काठमाडौं — वरिष्ठ कवि एवं संस्कृतिविद् तुलसी दिवसले धेरै वर्षअघि ‘सम्झिराख’ शीर्षकमा यस्तो कविता लेखेका थिए–
मेरैजस्तो तिम्रो
हृदयको गमलामा पनि
सम्झनाको फूल फुलेकै होला
सम्झिराख
सम्झिराख, लामो सफरमा
आँसु र हाँसो बाँड्नुपर्छ
सम्झिराख...
अब यो कवितालाई गीतको रूपमा संगीतबद्ध सुन्न र भिडियोमा हेर्न पाउने भएको छ । यो कवितालाई नेपथ्यले आफ्नो दसौं एल्बममा समेटेको छ ।
युट्युबमार्फत नेपथ्यले यसको भिडियो पनि सार्वजनिक गरेको छ । ‘मैले यो कविता बाल्यकालमै रचेको थिएँ,’ कवि दिवसले भने, ‘पछि कविता संग्रह निकाल्ने बेलामा यसका शब्दहरूको मर्मले छोएपछि प्रकाशित पनि गरेको थिएँ ।’ बाल्यकालमा लेखेको र युवावस्थामा प्रकाशित भएको यो कवितालाई आफू प्रौढ अवस्थामा पुग्दा नेपथ्यले यसरी गीतका रूपमा अघि बढाएकोमा उनले खुसी प्रकट गरे । म्युजिक भिडियोले भने ललितपुरका पुराना गल्ली, दरबार र ढुंगेधाराहरूलाई लोकेसन बनाएको छ । भिडियोमा ब्यान्डका सदस्यहरू रातको एकान्तमा पुरानो सहरको यात्रा गरेको सन्दर्भ छ ।
‘शब्दको खोजीमा हिँडिरहँदा तुलसी दिवसको पुरानो कविता संग्रह हातपरे र पढ्दै जाँदा कविता मनपराएर गाउने योजना बनाएको’ गायक एवं ब्यान्डका अगुवा अमृत गुरुङले भने । नेपथ्यले आफ्नो स्थापनाको रजत वर्ष मनाउने घोषणासँगै यो गीत सार्वजनिक गरेको बताइएको छ ।
प्रकाशित : मंसिर ४, २०७४ ०९:०६