जब आँचल परिन् अपहरणमा

सुटिङ रिपोर्ट
शंकर आचार्य

पर्सा — शुक्रबार साँझ वीरगन्ज नजिकको पर्सागढी नगरपालिकास्थित एक पुरानो हवेलीको आँगनबाटै अभिनेत्री आँचल शर्मा अपहरणमा परिन् । सेतो पिकअप भ्यानमा अपहरणकारीहरूले उनलाई जबरजस्ती बोकेर लग्दा उनी हारगुहार गर्दै थिइन् ।

‘आमा मलाई बचाउनु....’ भन्दै आँचलले हारगुहार गरिरहँदा आमा वसुन्धरा भुसाल हवेलीभित्रबाट दौडँदै बाटोसम्म आइपुगिन् । छोरीलाई जबरजस्ती भ्यानमा हालेर लगेको देखेपछि उनी दौडँदै भ्यानलाई त पछयाइन्, तर सफल भइनन् ।  ‘लौ न मेरी छोरीलाई बचाउ...,’ उनी चिच्याइन् । तर उनको पुकार सुन्ने कोही थिएनन् । 

दृश्य साँच्चिकै भए पनि घटना भने वास्तविक थिएन । ‘मह सञ्चार’ ले लामो अन्तरालपछि प्रस्तुत गर्न लागेको फिल्म ‘शत्रु गते’ को सुटिङ भइरहेको थियो यहाँ । तीनपटक रिटेक लिएपछि मात्रै क्यामेरा पछिल्छिरबाट युवा निर्देशक प्रदीप भट्टराईले भने ‘ओके’ । 

आँचल र वसुन्धराको दृश्य सकिएपछि आफ्नो दृश्यको लागि हरिवंश आचार्य, पल शाह, मोहितवंश आचार्य, शिवहरि पौडयाल, नरेन्द्र कंसाकारलगायतका कलाकार तम्तयार भए । मदनकृष्ण श्रेष्ठ, दीपकराज गिरी, दीपाश्री निरौला, प्रियंका कार्की पनि यो फिल्ममा हुनेछन् । मदनकृष्णको भूमिका रहेको दृश्य भने तराईमा नपरेकाले उनका यो टिममा थिएनन् । तराईको महापर्व छठको छेकोमा शुक्रबारदेखि वीरगन्ज र आसपास छायांकन भइरहेको छ । १५ दिनमा मोफसलका दृश्यहरू छायांकन गरी सक्ने लक्ष्य राखेको निर्देशक भट्टराईले जनाए । ‘वीरगन्जको छायांकन सकेपछि राजधानीको सुरु हुन्छ,’ उनले भने, ‘तराईको परिवेश चाहिएकाले हामी यता आएका हौं ।’ 

फिल्म पूर्णरूपमा हास्यप्रधान रहेको उनले बताए । ‘गतेहरू नै शत्रु भए केसम्म आइपर्छ भन्ने कुरालाई फिल्ममा हास्यशैलीमा प्रस्तुत गरेका छौं,’ भट्टराई भन्छन्, ‘कलाकारले दु:ख पाउँदा दर्शकले भने रमाइलो गर्छन् ।’ हरिवंश आचार्यको कथामा फिल्मको स्क्रिप्ट लेखन भने दीपकराज गिरी र निर्देशककै रहने बताइएको छ । नृत्यमा कविराज गहतराज र संगीतमा राजनराज सिवाकोटी, कालीप्रसाद बाँस्कोटा र प्रवेश मल्लिकले काम गर्नेछन् । चैत ९ गते फिल्म प्रदर्शन गर्ने लक्ष्यका साथ दू्रतगतिमा काम भइरहेको निर्देशक भट्टराईले बताए । ‘जात्रा’ पछि उनको यो दोस्रो फिल्म हो । 

फिल्म छायांकन उत्साहजनक भइरहेको उनले बताए । ‘काम गर्ने टिम मजबुत भएपछि काम गर्न सहज हुन्छ,’ उनले भने, ‘फिल्म निर्माण पनि एउटा टिम वर्क नै हो, टिम राम्रो भएपछि फिल्म पनि राम्रो बन्छ ।’ 

प्रकाशित : कार्तिक १२, २०७४ ०८:४२
प्रतिक्रिया
पठाउनुहोस्

सकियो ‘भोर’ को छायांकन

कान्तिपुर संवाददाता

जनकपुर — निर्देशक यादवकुमार भट्टराईको नेपाली फिल्म ‘भोर’ को छायांकन सम्पन्न भएको छ । मधेसको प्रमुख सामाजिक समस्या दाइजोमा आधारित फिल्मको छायांकन गत वर्ष छठ पर्वदेखि सुरु भई यस वर्ष छठकै दिनमा सम्पन्न भएको निर्देशक भट्टराईले जनाए ।

शनिबार मिथिला नाटयकला परिषद्मा आयोजित पत्रकार सम्मेलनमा निर्देशक भट्टराईले फिल्मको सम्पूर्ण दृश्य जनकपुरकै वरिपरिमा छायांकन गरिएको जानकारी दिए ।

‘दाइजो मधेसको मात्र समस्याजस्तो देखिए पनि यो विश्वव्यापी छ,’ उनले भने, ‘दाइजोग्रस्त समाजका विभिन्न पक्षलाई सार्वजनिक गर्ने प्रयास गरेका हौं ।’ साहित्यकार कृष्ण धराबासीको कथानकमा आधारित फिल्मको पटकथा तथा संवाद निर्देशक यादवकुमार भट्टराई स्वयंले लेखेका हुन् भने रामनारायण ठाकुर, मदन ठाकुर, बीएन पटेल, डली सरकार, अनितारानी मण्डल, परमेश झा, राजेश सक्सेनालगायतले अभिनय गरेका छन् । 

राज तिमिल्सिना र रामगोपाल थापा निर्माता रहेको फिल्मको छायांकन दीपक ब्रजाचार्यले गरेका छन् । करिब ८० लाखको लागतमा निर्माण भएको फिल्म अगामी फागुनसम्ममा सार्वजनिक हुने निर्देशक भट्टराईले जानकारी दिए ।

प्रकाशित : कार्तिक १२, २०७४ ०८:४२
पूरा पढ्नुहोस्
प्रतिक्रिया
पठाउनुहोस्