अनुभव बेलाबेला सेयर गरिरहन्छिन् ।

हालैको एउटा कार्यक्रममा पनि उनले मानसिक समस्यासँग जुध्दाको अनुभूति साझा गरेकी थिइन् । ‘यो रोग बल्झेला कि भनेर पछिसम्म पनि निकै डराएकी थिएँ,’ उनले भनेकी थिइन्, ‘खासमा म अझै योसँग जुधिरहेकी छु । पहिले–पहिले त पूर्ण रूपमा ठीक हुन्छु जस्तो पनि लाग्दैनथ्यो । मेरो मनमस्तिष्कमा डरले डेरा जमाएको थियो । डिप्रेसनमा पर्दाको मेरो अनुभव साह्रै तीतो छ ।’

डिप्रेसनबारे खुलेर बोल्दा केही घाटा पो भयो कि भन्ने प्रश्नमा दीपिकाले ठोकुवा गरेर भन्न नसके पनि केही निर्माता आफूबाट पन्छिएको हुन सक्ने बताइन् । उनले देशभरका विद्यालयमा मानसिक स्वास्थ्यबारे राम्रो पढाइ हुन आवश्यक रहेको औंल्याइन् । ‘विद्यार्थीहरूलाई अवगत गराए मात्रै मानसिक रोगसँग जोडिएका भ्रमहरू हट्नेछन्,’ उनले भनिन् ।

दीपिका यति बेला सञ्जयलीला भन्साली निर्देशित ‘पद्मावती’ को काममा व्यस्त छिन् । फिल्ममा उनी रानी पद्मावतीको भूमिका निर्वाह गर्दै छिन् । तिहारको छेकोमा उनको नयाँ लुक्स बाहिर आएको छ । उक्त फिल्ममा दीपिकासँगै साहिद कपुर र रणवीर सिंह मुख्य भूमिकामा देखिनेछन् ।

प्रकाशित : आश्विन २७, २०७४ ०९:३५
ADVERTISEMENT
ADVERTISEMENT
प्रतिक्रिया
पठाउनुहोस्

“छक्का पञ्जा” को हयाट्रिक

विमल खतिवडा

चितवन — कालिका एफएमले प्रदान गर्दै आएको म्युजिक अवार्डमा ‘छक्का पञ्जा’ ले हयाट्रिक गरेको छ । एफएमको पन्ध्रौं वार्षिकोत्सव तथा तेह्रौं अवार्ड समारोहमा उक्त फिल्मका दुइटा गीत तीन विधामा पुरस्कृत भएका छन् ।

उक्त फिल्मको ‘देख न चम्पा...’ गीतका लागि दीपक शर्मा फिल्मतर्फको उत्कृष्ट संगीतकार घोषित भए भने, शान्तिप्रिय उत्कृष्ट गीतकार । ‘पूर्व–पश्चिम रेल..’ को युगल गायनमा राजनराज सिवाकोटी र अञ्जु पन्तले अवार्ड पाए । 

पाश्र्व गायनमा पुरुषतर्फ ‘म यस्तो गीत गाउँछु’ को ‘भन्छु आज...’ गीतका लागि सुगम पोखरेल र महिलातर्फ ‘२ रुपैयाँ’ को ‘कुटुमा कुटु...’ गीतका लागि मेलिना राईले अवार्ड थापे ।

आधुनिक गीतमा गायकतर्फ ‘मनको दाग...’ का लागि युवराज चौलागाईं र गायिकातर्फ ‘र्‍याइँर्‍याइँ गर्‍यो सारंगी...’ का लागि सत्यकला राईले अवार्ड जिते । संगीतकारमा ‘फूल सरी...’ का लागि राजकुमार बगर र रचनाकारतर्फ एकनारायण भण्डारीले ‘म बाँचेकै...’ बाट अवार्ड थापे ।

पप गायनतर्फ गायकमा ‘सुन साइँली...’ का लागि हेमन्त राना र गायिकातर्फ ‘नाइँ मलाई थाहा छैन...’ का लागि टीका प्रसाईं पुरस्कृत भए । संगीतकारमा ‘तिम्रो चोलीको तुनामा...’ बाट हिमाल सागर र रचनाकारतर्फ ‘मलाई माया गर्ने..’ का लागि योगेन्द्रमणि दाहालले अवार्ड पाए । पप ब्यान्डतर्फ ‘सानीको...’ गीतबाट १९९४ एडी पुरस्कृत भयो ।

 लोकदोहोरीमा गायकतर्फ राजु परियारले ‘जानेलाई जान देऊ माया...’ का लागि अवार्ड पाए । गायिकातर्फ देवी घर्ती मगर ‘उही खोलीमा पानी...’ र लोकदोहोरी लयतर्फ ‘यो दाइ फेरि आउँदैन...’ का लागि शिरीष देवकोटा भाग्यमानी ठहरिए । लोकदोहोरी शब्दतर्फ ‘सपनीमा आँसु...’ का लागि रमेश बीजी अवार्ड जित्न सफल भए । लोकदोहोरीमा स्थानीय गायकतर्फ ‘मायाले हाँसेर खाऊ पानी..’ का लागि लक्ष्मी दाहाल र मध्य नेपाल गायनतर्फ मनोज महतोले ‘तिम्रो जवानीको झिल्को..’ का लागि अवार्ड पाए । 

संगीत संयोजनतर्फ ‘भन्छु आज...’ गीतका लगि महाराज थापा र डेब्यु गायनतर्फ ‘सिरसिर हावासँगै..’ का लागि मीरा कार्कीले अवार्ड पाए । वर्षको सर्वोकृष्ट गीतको अवार्ड भने ‘कुटुमा कुटु...’ का लागि राजनराज, मेलिना, राजन इशानले पाए । उत्कृष्ट गजलतर्फ ‘चिसो सहर..’ का लागि राज सागर र 
शीतल कादम्बिनीले अवार्ड पाए । 

राष्ट्रिय गीततर्फ विशाल ढकालको संगीतमा शिशिर योगी, संगीता पोखरेल र राजेन्द्र बजगार्इंले गाएको ‘जहाँ स्वर्गभन्दा...’ उत्कृष्ट दरियो । म्युजिक भिडियोतर्फ भने निकेश खड्काले ‘तिलहरी..’ गीतबाट अवार्ड बुझे । 

गैँडाकोटको नारायणी रिसोर्टमा बिहीबार आयोजित समारोहमा महजोडी मदनकृष्ण श्रेष्ठ र हरिवंश आचार्य प्रमुख अतिथिका रूपमा उपस्थित थिए । कार्यक्रममा राजु परियार, देवी घर्ती मगर, कमल क्षेत्री, रमेशराज भट्टराई, हिमाल सागर, भुवन प्यासी, कमल खत्री र शिरीष देवकोटाले गीत गाएर र रेणु तामाङले नाचेर मनोरञ्जन दिए । 

 

प्रकाशित : आश्विन २७, २०७४ ०९:३५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT