आकाशकी ‘ड्रिमगर्ल’ बन्दै आश्मा

कान्तिपुर संवाददाता

काठमाडौं — निर्देशक ऋषिराज आचार्यले आफ्नै पटकथा लेखनमा ‘ड्रिमगर्ल’ बनाउने घोषणा गरेका छन् । बिहीबार एक कार्यक्रममा आचार्यले ड्रिमगर्लको रूपमा फिल्ममा आश्मा गिरीलाई अनुबन्ध गरेको जानकारी दिए ।

देशव्यापी अडिसनपछि आश्मालाई छानिएको उनले बताए । फिल्ममा आश्मा ‘म त तिम्रै हुँ’ नायक आकाश श्रेष्ठकी ड्रिमगर्ल बन्न लागेकी हुन् । आकाशले ‘तिमीसँग’ र ‘ब्ल्याक’ पछि चौथो फिल्मका रूपमा यसलाई रोजेका हुन् । दक्षिण भारतको रिल एन्ड रियल सिनेमा र निर्देशकको आरबी मुभिजको ब्यानरमा संयुक्त निर्माण हुन लागेको फिल्मको सुटिङ शुक्रबारदेखि सुरु हुनेछ । 

फिल्ममा सरोज खनाल, अर्जुन श्रेष्ठ, विल्सनविक्रम राई, रुपा सुवेदी, पूजा पराजुली, लक्ष्मी गिरी, सुरवीर पण्डितलगायतको पनि मुख्य भूमिका रहनेछ । बिहीबारै गरिएको मुहूर्तमा संविधानविद् डा. भीमार्जुन आचार्य, फिल्म निर्देशक शम्भु प्रधान, स्क्रिप्ट राइटर नूतन प्रधान, कलाकार अशोक शर्मा, सञ्चारकर्मी/फिल्म निर्देशक लक्ष्मण सुवेदी, अभिनेता अर्जुन श्रेष्ठले फिल्मको सफलताको शुभकामना दिए ।

राजधानी, मुस्ताङ, रारा तालका साथै कतारका विभिन्न स्थानमा खिचिने फिल्ममा राहुल राईले क्यामेरा सम्हाल्नेछन् । गम्भीर विष्टको कोरियोग्राफी, सम्राट बस्नेतको द्वन्द्व निर्देशन र अर्जुन पोखरेलले संगीत रहने फिल्मको सम्पादन नवीन निरौलाले गर्नेछन् ।

प्रकाशित : कार्तिक २४, २०७४ ०९:३५
ADVERTISEMENT
प्रतिक्रिया
पठाउनुहोस्
ADVERTISEMENT

चित्रकारले दिए सहयोग

कान्तिपुर संवाददाता

कास्की — चित्रकारहरू चित्र प्रदर्शनीमा भएको बिक्रीबाट संकलित ६५ हजार रुपैयाँ बाढीपीडितका लागि प्रधानमन्त्री दैवीप्रकोप राहत कोषमा जम्मा गरेका छन् । सृजनशील कलाकार समूह कास्कीका संयोजक नगेनसिंह ठकुरीको नेतृत्वमा कलाकर्मीले रकम जम्मा गर्न विहीवार कास्कीका प्रजिअ तारानाथ अधिकारीलाई हस्तारण गरे ।

बाढीपीडितलाई सहयोग गर्ने उद्देश्यले गरिएको प्रदर्शनीमा २७ चित्र बिक्री भएका थिए । दुर्गा बराल, क्षेत्रलाल कायस्थ र संयोजक ठकुरीसँगै एक दर्जन कलाकर्मीका चित्र बिक्री भएको रकममध्ये ५० प्रतिशत समूहको कोषमा राखेर ५० प्रतिशत सरकारलाई हस्तान्तरण गरिएको समूहले जनाएको छ ।

प्रकाशित : कार्तिक २४, २०७४ ०९:३५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT